الان تىلەنشيەۆ قازاقستاندا ساياسي پارتيالاردى تىركەۋ ماسەلەسىنە توقتالىپ ءوتتى.
«قازىر بىزدە ەكى پارتيانىڭ قۇجاتتارى قارالىپ جاتىر. ولاردىڭ ءبىرى - «ەل تاعدىرى» رەسپۋبليكالىق ساياسي پارتياسى, ەكىنشىسى - «قازاقستان حالىق كونگرەسى» ينتەرناتسيونالدى دەموكراتيالىق پارتياسى» قوعامدىق بىرلەستىگى. قازىر ولار تەكسەرۋ ساتىسىندا تۇر», دەدى ول.
تىلەنشيەۆ ادىلەت مينيسترلىگى قازىر بۇل پارتيالاردىڭ قۇجاتتارىن قاراپ جاتقانىن, ولاردىڭ 5 مىڭ مۇشەسىنىڭ ءتىزىمى بار-جوعىن تەكسەرۋدە ەكەنىن ايتتى. وسىدان كەيىن ءتيىستى مەملەكەتتىك ورگاندارعا – قۇقىق قورعاۋ جانە ارناۋلى ورگاندارعا سۇراۋ سالىنادى, ويتكەنى «ساياسي پارتيالار تۋرالى» زاڭدا قىزمەتكەرلەرگە, قۇقىق قورعاۋ, ارناۋلى ورگانداردىڭ قىزمەتكەرلەرىنە, كونستيتۋتسيالىق سوتتىڭ سۋديالارىنا, جوعارى اۋديتورلىق پالاتا مۇشەلەرىنە پارتياعا مۇشە بولۋ جاعىنان شەكتەۋلەر بار.
«بىزگە وسى ورگانداردان اقپارات كەلىپ تۇسكەننەن كەيىن, ءبىز جارعىلىق جانە قۇرىلتاي قۇجاتتارىن زەردەلەپ, تىركەۋ راسىمدەرىن جۇرگىزەمىز. تىركەۋگە الۋدىڭ جالپى مەرزىمى - ءبىر اي, بىراق ول وسى قۇجاتتاردى زەردەلەۋگە بايلانىستى توقتاتىلادى. بىزگە بارلىق ورگاننان اقپارات كەلىپ تۇسەدى, وسىدان كەيىن ءبىز قىسقا ۋاقىت ىشىندە ءتيىستى بۇيرىق شىعارامىز: ەگەر قانداي دا ءبىر بۇزۋشىلىقتار ورىن السا, وندا تىركەۋدەن باس تارتامىز, ەگەر بۇزۋشىلىقتار بولماسا, وندا ءبىز ولاردى تىركەيمىز», دەپ ءتۇسىندىردى سپيكەر.
ەسكە سالا كەتسەك, قازاقستاندا 7 ساياسي پارتيا رەسمي تۇردە تىركەلگەن. ولار:
- Amanat پارتياسى;
- «اق جول» قازاقستان دەموكراتيالىق پارتياسى;
- قازاقستان حالىق پارتياسى;
- «اۋىل» حالىقتىق-دەموكراتيالىق پاتريوتتىق پارتياسى;
- جالپىۇلتتىق سوتسيال-دەموكراتيالىق پارتياسى;
- قازاقستاندىق «بايتاق» جاسىلدار پارتياسى;
- «Respublica» پارتياسى» قوعامدىق بىرلەستىگى.
