بۇل تۋرالى قوناەۆ قالاسىندا وتكەن «Alatau hike» حالىقارالىق تۋريستىك فورۋمىندا باياندالدى. الماتى وبلىسىنىڭ تۋريستىك الەۋەتىن حالىقارالىق نارىقتا ىلگەرىلەتۋ, ەلدەر اراسىنداعى تۋريستىك الماسۋدى ارتتىرۋ, شەتەلدىك ارىپتەستەرمەن بايلانىستى كەڭەيتۋ جانە نىعايتۋدى ماقسات ەتكەن شاراعا ءباا, يتاليا, ۇلىبريتانيا, نيدەرلاند, رەسەي, ازەربايجان مەن قاتار ەلدەرىنەن كەلگەن شەتەلدىك ساراپشىلار قاتىستى. فورۋم قوناقتارىنا اقپاراتتىق تۋر ۇيىمداستىرىلىپ, ولار ءوڭىردىڭ ماقتانىشىنا اينالعان «شارىن», «كولساي كولدەرى» ۇلتتىق ساياباقتارى مەن شونجىنىڭ ىستىق سۋلارىنىڭ عاجايىپتارىن كورىپ, اسەم تابيعاتىن تاماشالادى. سونىمەن قاتار قوناەۆ قالاسىنىڭ تۋريستىك الەۋەتىمەن تانىستى.
بۇدان كەيىن قوناەۆ قالالىق مادەنيەت ۇيىندە وبلىستىڭ تۋريستىك الەۋەتىن پاش ەتەتىن جانە وسى سالادا جۇزەگە اسىپ جاتقان يگى باستامالار جايىنداعى پرومو-بەينە ۇزىكتەن باستالعان القالى جيىن ءوتتى.
– الماتى وبلىسى – ەلىمىزدەگى تۋريستىك سالانىڭ كوشباسشىسى. قازاقستاننىڭ ۇزدىك بەستىگىنە كىرەدى. بۇگىنگى تاڭدا شەتەلدىك تۋريستەر ءۇشىن ەڭ قولايلى ءارى دايىن باعىت بولىپ ەسەپتەلەدى. وبلىستىڭ تۋريستىك الەۋەتى ءوزىنىڭ الۋان ءتۇرلى تابيعاتىمەن, قۇمدى شولدەردەن باستاپ قارلى شىڭدارعا دەيىن جالعاسادى. ونىڭ ىشىندە ۇلتتىق پاركتەر مەن تاريحي جەرلەر بار, دەدى حالىقارالىق فورۋمدا ءسوز العان الماتى وبلىستىق تۋريزم باسقارماسىنىڭ باسشىسى ايبار تەمەنوۆ.
باسقوسۋدا تۋريزم ساباقتاستىعى مەن جاڭاشىلدىعى, تۋريستىك مادەنيەتتى قالىپتاستىرۋ, وڭىردە تۋريزم سالاسىن دامىتۋ, ينۆەستيتسيانىڭ تيىمدىلىگى, كادر ماسەلەسى توڭىرەگىندە اۋقىمدى ماسەلەلەر تالقىلاندى. نەگىزگى تاقىرىپتاردىڭ ءبىرى – وبلىس ورتالىعى قوناەۆ قالاسىنداعى ەلىمىزدىڭ ەڭ ءىرى سۋ قويمالارىنىڭ قاتارىنداعى قاپشاعايدىڭ تۋريستىك الەۋەتىن كوتەرۋ تۋرالى وي ورتاعا سالىندى. سونداي-اق وتكەن جىلى قاپشاعايعا 1 ملن-نان اسا دەمالۋشى كەلگەنى جانە ءتۋريزمدى دامىتۋدىڭ كەشەندى باعدارلاماسى بويىنشا جاعالاۋ كەڭەيتىلەتىنى تىلگە تيەك بولدى.
– الەمنىڭ ءبىراز ەلىن ارالادىم. كوپ جەردەگى نەگىزگى ماسەلە – تاريحي ورىندارعا, تۋريستىك نىساندارعا جەتۋ ماسەلەسى. ياعني جولداردى جوندەۋ كەرەك دەگەن ءسوز. ودان كەيىن تۋريزم سالاسىندا جۇمىس ىستەيتىن ماماندار مىندەتتى تۇردە حالىقارالىق تىلدەردى مەڭگەرگەنى ءجون, دەگەن انگليانىڭ «Avrupa Media Group» جوباسىنىڭ باسشىسى ۆاتان وز شارىن شاتقالى مەن كولساي كولىن حالىقارالىق تۋريزم ءۇشىن وتە ماڭىزدى نىسان سانايتىنىن ايتتى.
الماتى وبلىسى
