«اۋىلدىق اۋماقتاردا جاستار كاسىپكەرلىگىن دامىتۋعا جاردەمدەسۋ» گرانتتىق جوباسىن «قازاقستاننىڭ ەكولوگيالىق قورى» قوعامدىق قورى ىسكە اسىرادى. جوبا شەڭبەرىندە رەسپۋبليكانىڭ 17 وڭىرىندە جۇمىسپەن قامتۋ جانە كاسىپكەرلىكتى, قوعامداستىقتى دامىتۋ باعىتىنداعى مەملەكەتتىك قولداۋ شارالارىنا ارنالعان اقپاراتتىق بۇرىشتار مەن اقپاراتتىق رەسۋرس قۇرىلاتىن بولادى.
ء«بىز اۋىل جاستارى اراسىنداعى الەۋمەتتىك كاسىپكەرلەردىڭ ىسكەرلىك بەلسەندىلىگىن ارتتىرۋعا بار كۇش-جىگەرىمىزدى جۇمساۋعا نيەتتىمىز. بۇل اۋىلدارداعى تابىستى الەۋمەتتىك تاجىريبەلەردى انىقتاۋعا جانە ولاردى رەسپۋبليكالىق دەڭگەيگە شىعارۋعا مۇمكىندىك بەرەدى.
جوبانى ىسكە اسىرۋ بارىسىندا ەلىمىزدىڭ بارلىق وڭىرلەرىندە ءبىز كاسىپكەرلىكتى دامىتۋدى مەملەكەتتىك جانە جەكە قولداۋ شارالارى تۇسىندىرىلەتىن بۇرىشتاردى ۇيىمداستىرامىز. سونداي-اق اۋدان ورتالىقتارىندا NEET ساناتىنداعى اۋىل جاستارىنا ارنالعان كوشپەلى دارىستەر مەن سەمينارلار وتكىزۋدى جوسپارلاپ وتىرمىز. بالالاردى ەڭبەك نارىعىنداعى ترەندتەر مەن پەرسپەكتيۆالى كاسىپتەر تۋرالى حاباردار ەتەتىن بولامىز. تۇتاستاي العاندا, جوسپارىمىزدا 1600-دەن استام ادامدى قامتۋدى بار», دەپ ءتۇسىندىردى جوبا جەتەكشىسى ايگۇل ابدۋاليەۆا.
جوبا ۇيىمداستىرۋشىلارىنىڭ مالىمەتتەرىنە سۇيەنسەك, NEET ساناتىنداعى جاستاردىڭ باسىم بولىگى ۇلىتاۋ (12,7%), شىعىس قازاقستان (8,5%), قاراعاندى (9,4%), قىزىلوردا (8%) وبلىستارىندا, ماڭعىستاۋ (7,5%), تۇركىستان (7,3%), اقمولا (5,6%), قوستاناي وبلىستارىندا تۇرادى.
ايتا كەتەيىك, «اۋىلدىق اۋماقتاردا جاستار كاسىپكەرلىگىن دامىتۋعا جاردەمدەسۋ» جوباسى قر اقپارات جانە قوعامدىق دامۋ مينيسترلىگىنىڭ قولداۋىمەن 2024 جىلدىڭ سوڭىنا دەيىن ىسكە اسىرىلماق.
