قارسىلاسى بەلگىلى بولدى

ەرتەڭ، ياعني 1 ءساۋىر كۇنى وردالى 30 جاسقا تولاتىن جانىبەك ءالىمحان ۇلى 2022 جىلدىڭ 21 مامىرىندا ۇلىبري­تانيالىق دەنني ديگنۋمدى ەكىنشى راۋندتا ۇرىپ جىعىپ، ورتا سالماقتاعى WBO نۇسقاسىنىڭ «ۋاقىتشا چەمپيون» اتاعىن يەلەنگەن بولاتىن. سول جىلدىڭ تامىز ايىندا WBO چەمپيونى اتانىپ تۇرعان امەريكالىق دەمەتريۋس اندرادە وتانداسىمىزعا قارسى ءوز اتاعىن قورعاۋدان باس تارتىپ، جەرلەسىمىز جەكپە-جەكسىز-اق الەم چەمپيونى اتانعان-دى.

ال وتكەن جىلدىڭ سوڭىندا جانى­بەك وزىنە تيەسىلى التىن بەل­بەۋىن العاش رەت ءساتتى قورعادى. 12 قاراشا كۇنى اقش-تىڭ نەۆادا شتاتىندا ۇيىمداستىرىلعان جەكپە-جەك كەشىندە ءالىمحان ۇلى وزىنەن ەكى جاس كىشى انگليالىق دەنزەل بەنتليمەن جۇدىرىقتاستى. سول كەزدە ورتا سالماقتاعى الەمدىك رەيتينگتە 14-ورىندا تۇرعان بريتانيالىق بوكسشى وتانداسىمىزعا لايىقتى دەڭگەيدە قارسىلىق كورسەتكەنىن ايتا كەتكەن ءجون. 2017 جىلدان بەرى كاسىپقوي بوكستا جۇدىرىقتاسىپ كەلە جاتقان دەنزەل وسى ۋاقىت ارالىعىندا شارشى الاڭعا 19 مارتە كوتەرىلىپ، 17 جەكپە-جەگىندە جەڭىسكە جەتكەن. سونىمەن قاتار 14 قارسىلاسىن ەسىنەن تاندىرعان تاجىريبەلى بوكس­شى بولاتىن. دەسە دە، جانىبەك قارسىلاسى قانشا قارىمدى بولسا دا، 12 راۋندتىڭ قورىتىندىسى بويىنشا بەنتليدەن باسىم ءتۇستى. ءسويتىپ، جەرلەسىمىز ءبىرىن­شى رەت چەمپيوندىق بەلبەۋىن ءساتتى قورعادى.

ەندى، مىنە، ورتا سالماقتا ءاب­سو­ليۋتتى الەم چەمپيونى اتانۋدى الدىنا ماقسات ەتىپ قويعان دارىندى بوكسشىمىز بىلتىر جەڭىپ العان التىن بەلدىگىن ەكىنشى مارتە قورعاماق. جەكپە-جەك 12 مىڭ جانكۇيەرگە ارنالعان ستوكتون قالاسىنداعى «ستوكتون-ارەنا» سپورت كەشەنىندە وتەدى دەپ جوسپارلانعان.

وسى ورايدا وقىرماندارعا جانى­بەكتىڭ كەلەسى قارسىلاسى تۋرالى از-كەم مالىمەت بەرە كەتەيىك. 27 جاستاعى ستيۆەن باتلەر كانادانىڭ كۆەبەك قالاسىندا تۋىپ-وسكەن. كاسىپقوي بوكستا جۇدىرىقتاسىپ جۇرگەنىنە بيىل توعىز جىل. سول ارالىقتا ول 36 مارتە شارشى الاڭعا كوتەرىلىپ، 32 رەت جەڭىسكە جەتكەن. سونداي-اق 26 قارسىلاسىن مەرزىمىنەن بۇرىن تىزە بۇكتىرگەن. 2015 جىلدىڭ كۇزىندە امە­ري­كالىق حايمە ەررەرامەن جۇ­دىرىق­تاسىپ، تورەشىلەردىڭ شەشىمى­مەن تەڭ ءتۇستى. كەيىننەن ول 2017 جىلى وتانداسىمىز قانات يسلامنىڭ ەكس-قارسىلاسى، ءوزىنىڭ جەرلەسى برەندون كۋكتەن – جەتىنشى، اراعا ەكى جىل سالىپ 2019 جىلدىڭ جەلتوقسانىندا جاپونيادا داڭقتى بوكسشىمىز گەننادي گولوۆكيننەن جەڭىلگەن جەرگىلىكتى ريوتا مۋراتادان بەسىنشى راۋندتا تەحنيكالىق نوكاۋتپەن جەڭىلدى.

سونىمەن قاتار ستيۆەن باتلەر 2017 جىلى گولوۆكين-الۆارەس اراسىنداعى ءبىرىنشى جەكپە-جەك الدىندا مەكسيكالىق بوكسشىنىڭ سپاررينگ-سەرىكتەسى رەتىندە جۇمىس ىستەپ، «كانەلوعا» كومەكتەسكەن بولاتىن. باتلەر – كانادالىق «Eye of Tiger Managament» پروموۋتەرلىك كومپانياسىنىڭ بوكسشىسى. ءبىراز جىل بۇرىن اتالعان پروموۋتەرلىك ۇيىممەن بىرقاتار قازاقستان بوكسشىسى دا جۇمىس ىستەگەن. اتاپ ايتقاندا، ءبىرىنشى جارتىلاي ورتا سالماقتاعى باتىر جۇكەمباەۆ، جەڭىل سالماقتاعى ابىلايحان قۇسايىنوۆ، ەكىنشى ورتا سالماقتاعى نۇرزات سابيروۆ، ءبىرىنشى ورتا سالماقتاعى سادريددين احمەدوۆ سەكىلدى تانىمال بوكسشىلارىمىز اتالعان ۇيىم اياسىنداعى جەكپە-جەك كەشتەرىندە ونەر كورسەتكەن.

2021 جىلدىڭ قاڭتارىندا باتلەر مەكسيكالىق حوسە دە حەسۋس ماسياسقا دا بەسىنشى راۋندتا ەسە جىبەرىپ، جان­­كۇيەرلەرىن جەرگە قاراتتى. دە­گەن­مەن كانادالىق بوكسشى كەيىنگى ءتورت جەكپە-جەگىن جەڭىسپەن اياقتادى. ول ءوزىنىڭ ەڭ كەيىنگى كەزدەسۋىن 2022 جىل­دىڭ جەلتوقسان ايىندا كانادادا وتكىزىپ، امەريكالىق دجوشۋا كونليدى 10 راۋندقا جوسپارلانعان ايقاستا تورە­شىلەردىڭ شەشىمىمەن جەڭدى. كانا­دالىق بوكسشى قازىرگى تاڭدا WBO رەيتينگىندە التىنشى ورىندا تۇر.

جانىبەك ءالىمحان ۇلى مەن ستيۆەن باتلەر 13 مامىردا جۇدىرىقتاساتىنى رەسمي جاريالانعان سوڭ، ەكى بوكس­شى جەكپە-جەك تۋرالى العاشقى پىكىر­لەرىن ورتاعا سالدى.

«ورتا سالماقتاعى بوكسشىلاردىڭ ءبارى مەنەن قورقىپ، جەكپە-جەككە شىعۋدان باس تارتىپ وتىر، سوندىقتان ستيۆەن باتلەرگە مەنىمەن جۇدى­رىق­تاسۋعا كەلىسكەنى ءۇشىن العىسىمدى بىلدىرەمىن. مەنىڭ جاقىن اراداعى باستى ماقساتىم – ورتا سالماقتاعى بارلىق تيتۋلدى بىرىكتىرۋ ەكەنىن بارشاڭىز جاقسى بىلەسىزدەر. بىراق سول جولدا باتلەردەن اينالىپ وتە المايمىن. ول مىقتى قارسىلاس، سول سەبەپتى ستوكتونداعى جانكۇيەرلەر مەن بوكس كەشىن ESPN تەلەارناسى ارقىلى تاماشالايتىن كورەرمەندەرگە ناعىز تارتىستى بوكس شوۋىن سىيلايمىز دەگەن ۇمىتتەمىن»، دەيدى ج.ءالىمحان ۇلى.

ال ستيۆەن باتلەر قىسقا عانا قايىرىپ، ءوز جانكۇيەرلەرىنەن 13 مامىردا ۇلكەن سەنساتسياعا دايىن بولۋىن سۇراپ، الەم چەمپيونى بەل­بەۋىن كۆەبەك قالاسىنا اكەلەتىنىن مالىمدەدى.