1. سۇيىكتى سەريالدى ءوشىرۋ
بالكىم, رامازان ايىنىڭ باسىندا-اق كوگىلدىر ەكراننان باس تارتۋدى جوسپارلاعان بولارسىز. ەگەر ول جوسپارىڭىزدا بولماسا, وندا رامازان ايىنىڭ سوڭعى ون كۇنى – تەلەديدار ءپۋلتىن الىستاۋ جەرگە قويىپ قويۋدىڭ ەڭ ءتيىمدى كەزى.
2. ينتەرنەتتى ءوشىرۋ
قاسيەتتى ايدىڭ 21-ءشى كۇنى كەلگەنشە بار ۋاقىتىمىزدى ينتەرنەتتە قۇر جىبەرسەك, ناعىز قىلمىس جاساعان بولامىز. ينتەرنەتتەن باس تارتا المايتىن بولساڭىز, مودەمىڭىز, ءتىپتى ۇيالى تەلەفونىڭىز دا ءپۋلتتىڭ جانىنان ورىن تەپسىن.
3. باس قوسۋلاردى قىسقارتۋ
رامازان ايىنىڭ سوڭعى كۇندەرى وڭاشالانۋدى تالاپ ەتەدى. تاڭنان كەشكە دەيىن مەشىتتە وتىرىپ قۇلشىلىق جاساۋعا اركىمنىڭ جاعدايى كەلە بەرمەسى انىق. الايدا, ارقايسىمىزدىڭ بوس سوزدەن, تالاس-تارتىستان, اۋىزاشاردان باستالىپ بىرنەشە ساعاتتارعا سوزىلعان كەزدەسۋلەردەن, تاڭعا دەيىن اڭگىمە-دۇكەن قۇرىپ وتىرۋدان تىيىلۋعا ەرىك-جىگەرىمىز جەتەدى. رامازان ايىنىڭ سوڭعى ون كۇنى ون ءتۇرلى التىن جامبى ىسپەتتى. ەندەشە, ءبىر شىنى ءشاي ءۇشىن التىن جامبىدان ايىرىلىپ قالمايىق.
4. قۇلشىلىقتى ارتتىرۋ
رامازان ايىنىڭ اياعىندا كوپشىلىگىمىز شارشاڭقىراپ قالامىز. بالكىم, بۇل السىزدىككە سەبەپ بولعان ۇيقى رەجيمنىڭ بۇزىلۋى مەن اشتىق سەزىمدەرى بولار. قالاي بولعاندا دا, ءبىزدىڭ ىقىلاسىمىز السىرەيدى, بىراق وعان جول بەرۋگە بولمايدى. رامازان ايىنىڭ 20-ءشى تۇنىندە تاراۋىق نامازىن وقىعان جانعا بەرىلەر سىيلىقتى ەستەرىڭىزگە سالايىق پا؟ جوق, الدە 29-شى تۇنگى ساۋاپتى ايتايىق پا؟ ەسىڭىزگە الار بولساڭىز, جايناماز ۇستىندە تۇرعانىڭىزدى اڭعارماي دا قالارسىز.
5. ءۇي شارۋاسىن جەڭىلدەتۋ
بۇل ايدىڭ سوڭعى كۇندەرىندەگى ەڭ ءتيىمسىز تىرلىك – ۇيىڭىزگە تازالىق جاساۋ, ياعني ءبىر قولىڭىزبەن توبەنى اكتەپ, ءبىر جاقتان كىلەم جۋ. نەگىزىندە, ءۇيدىڭ اۋاسىن جاڭارتىپ, ۇيگە مەرەكەلىك اتموسفەرانى رامازان ايى كىرمەس بۇرىن جاساۋعا ءتيىسپىز. ەگەر ءدال ۋاقىتىندا جاساپ ۇلگەرمەي قالعان بولساڭىز, بارىنشا جەڭىلىن تاڭداڭىز: ايت كۇنىنىڭ الدىندا ءۇيدى تازالاپ, مەرەكەلىك اشەكەيلەر ءىلىپ قويىڭىز.
6. دۇكەندە كەزەكتە تۇرماۋ
ايت كۇندەرى وتباسىمىزدى, جاقىندارىمىزدى قۋانتۋعا اسىققاندى جاقسى كورەمىز. الايدا, سىيلىق الامىن دەپ اسىرا سىلتەۋدىڭ قاجەتى شامالى. ورازا ايتى – بۇل ادەمى سىيلىق بەرۋدەن جارىس كۇنى ەمەس, قۋانىشتى ءبولىسۋ, ماحابباتتى جەتكىزۋدىڭ ءبىر جولى, مۇمكىندىگى. بەرەكەلى داستارحان, كىشىگىرىم ەستەلىك سىيلىقتار, جايلى اتموسفەرا - مەركەنى سەزىنۋگە تاپتىرماس قۇرال بولماق.
7. ىسىراپ جاساۋدان باس تارتۋ
بۇل مۇسىلمان ايەلدەرگە بەرەتىن تاعى ءبىر ماڭىزدى كەڭەس. ايت كۇنىنە ەكى-ءۇش كۇن قالعاندا, ءتىپتى ءبىر اپتا قالعاندا ازىق-ت ۇلىك ءتىزىمىن جاساۋدى باستاڭىز. بۇل جاقسى. دەگەنمەن, ەڭ باستىسى اسپازدىق شابىتىمىز شەگىنەن شىعىپ كەتپەۋىن قاداعالاعان ءجون.
8. كەشىرىم سۇراۋ
ەندى جان دۇنيەمىز جايلى ءسوز قوزعايىق. رامازان بويى كەشىرىم سۇراۋىم كەرەك, تۋىستارمەن قارىم-قاتىناستى جاقسارتۋ كەرەك, وتباسىلىق ومىرىمە جىلۋلىقتى قايتارۋىم كەرەك دەپ ويلاپ جۇرگەن بولارسىز. قاسيەتتى ايدىڭ سوڭعى ون كۇنى وسى ويلاردىڭ جۇزەگە اسۋىنا تاپتىرمايتىن ءسات. اتا-اناڭىزدان, جولداسىڭىزدان, اعا-باۋىر, تانىستارىڭىزدان, جاراتۋشىدان كەشىرىم سۇراڭىز. ءوزىڭىز دە ءسىزدى اشىق ءارى جاسىرىن تۇردە رەنجىتكەن جاندار بولسا, كەشىرىڭىز.
9. ماقساتتاردى جۇزەگە اسىرۋ
رامازان ايىنىڭ باسىندا العا ماقسات قويعانىڭىز بەلگىلى: قۇران وقۋدى باستاۋ, ءناپىل نامازدار وقۋ, ۋادەگە بەرىك بولۋ, كۇندە اتا-اناڭىزعا حابارلاسۋ جانە تاعى باسقا. رامازان ايىندا ماقساتىڭىزعا جەتۋدىڭ قادامىن جاساماعان بولساڭىز, قاسيەتتى ايدىڭ بەرەكەتى ءبىزدى تاستاپ كەتپەي تۇرىپ, سوڭعى ون كۇنىندە باستاڭىز. ءبىر قادام جاسار بولساڭىز, جاراتۋشى مارەگە جەتۋگە جاردەم بەرەدى.
10. دۇعا تىلەۋ
ەڭ سوڭعى كۇنگە دەيىن, ساعاتقا, ءتىپتى مينۋتقا دەيىن اللا تاعالادان جۇرەگىمىزدى مازالاعان ۋايىمىمىزدى جەڭىلدەت دەپ, وزىنە اپارار جولدى كورسەتۋىن, كۇنامىزدى كەشىرىپ, جاقىندارىمىزدى جانناتپەن سۇيىنشىلەۋىن سۇراۋعا ءتيىسپىز.
