– ياروسلاۆا, الداعى ماتچتىڭ ماڭىزدىلىعى سونداي, قازاقستان قۇراماسى جەڭىسكە جەتكەن جاعدايدا ءوز تاريحىندا ەكىنشى رەت كوماندالىق الەم چەمپيوناتىنىڭ فينالدىق كەزەڭىنە جولداما الادى. ارينە, ماتچ ءوز الاڭىمىزدا وتەتىندىكتەن, قازاقستان قۇراماسىنىڭ جەڭىسكە جەتۋ مۇمكىندىگى كوبىرەك ەكەنى كۇمانسىز. دەگەنمەن قارسىلاسقا جوعارىدان قاراۋعا دا بولمايتىن شىعار.
– ءيا, ارينە, قاي قارسىلاس تا ءوز الدىنا ۇلكەن ماقسات قويادى. سوندىقتان جاۋاپتى ساتتە قاپى قالماۋ كىم-كىم ءۇشىن دە وتە ماڭىزدى. سول سەبەپتى ءبىز استانادا ويىن باستالماستان ءبىر اپتا بۇرىن جينالۋدى كوزدەپ وتىرمىز. ورتالىق كورتتا توپىراق توسەلدى, سپورت كەشەنى ماتچقا تولىق دايىن. بىزدە كورتقا ەرتەرەك بەيىمدەلىپ, جاقسىلاپ دايىندالۋعا مۇمكىندىك بولادى.
– الداعى باسەكەگە ويىنشىلار قانداي جاعدايدا كەلگەلى وتىر؟
– وزدەرىڭىز بىلەتىندەي, قازىرگى تاڭدا تەننيسشىلەرىمىزدىڭ بارلىعى ءوز بابىندا. ماۋسىمدى تابىستى باستاپ, اۋستراليا اشىق چەمپيوناتىنىڭ فينالىنا دەيىن جەتىپ, ينديان-ۋەللستەگى «ماستەرس» دوداسىندا جەڭىس تۇعىرىنان كورىنگەن كوماندا كوشباسشىسى ەلەنا رىباكينانىڭ اياق-الىسى تەك جانكۇيەرلەردى عانا ەمەس, ءبىزدى دە قۋانتادى. ول ماياميدە دە تابىستى ونەر كورسەتىپ, فينالعا دەيىن جەتتى. اننا دانيلينا مەن يۋليا پۋتينتسەۆا توپىراق توسەنىشىندە ادەتتەگىدەي ءتاۋىر ويناۋى كەرەك, اسىرەسە يۋليا جاپ-جاقسى ونەر كورسەتە الادى. سونداي-اق كوماندامىز جاڭارىپ جاتىر. قۇراماعا گوزال اينيتدينوۆا مەن جاستار ساپىنان جانەل رۇستەموۆانى شاقىردىق. قىزدارعا قوسالقى ويىنشى رەتىندە ارۋجان ساعىندىقوۆا دا كومەك كورسەتەدى. جانەل مەن ارۋجان – ءبىزدىڭ بولاشاعىمىز. ءبىز ولاردىڭ نەگىزگى ويىنشىلاردىڭ قاتارىنا ەرتەرەك قوسىلۋىن قالايمىز.
– پولشا تەننيسشىلەرىن قانشالىقتى زەرتتەپ ۇلگەردىڭىز؟
– پولشا – تاجىريبە مەن جاس تەننيسشىلەر شوعىرلانعان مىقتى ۇجىم. ولاردىڭ ءالسىز جانە مىقتى تۇستارىن ءالى دە زەرتتەپ, زەردەلەپ جاتىرمىز. بىلتىرعى ىرىكتەۋ كەزەڭىنىڭ جەرەبەسى ءبىز ءۇشىن ءساتتى بولىپ, ەلوردادا وتكەن ماتچتا گەرمانيا قۇراماسىن جەڭىپ, الەم چەمپيوناتىنىڭ فينالدىق كەزەڭىنە جولداما العان بولاتىنبىز. بيىل دا ىرىكتەۋ باسەكەسىن استانادا وتكىزەمىز. بۇل جولى دا تەك جەڭىس ءۇشىن ويناپ, جانكۇيەرلەرىمىزدى قۋانتۋ ءۇشىن بار كۇشىمىزدى سالامىز جانە دە جانكۇيەرلەرىمىزدىڭ ەرەكشە قولداۋىن كۇتەمىز.
– جاراقاتىنا بايلانىستى استاناعا الەمنىڭ ءبىرىنشى راكەتكاسى يگا شۆەنتەك كەلمەيتىن بولدى. بۇل قازاقستان قۇراماسى ءۇشىن قانشالىقتى ءتيىمدى بولماق؟
– قازىرگى تاڭدا يگا – تەك پولشا قۇراماسىنىڭ عانا ەمەس, الەمنىڭ ۇزدىك ويىنشىلارىنىڭ ءبىرى. ارينە, شۆەنتەك كەلگەندە ماتچ ءبىزدىڭ تەننيسشىلەرگە وڭايعا سوقپايتىنى بەلگىلى ەدى. بىراق بيللي دجين كينگ كۋبوگى كوماندالىق الەم چەمپيوناتى بولعان سوڭ, بۇل جەردە تەننيسشىلەردىڭ رەيتينگتەگى ورنى, جەكە شەبەرلىگى ماڭىزدى ءرول اتقارا بەرمەيدى. پولشا كومانداسى شۆەنتەكسىز دە مىقتى, الەمنىڭ 20-راكەتكاسى ماگدا لينەتت, جۇپتىق سىندا جاقسى وينايتىن تەننيسشىلەرى بار. پولشا قۇراماسى شۆەنتەكسىز دە قاۋىپتى, مۇنى جاقسى تۇسىنەمىز.
– ءسىز قازاقستاننىڭ ايەلدەر قۇراماسىمەن بىرگە ءبىرازدان بەرى جۇمىس ىستەپ كەلەسىز. كاپيتان رەتىندە كوڭىلىڭىز تولمايتىن تۇستار بار ما؟
– قازىر مەنىڭ بار ويىم, ماقساتىم – الداعى ماتچتا جەڭىسكە جەتىپ, قىزدارمەن بىرگە بيللي دجين كينگ كۋبوگىنىڭ فينالدىق كەزەڭىنە شىعۋ. ەڭ باستىسى, ءبىز قايدا جۇرسەك تە, قايدا ونەر كورسەتسەك تە, ەلدىڭ, جانكۇيەرلەردىڭ قولداۋىن سەزىنىپ كەلەمىز. بۇل – ۇلكەن باقىت. ەندەشە, ەل ءۇمىتىن اقتاۋدان باسقا ماقسات جوق بىزدە.
– ۋاقىت تاۋىپ, وي بولىسكەنىڭىزگە كوپ راحمەت.
اڭگىمەلەسكەن
ءالي بيتورە,
«Egemen Qazaqstan»
