جارىسقا بارلىعى 680 سپورتشى قاتىستى. قازاقستان قۇراماسى ءتۋرنيردى جالپى مەدالدىق ەسەپتە ءبىرىنشى ورىنمەن اياقتادى. ءبىزدىڭ جاس دزيۋدوشىلار 7 التىن, 6 كۇمىس جانە 14 قولا مەدال جەڭىپ الدى. العاشقى ۇشتىككە وزبەكستان مەن قىرعىزستان كوماندالارى دا كىردى.
جارىستىڭ جەڭىمپازدارى مەن جۇلدەگەرلەرى رەيتينگتىك ۇپايلارعا يە بولدى. حالىقارالىق دزيۋدو فەدەراتسياسىنىڭ (IJF) ەرەجەلەرى بويىنشا چەمپيوندار 100 ۇپاي, كۇمىس جۇلدەگەرلەر 60 ۇپاي, قولا جۇلدەگەرلەر 40 ۇپاي الۋ كەرەك. بۇل ۇپايلار سپورتشىلارعا الەم چەمپيوناتىنا ىرىكتەۋ جارىستارىنا قاتىسۋعا مۇمكىندىك بەرەدى.
تۋرنير اياسىندا سۋديالارعا ارنالعان حالىقارالىق سەمينار-ەمتيحان دا ءوتتى. ونىڭ قورىتىندىسى بويىنشا ەكى قازاقستاندىق مامانعا IJF كونتينەنتالدى سۋدياسى اتاعى بەرىلدى, ءبىر تورەشى حالىقارالىق سۋديا مارتەبەسىن الدى.
«دزيۋدوشىلارىمىز ازيا كۋبوگىندا ۇزدىك ناتيجە كورسەتتى. جەڭىمپازدارعا رەيتينگتىك ۇپاي بەرىلەتىن بولعاندىقتان وسال قارسىلاس بولعان جوق. جاس سپورتشىلاردىڭ جەتىستىكتەرى وتاندىق دزيۋدو كۇرەسى دۇرىس باعىتتا دامىپ جاتقانىن جانە بولاشاعى زور ەكەنىن كورسەتەدى. ەلىمىزدە اتالعان سپورت تۇرىنە ەرەكشە كوڭىل بولىنەدى. ماسەلەن, جاڭا ءارى قولجەتىمدى سپورت نىساندارىن سالىپ جاتىرمىز. سونداي-اق دزيۋدو وتە جوعارى دەڭگەيدە دامىعان فرانتسيا سياقتى ەلدەردەن جاتتىقتىرۋشى-كەڭەسشىلەردى ءجيى شاقىرامىز. سپورتشىلارىمىزدى جەتىستىكتەرىمەن قۇتتىقتايمىن جانە بولاشاقتا ولارعا بۇدان دا جوعارى ناتيجەلەر تىلەيمىن», دەدى مادەنيەت جانە سپورت ۆيتسە-ءمينيسترى سارسەن قۇرانبەك.
بيىل كادەتتەر مەن جاستار اراسىندا بەكەت ماحمۇتوۆتى ەسكە الۋعا ارنالعان دزيۋدودان ازيا كۋبوگى التىنشى مارتە وتكىزىلدى. جارىسقا 2006-2007 جانە 2003-2005 جىلعى سپورتشىلار قاتىستى.
