وكىنىشكە قاراي, حالىقارالىق ۇيىم ۇسىنىپ وتىرعان رەيتينگتە قازاقستان بالۋاندارىنىڭ ناتيجەسى جانكۇيەرلەردىڭ كوڭىلىن كونشىتپەيدى. ويتكەنى جاڭارتىلعان رەيتينگتىڭ توپ-10 تىزىمىنە ءبىر-اق بالۋانىمىز ەنگەن. كەيىنگى ۋاقىتتا ءتاۋىر ناتيجەسىمەن كوزگە ءتۇسىپ, ۇنەمى جۇلدەگەرلەر قاتارىنان كورىنىپ جۇرگەن ءابيبا ابۋجاقىنوۆا (48 كگ) ءوز سالماعىندا بەسىنشى ساتىعا جايعاسقان. ودان كەيىنگى ۇزدىك ناتيجە ەرلەر قۇراماسىنىڭ وكىلدەرى – ماعجان شامشادين (60 كگ) مەن دانيار شامشاەۆكە (73 كگ) تيەسىلى. ەكى بالۋانىمىز دا رەيتينگتە 15-ورىندا تۇر.
ال تۇركياداعى جارىستا قازاقستان قۇراماسى ساپىنان جالعىز قولا جۇلدەنى جەڭىپ العان نۇرقانات سەرىكباەۆ الەمدىك رەيتينگتە 15 ساتى جوعارىلاپ, 60 كيلو سالماق دارەجەسىندە 36-ورىنعا كوتەرىلدى. وزگە سالماقتاعى بالۋاندارىمىزدىڭ رەيتينگىنە توقتالار بولسا, عۇسمان قىرعىزباەۆ (66 كگ) – 24, ابىلايحان جۇبانازار (81 كگ) – 22, ديدار حامزا (90 كگ) – 24, نۇرلىحان شارحان (100 كگ) – 24, ءادىل ورازباەۆ 41-ورىندا كەلەدى.
