استانا اۋەجايىنداعى جەلىلىك پوليتسيا ءبولىمىنىڭ قىزمەتكەرلەرى پاترۋلدەۋ بارىسىندا №1 تەرمينالدا ەلوردانىڭ 37 جاستاعى تۇرعىنىن انىقتادى. ول اۋەجايدان شىعا بەرىستە جولاۋشىلاردىڭ مازاسىن الىپ, تاكسي قىزمەتىن ۇسىنىپ, ءتارتىپ ساقشىلارىنىڭ ەسكەرتۋلەرىنە قۇلاق اسپاعان. سونىمەن قاتار ەر ادام پوليتسيا بولمەسىنە جەتكىزۋ كەزىندە پوليتسەيلەردىڭ زاڭدى تالاپتارىنا باعىنباعان.
وعان قاتىستى قر اقبتك-ءنىڭ 449-بابىنىڭ 1-بولىگى (قوعامدىق ورىنداردا ءتيىسۋ) جانە 667-بابى 1-بولىگى (قۇقىق قورعاۋ ورگانى نەمەسە ارناۋلى مەملەكەتتىك ورگان, اسكەري پوليتسيا ورگانى, مەملەكەتتىك فەلدەگەرلىك قىزمەت قىزمەتكەرىنىڭ (اسكەري قىزمەتشىسىنىڭ), سوت پريستاۆىنىڭ, سوت ورىنداۋشىسىنىڭ زاڭدى وكىمىنە نەمەسە تالابىنا باعىنباۋ) بويىنشا اكىمشىلىك حاتتامالار تولتىرىلدى. استانا قالاسىنىڭ مامانداندىرىلعان اۋدانارالىق اكىمشىلىك سوتىنىڭ شەشىمىمەن قۇقىق بۇزۋشى ەكى تاۋلىككە قاماۋعا الىندى.
سونداي-اق 2 ساۋىردە باسقا ءبىر زاڭسىز تاكسي جۇرگىزۋشىسى استانا اۋەجايىنداعى پوليتسيا قىزمەتكەرلەرىنىڭ زاڭدى تالابىنا باعىنباي, اكىمشىلىك جاۋاپكەرشىلىككە تارتىلدى.
