سۋرەتتەردى تۇسىرگەندەر ا.دۇيسەنباەۆ, ە.ۇكىباەۆ
جالپى وتىرىستى ءماجىلىس توراعاسى ەرلان قوشانوۆ اشىپ, جيىندا جالعىز ماسەلە قارالاتىنىن جەتكىزدى. ياعني دەپۋتاتتار پرەزيدەنت ق.توقاەۆ ۇسىنعان پرەمەر-ءمينيستردى تاعايىنداۋعا نە كەلىسىم بەرەدى, نە كەلىسىم بەرمەيدى.
«بۇگىنگى ءبىزدىڭ جالپى وتىرىسىمىزعا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ قاتىسىپ وتىر. كونستيتۋتسيانىڭ 44-بابى 3-تارماقشاسىنا سايكەس, مەملەكەت باسشىسى ماجىلىستەگى ساياسي پارتيالارمەن كونسۋلتاتسيا وتكىزىپ, پالاتانىڭ كەلىسىمىن الۋ ءۇشىن پرەمەر-ءمينيستردىڭ كانديداتۋراسىن ەنگىزەدى», دەدى پالاتا توراعاسى ەرلان قوشانوۆ.
ۇكىمەتتىڭ ستراتەگيالىق باعدارى
بۇدان كەيىن پرەزيدەنت ق.توقاەۆ ءسوز الىپ, پارلامەنت ءماجىلىسىنىڭ جاڭا قۇرامى سايلانۋىنا بايلانىستى ۇكىمەت ءوز وكىلەتتىگىن توقتاتقانىن ايتتى. سونداي-اق ۇكىمەتتىڭ اتقارعان جۇمىسىنا قىسقاشا توقتالىپ, شۇعىل شارالاردىڭ ناتيجەسىندە ەل ەكونوميكاسى 3,2 پايىزعا وسكەنىن, حالىقتىڭ الدىنداعى الەۋمەتتىك مىندەتتەمەلەر ۋاقتىلى جانە تولىعىمەن ورىندالعانىن جەتكىزدى.
ء«بىز سوڭعى جىلدارى جاھاندىق جانە جالپىۇلتتىق اۋقىمداعى كوپتەگەن قيىندىقتى باستان وتكەردىك. ۇكىمەت كۇردەلى كەزەڭدەگى جاڭا تالاپقا تەز بەيىمدەلدى. سول ارقىلى ەكونوميكانىڭ توقىراۋىنا جول بەرگەن جوق. جۇمىس ورىندارىن قىسقارتپاي, ساقتاپ قالدى. شۇعىل شارالاردىڭ ناتيجەسىندە ەل ەكونوميكاسى 3,2 پايىزعا ءوستى. حالىقتىڭ الدىنداعى الەۋمەتتىك مىندەتتەمەلەر ۋاقتىلى جانە تولىعىمەن ورىندالدى. مۇنىڭ بارىنە بيلىك تارماقتارىنىڭ بىرلەسىپ جۇمىس ىستەۋىنىڭ ارقاسىندا قول جەتكىزدىك. وسى ىنتىماقتاستىقتى نىعايتا بەرۋ كەرەك», دەدى ق.توقاەۆ.
وسى ورايدا, مەملەكەت باسشىسى ۇكىمەت پەن پارلامەنت ەكونوميكانى دامىتىپ, حالىقتىڭ ءال-اۋقاتىن ارتتىرۋ ءۇشىن بارلىق كۇش-جىگەرىن جۇمىلدىرۋعا ءتيىس ەكەنىنە ەكپىن قويدى. ەلىمىزدە از ۋاقىتتىڭ ىشىندە اۋقىمدى ساياسي رەفورما جۇرگىزىلگەنىن اتاپ ءوتتى. تۇبەگەيلى وزگەرىستەر ەلىمىزدىڭ جاڭا داۋىرگە قادام باسۋىنا جول اشقانىن جەتكىزدى.
«بۇل جۇمىس جالعاسا بەرەدى. بىراق ەكونوميكالىق وزگەرىستەر ساياسي جاڭعىرۋ ۇدەرىسىنەن كەنجە قالماۋى كەرەك. سوندىقتان ۇكىمەت الەۋمەتتىك-ەكونوميكالىق رەفورمالاردى باتىل جۇزەگە اسىرۋعا ءتيىس. بۇل – وتە جاۋاپتى جۇمىس. ازاماتتارىمىز ۇكىمەتكە زور ءۇمىت ارتادى, جوعارى تالاپ قويادى. ەل سەنىمىن اقتاۋ – بارىمىزگە سىن. مەن كەشە پارلامەنت سەسسياسىنىڭ اشىلۋىندا ناقتى مىندەتتەرگە توقتالدىم. ۇكىمەت ستراتەگيالىق باعدارىمىزدى جۇزەگە اسىرا وتىرىپ, مىناداي ماسەلەلەرگە باسا ءمان بەرۋگە ءتيىس.
ءبىرىنشى. تۇراقتى ەكونوميكالىق ءوسىمنىڭ جىلىنا كەم دەگەندە 4 پايىز بولۋىن قامتاماسىز ەتۋ كەرەك. سوندىقتان ەكونوميكانىڭ دامۋ ۇلگىسىن تۇبەگەيلى وزگەرتۋىمىز كەرەك. ول ءۇشىن ءارتاراپتاندىرۋ جۇمىسىن جۇيەلى جۇرگىزىپ, نارىق قاعيدالارىن نىعايتۋ ماڭىزدى. تۇپكى ماقساتىمىز – جوعارى تەحنولوگياعا نەگىزدەلگەن, ءوزىن-ءوزى تولىق قامتاماسىز ەتەتىن جانە باسەكەگە قابىلەتتى ەكونوميكا قۇرۋ», دەدى ق.توقاەۆ.
سونداي-اق پرەزيدەنت ەلىمىزدى باستى وڭىرلىك ينۆەستيتسيالىق حاب رەتىندەگى ۇستانىمىن كۇشەيتۋدى تاپسىردى. كەيىنگى جىلدارى مونوپولياسىزداندىرۋ جانە شىنايى باسەكەلەستىك ورتا قۇرۋ اياسىندا بايىپتى جۇمىس جۇرگىزىلگەنىنە نازار اۋداردى. مەملەكەت باسشىسىنىڭ ايتۋىنشا, قول جەتكىزگەن جەتىستىكپەن تۇرىپ قالۋعا بولمايدى. ۇكىمەتتەن ەكونوميكالىق ەركىندىكتى ودان ءارى كەڭەيتۋ جانە مەملەكەتتىك نارىقتىق ۇدەرىستەرگە ىقپالى دەڭگەيىن تومەندەتۋ ءۇشىن جۇيەلى ءىس-شارالار تالاپ ەتىلەدى. بۇل ادىستەردى جۇزەگە اسىرۋ ەلىمىزدىڭ ينستيتۋتسونالدى كەمەلەندەنۋىن, ونىڭ ءتۇرلى ىشكى جانە سىرتقى كۇيزەلىستەرگە تۇراقتىلىعىن ارتتىرۋعا مۇمكىندىك بەرمەك.
«ەكىنشى, ينفلياتسيانى تەجەۋ قاجەت. بيىل ونى كەمىندە ەكى ەسەگە تومەندەتۋ كەرەك. ەڭ الدىمەن, ازىق-ت ۇلىكتىڭ باعاسىن رەتتەۋ اسا ماڭىزدى. سول سەبەپتى اگروونەركاسىپ كەشەنىن جانە ساۋدا-ساتتىقتى دامىتۋ – نەگىزگى باسىمدىقتىڭ ءبىرى. ىشكى نارىقتى ءوز ونىمدەرىمىزبەن بارىنشا قامتاماسىز ەتۋ قاجەت. سونداي-اق اۋىل شارۋاشىلىعى ونىمدەرىنىڭ كولەمىن جانە ونىڭ قوسىمشا قۇنىن ارتتىرۋ كەرەك.
ءۇشىنشى, ينفراقۇرىلىمدى دامىتۋ قاجەت. ەنەرگەتيكا, سۋ جانە كولىك قاۋىپسىزدىگىن قامتاماسىز ەتۋگە باعىتتالعان كەشەندى شارالار قابىلدانۋعا ءتيىس. ەنەرگەتيكالىق اكتيۆتەردى جاڭعىرتۋعا جاقىن ارادا جاڭا ينۆەستيتسيا تارتۋ كەرەك. بۇل جۇمىستى ء«تاريفتى ينۆەستيتسياعا ايىرباستاۋ» باعدارلاماسى ارقىلى ىسكە اسىرۋعا بولادى.
قازىر تاۋار گازىنىڭ تاپشىلىعى كۇشەيىپ بارادى. ۇكىمەت ەلىمىزدىڭ گاز وڭدەۋ قۋاتىن ارتتىرۋ ءۇشىن جاڭا جوبالاردى جۇزەگە اسىرۋعا ءتيىس. سونىمەن بىرگە 25 سۋ قويماسىن سالىپ, سۋدى بارىنشا ۇنەمدەۋ كەرەك. قازاقستان تۇراقتى دامۋ ءۇشىن ازيا مەن ەۋروپانى جالعايتىن الەمدىك كولىك حابىنا اينالۋى قاجەت. بۇعان دەيىن قولعا الىنعان كولىك جانە لوگيستيكا جوبالارىن تۇگەل ۋاقتىلى ءبىتىرۋ وتە ماڭىزدى», دەدى ق.توقاەۆ.
حالىقتىڭ سەنىمىن ارتتىرۋ ماڭىزدى
ۇكىمەت باسىمدىق بەرۋگە ءتيىس ءتورتىنشى ماسەلە – اۋماقتىق ساياسات جان-جاقتى جۇرگىزۋ. پرەزيدەنت ايماقتار قۋاتتى بولسا, بۇكىل مەملەكەت ءوسىپ-وركەندەيتىنىن اتاپ ءوتتى. سوندىقتان ەلىمىزدىڭ اكىمشىلىك-اۋماقتىق قۇرىلىمى وڭتايلى ءارى ءتيىمدى بولۋى كەرەك. بۇل – وتە ماڭىزدى ماسەلە.
«بىلتىر جاڭادان اباي, ۇلىتاۋ جانە جەتىسۋ وبلىستارى قۇرىلعانىن بىلەسىزدەر. بۇل قادام وسى ايماقتاردى تىڭ قارقىنمەن دامىتۋعا جول اشتى. ءبىز ايماقتار اراسىنداعى ەكونوميكالىق تەڭسىزدىكتى ازايتۋ ءۇشىن ءتيىمدى شارالار قابىلداۋىمىز كەرەك. وسى رەتتە ۇكىمەت اكىمدەرمەن بىرلەسىپ, ءاربىر وبلىستىڭ الەۋەتىن ارتتىرۋعا ءتيىس.
ءار ايماقتىڭ وزىنە ءتان مۇمكىندىگىن تولىق پايدالانۋ قاجەت. مەن مۇنى بىرنەشە رەت ايتتىم. سونداي-اق اگلومەراتسيالاردى دامىتۋ ماسەلەسىنە باسا نازار اۋدارعان ءجون. ۇكىمەت وسىعان قاتىستى زاڭنىڭ مۇلتىكسىز ورىندالۋىن جانە جوسپارلانعان جۇمىستىڭ ءتيىمدى اتقارىلۋىن قامتاماسىز ەتۋگە ءتيىس», دەدى ق.توقاەۆ.
بۇدان بولەك, ادام كاپيتالىنىڭ ساپاسىن دايەكتى جانە جۇيەلى تۇردە ارتتىرۋ قاجەت. پرەزيدەنت «جايلى مەكتەپ» جوباسىن ءتيىمدى ىسكە اسىرۋدى قامتاماسىز ەتىپ, جوو بازاسىندا اكادەميالىق ارتىقشىلىق ورتالىقتارىن قۇرۋدى جالعاستىرۋدى تاپسىردى. مەملەكەت باسشىسى ەلدەگى عىلىمنىڭ كەشەندى دامۋىن جەكە باقىلاۋىنا الاتىنىن جەتكىزدى. سونداي-اق دەنساۋلىق ساقتاۋدى جاڭا ساپالى دەڭگەيگە شىعارۋ قاجەت ەكەنىنە توقتالدى. مەملەكەت باسشىسىنىڭ ايتۋىنشا, الەۋمەتتىك مەديتسينالىق ساقتاندىرۋ جۇيەسىنىڭ تيىمدىلىگىن ارتتىرۋ كەرەك. مۇندا تسيفرلىق شەشىمدەردىڭ كومەگىمەن شىعىنداردى باقىلاۋدى كۇشەيتۋ وتە ماڭىزدى بولماق.
«جالپى, تسيفرلاندىرۋ ەكونوميكانىڭ بارلىق سالاسىن قامتىپ, ازاماتتارىمىزدىڭ ءومىرىنىڭ بارلىق سالاسىنا ەنۋگە ءتيىس. ول ءۇشىن اقپاراتتىق تەحنولوگيالار نارىعىن بارىنشا ىرىقتاندىرۋ قاجەت. ەلىمىزدىڭ الدىندا وڭىرلىك تسيفرلىق حاب مارتەبەسىن نىعايتۋ بويىنشا ستراتەگيالىق مىندەت تۇر. وسى باعىتتا تابىستى بولۋ ءۇشىن «تسيفرلىق نومادتاردىڭ» سەرپىندى يدەيالارى مەن شىعارماشىلىق ەنەرگياسىن پايدالانۋ قاجەت. ازاماتتاردى الەۋمەتتىك قورعاۋدىڭ سەنىمدى جۇيەسىن قۇرۋ دا ماڭىزدى. ول ەكونوميكالىق كۇيزەلىستەرگە جانە ادامداردىڭ قاجەتتىلىكتەرىنىڭ وزگەرۋىنە جەدەل جاۋاپ بەرۋى كەرەك.
الەۋمەتتىك قورعاۋدىڭ ەڭ جاقسى شاراسى – جاڭا جۇمىس ورىندارىن قۇرۋ, قايتا وقىتۋ جانە بيزنەس باستامالاردى قولداۋ ارقىلى حالىقتى جۇمىسپەن قامتۋ. بۇل رەتتە ازاماتتاردى ءتيىستى الەۋمەتتىك كەپىلدىكسىز قالدىراتىن كولەڭكەلى جۇمىسپەن قامتۋدىڭ تومەندەۋى ءتۇيىندى مانگە يە. بەلگىلەنگەن تاسىلدەر الەۋمەتتىك ادىلەتتىكتى نىعايتۋعا, بارشاعا بىردەي مۇمكىندىكتەر مەملەكەتىن قۇرۋعا جاردەمدەسەدى», دەدى ق.توقاەۆ.
سونىمەن قاتار مەملەكەتتىك اپپاراتتىڭ جۇمىسىن قايتا قاراپ, ونى جاڭعىرتۋدىڭ ماڭىزىنا توقتالدى. مۇنى ورىنداماي كوزدەگەن ماقساتقا جەتۋ قيىنعا سوعادى. ۇكىمەت اكىمشىلىك رەفورمانى جالعاستىرىپ, بيۋروكراتيانى بارىنشا ازايتۋى كەرەك ەكەنىن اتاپ ءوتتى.
«مەملەكەتتىك ورگانداردىڭ تاپسىرمانى ۋاقتىلى ءارى ساپالى ورىنداۋى جەتكىلىكسىز. ەكونوميكانىڭ ءوسىمىن قامتاماسىز ەتەتىن تىڭ باستامالار كوتەرىپ, جاڭا يدەيالار ۇسىنىپ وتىرۋ قاجەت. مينيسترلەر مەن اكىمدەردىڭ قىزمەتىن باعالاعان كەزدە ولاردىڭ وسى باعىتتاعى جۇمىسى باستى نازاردا بولادى. سونداي-اق قوعامنىڭ مەملەكەتكە دەگەن سەنىمىن ارتتىرۋ – وتە ماڭىزدى مىندەت. بيلىكتىڭ وزگەرىس جاساۋعا ىقىلاستى جانە دايىن ەكەنىن جۇرت كورۋى كەرەك. ءبىر سوزبەن ايتقاندا, شىن مانىندە «حالىق ۇنىنە قۇلاق اساتىن مەملەكەت» قالىپتاستىرۋ قاجەت. ەل باسقارۋ جانە شەشىم قابىلداۋ ىسىنە ازاماتتاردى بارىنشا تارتقان ءجون.
مەن سايلاۋدا جەڭىسكە جەتكەن پارتيا مەملەكەت باسشىسىنا پرەمەر-ءمينيستردىڭ كانديداتۋراسىن ۇسىنا الاتىنىن اتاپ ءوتتىم. بۇگىن مەن ءماجىلىس توراعاسى ەرلان جاقان ۇلى قوشانوۆتى قابىلدادىم. جاڭا عانا فراكتسيا جەتەكشىلەرىمەن ارنايى كەزدەستىم. ۇكىمەت باسشىسى لاۋازىمىنا «Amanat» پارتياسى ۇسىنعان كانديداتتى تالقىلادىق. ورتاق مامىلەگە كەلدىك.
اتا زاڭىمىزدىڭ 44-بابىنا سايكەس, پرەمەر-مينيستر لاۋازىمىنا ءاليحان اسحان ۇلى سمايىلوۆتىڭ كانديداتۋراسىن ۇسىنامىن. بارشاڭىز بۇل ازاماتتى جاقسى تانيسىزدار. بىلىكتى ءارى تاجىريبەلى مامان. جۇمىسقا ادال, ەڭبەكقور ادام. ول ۇكىمەتتىڭ الدىندا تۇرعان مىندەتتەردى جاقسى بىلەدى. وعان جاڭا ۇكىمەتتىڭ تىزگىنىن سەنىپ تاپسىرۋعا بولادى دەپ سانايمىن. كونستيتۋتسيانىڭ 56-بابىنا سايكەس پرەمەر-مينيستر لاۋازىمىنا ءاليحان اسحان ۇلى سمايىلوۆتى تاعايىنداۋ ءۇشىن ءماجىلىستىڭ كەلىسىم بەرۋىن سۇرايمىن», دەدى ق.توقاەۆ.
جسدپ قولدامادى
بۇدان كەيىن ءماجىلىس دەپۋتاتتارى پرەزيدەنتتىڭ ۇسىنىسىنا قاتىستى پىكىر ءبىلدىردى. العاش بولىپ پىكىر بىلدىرگەن «Amanat» پارتياسى فراكتسياسىنىڭ جەتەكشىسى ەلنۇر بەيسەنباەۆ ۇسىنىستى قولدايتىنىن جەتكىزدى.
«قازاقستان دەموكراتيالىق وزگەرىستەردى بىرتىندەپ دايەكتى جانە جۇيەلى تۇردە ىسكە اسىرىپ كەلەدى. مەملەكەت باسشىسىنىڭ باستاماسىمەن ەلىمىزدەگى ساياسي جۇيەنى قايتا جاڭعىرتۋ ۇدەرىسى كونستيتۋتسيالىق رەفورمادان ناقتى باستاۋ الدى. ەندىگى ماڭىزدى قادام – ۇكىمەتتىڭ جاڭا قۇرامىن جاساقتاۋ. اتالعان وزگەرىستەر پارتيا مەن ازاماتتىق قوعامعا سەنىمدى ارتتىرادى. «Amanat» سايلاۋدا كوپشىلىكتىڭ داۋسىنا يە بولىپ, جەڭىسە جەتكەن پارتيا رەتىندە پرەمەر-مينيستر لاۋازىمىنا كانديداتۋرا ۇسىندى. مۇنداي تاجىريبە پارلامەنتتىڭ ءرولىن عانا كۇشەيتىپ قويماي, ساياسي پارتيالاردىڭ جاۋاپكەرشىلىگىن ارتتىرادى», دەدى ە.بەيسەنباەۆ.
فراكتسيا جەتەكشىسىنىڭ ايتۋىنشا, ۇكىمەتتىڭ جۇمىسىن «Amanat» ءجىتى باقىلاۋعا الىپ, ونىڭ ءاربىر شەشىمىن مايشاممەن قاراماق. ءتىپتى قاجەت جاعدايدا پارتيا ءتيىستى شارالار قولدانۋعا دەيىن بارۋعا دايىن ەكەنىن مالىمدەدى.
«سوڭعى ءبىر جىلدا ۇكىمەتكە قوعام تاراپىنان ايتىلعان سىن از بولعان جوق. بىراق مينيسترلەر كابينەتىنىڭ نەبارى ءبىر-اق جىل جۇمىس ىستەگەنىن ەسكەرۋىمىز قاجەت. ءبىر جىل – ۇكىمەتتىڭ جۇمىسىن وبەكتيۆتى باعالاۋ ءۇشىن تىم قىسقا ۋاقىت. وعان قوسا سمايىلوۆتىڭ كابينەتى كۇردەلى گەوساياسي جاعدايدا جۇمىس ىستەدى. سىرتقى ساياساتتاعى سانكتسيالاردىڭ كۇشەيۋى, الەمدىك ينفلياتسيانىڭ تۇراقتاماۋى ءبىزدىڭ دە ەكونوميكامىزعا كەرى اسەرىن تيگىزىپ وتىر. بۇدان بولەك, 2 جىلعا جۋىق ۋاقىت ۇكىمەت پاندەميانىڭ سالدارىمەن كۇرەستى. ەكىنشىدەن, ساياسي باسشىلاردىڭ ءجيى اۋىس-ءتۇيىسى رەفورمالاردىڭ قارقىنىنىڭ تومەندەۋىنە اكەپ سوقتىرادى. قازىر بىزگە مۇنداي قادامعا بارۋدىڭ قاجەتى جوق دەپ ەسەپتەيمىن», دەدى ە.بەيسەنباەۆ.
تومەنگى پالاتا فراكتسيالارىنىڭ كوپشىلىگى ءاليحان سمايىلوۆتىڭ كانديداتۋراسىن قولداعانىمەن, جالپىۇلتتىق سوتسيال-دەموكراتيالىق پارتياسى وعان قارسى شىقتى.
«بۇگىنگى كەزدەسۋدە كوتەرىلىپ وتىرعان ماسەلە وتە ماڭىزدى, تاعدىرشەشتى دەسەك تە بولادى. ءسوز جوق, ءسىزدىڭ 30 جىل بويى ابدەن بىلىققا باتقان جۇيەنى وزگەرتەمىن دەگەن قۇلشىنىسىڭىزدى كورىپ وتىرمىز. بىراق ونى ەرتەڭ جۇزەگە اسىراتىن مەملەكەتتىك اپپارات, ونىڭ ىشىندە ۇكىمەت ەكەنى انىق. كۇنى كەشە ءوزىڭىز دە بولاشاق ۇكىمەتتىڭ الدىندا بۇرىن-سوڭدى بولماعان اۋقىمدى مىندەت قويدىڭىز. ءبىز 20 جىل بيلىككە وپپوزيتسيادا ءجۇرىپ, حالقىمىزدىڭ ءال-اۋقاتىنىڭ تومەندەۋىنە ۇكىمەتتىڭ ءالسىز الەۋمەتتىك ساياساتى كىنالى ەكەنىنە كوزىمىز جەتتى. ال ەندى بۇگىن اماناتتىقتار ءوز كوپشىلىگىن كورسەتىپ, ۇسىنىس بەرىپ وتىر. ارينە, پارلامەنتتىك وپپوزيتسيا رەتىندە ءبىز ۇسىنىسقا قارسىمىز», دەدى جسدپ فراكتسياسىنىڭ مۇشەسى نۇرلان اۋەسباەۆ.
«اۋىل» پارتياسى فراكتسياسىنىڭ جەتەكشىسى اناس باققوجاەۆ اڭگىمەسىن سەنىم بىلدىرگەن حالىققا العىس ايتۋدان باستادى. سودان كەيىن ۇكىمەتتىڭ نەبارى ءبىر جىل عانا جۇمىس ىستەگەنىنە توقتالدى. وعان ناقتى باعا بەرۋ ءۇشىن ءبىرشاما ۋاقىت كەرەك دەپ ەسەپتەيتىنىن جەتكىزدى.
«كەيبىر باستامالارى جۇزەگە اسىپ جاتسا, كەلەسىسى سوڭىنا دەيىن جەتىپ ۇلگەرگەن جوق. جالپى, ءبىزدىڭ پارتيا ۇكىمەت جۇمىسىن اۋىلدىڭ بۇگىنگى جاعدايىمەن باعالايدى. ال بۇل ماسەلەدە ۇكىمەتكە ايتار ۇسىنىسىمىز, ارتار ءۇمىتىمىز دە جەتەرلىك. سوندىقتان ءاليحان اسحان ۇلى باسقارعان مينيسترلەر كابينەتىنىڭ قىزمەتىن ورتا جولدا توقتاتىپ تاستاۋدىڭ ورنىنا, باستامالارىن سوڭىنا دەيىن جەتكىزۋ كەرەك دەپ ەسەپتەيمىز», دەدى ا.باققوجاەۆ.
ءماجىلىس دەپۋتاتتارى ۇكىمەت باسشىسى كانديداتۋراسىن تالقىلاعاننان كەيىن «قازاقستان رەسپۋبليكاسىنىڭ پرەزيدەنتىنە قازاقستان رەسپۋبليكاسى پرەمەر-ءمينيسترى لاۋازىمىنا ءاليحان اسحان ۇلى سمايىلوۆتى تاعايىنداۋعا كەلىسىم بەرىلسىن» دەگەن قاۋلى جوباسىنا داۋىس بەردى. جالپى وتىرىسقا قاتىسقان 97 دەپۋتاتتىڭ 82-ءسى ونىڭ كانديداتۋراسىن قولدادى. 7 دەپۋتات قارسى شىعىپ, 8 دەپۋتات قالىس قالدى.
باستى مىندەت – تۇرعىنداردىڭ ءال-اۋقاتىن ارتتىرۋ
بۇدان كەيىن جاڭادان تاعايىندالعان ۇكىمەت باسشىسى ءا.سمايىلوۆ ءسوز سويلەپ, سەنىم ارتقانى ءۇشىن دەپۋتاتتارعا ريزاشىلىعىن ءبىلدىردى. بۇل قىزمەتتى ۇلكەن جاۋاپكەرشىلىك دەپ سانايتىنىن جەتكىزدى. مەملەكەت باسشىسى ايقىنداپ بەرگەن ەلىمىزدىڭ الەۋمەتتىك-ەكونوميكالىق دامۋى, حالىقتىڭ ءومىر ءسۇرۋ ساپاسى مەن ءال-اۋقاتىن ودان ءارى ارتتىرۋ جونىندەگى مىندەتتەر ۇكىمەت جۇمىسىنىڭ نەگىزگى باسىمدىقتارى بولاتىنىن اتاپ ءوتتى.
«ەڭ الدىمەن, ءبىز مەملەكەت باسشىسىنىڭ سايلاۋالدى باعدارلاماسىن جانە «Amanat» پارتياسىنىڭ باعدارلاماسىن ىسكە اسىرامىز. سونىمەن بىرگە باسقا دا پارتيالار مەن دەپۋتاتتاردىڭ, بيزنەس-قاۋىمداستىقتار مەن ازاماتتاردىڭ سىندارلى ۇسىنىستارىن ەسكەرەمىز. ورتا مەرزىمدى كەزەڭدە ەكونوميكانىڭ ءوسىمىن 5 پايىزعا دەيىن جەتكىزۋ, وسى جىلدىڭ اياعىنا دەيىن ينفلياتسيانى 2 ەسە تومەندەتۋ – ءبىز ءۇشىن اسا ماڭىزدى مىندەت.
كاسىپكەرلىكتى قولداۋ جانە بيزنەس-كليماتتى جاقسارتۋ جونىندەگى كەشەندى شارالار, سونداي-اق بيزنەستىڭ تۇيتكىلدى ماسەلەلەرىن شەشۋ, حالىقتى جۇمىسپەن قامتۋ جانە ازاماتتارىمىزدىڭ ناقتى تابىسىن ءوسىرۋ – نەگىزگى باعىتتاردىڭ ءبىرى. ەكونوميكانى ارتاراپتاندىرۋعا, ىشكى نارىقتى وتاندىق تاۋارلارمەن قامتاماسىز ەتۋگە جانە قوسىلعان قۇنى جوعارى شيكىزاتتىق ەمەس تاۋارلار ءوندىرىسىن ۇلعايتۋعا باسىمدىق بەرىلەدى», دەدى ءا.سمايىلوۆ.
سونداي-اق ەل ەكونوميكاسىنا, ءبىرىنشى كەزەكتە, وڭدەۋشى سالالارعا اۋقىمدى ينۆەستيتسيالار تارتۋ بويىنشا شارالار قابىلداناتىنىن اتاپ ءوتتى. اۋىل شارۋاشىلىعىن دامىتۋ جانە ازىق-ت ۇلىك قاۋىپسىزدىگىن قامتاماسىز ەتۋ ءۇشىن كەشەندى جۇمىس اتقارىلماق. سونىمەن قاتار ەنەرگەتيكا سالاسىن دامىتۋ جانە كوممۋنالدىق ينفراقۇرىلىمدى جاڭعىرتۋ ماسەلەلەرى وتە ماڭىزدى.
«ىشكى نارىقتى جانار-جاعارمايمەن قامتاماسىز ەتۋگە ەرەكشە نازار اۋدارىلادى. «تاريف ورنىنا – ينۆەستيتسيا» باعدارلاماسىن ىسكە اسىرۋ ەلەكتر جانە كوممۋنالدىق جەلىلەردىڭ توزۋىن تومەندەتۋگە مۇمكىندىك بەرەدى. «اۋىل – ەل بەسىگى» جوباسى اياسىندا اۋىلدىق ينفراقۇرىلىمدى جاڭعىرتۋ كەڭەيتىلەدى. كولىك جانە لوگيستيكا سالاسىندا وتكىزۋ قابىلەتىن ارتتىرۋعا جانە حالىقارالىق دالىزدەردى دامىتۋعا باسىمدىق بەرىلەدى.
ءبىلىم بەرۋ جانە دەنساۋلىق ساقتاۋ سالالارىندا قىزمەتتەردىڭ تيىمدىلىگى مەن ساپاسىن جاقسارتۋ, سونىمەن قاتار تسيفرلاندىرۋدى ءارى قاراي جالعاستىرۋ جانە مەملەكەتتىك بىرىڭعاي تسيفرلىق پلاتفورمانى ەنگىزۋ ءبىزدىڭ جۇمىسىمىزدىڭ ماڭىزدى باعىتتارى بولادى. ۇكىمەتتىڭ الدىندا قويىلعان مىندەتتەردى شەشۋ ءۇشىن ءتيىستى شارالار قابىلدانادى. پارلامەنت دەپۋتاتتارىمەن ءوزارا بىرلەسىپ, ۇيلەسىمدى جانە ناتيجەلى جۇمىس ىستەيمىز دەپ سەنىم بىلدىرەمىن», دەدى ءا.سمايىلوۆ.
