جالپى وتىرىستى اشقان ورتالىق سايلاۋ كوميسسياسىنىڭ توراعاسى نۇرلان ءابدىروۆ ەڭ اۋەلى وسى شاقىرىلىمداعى دەپۋتاتتاردى تانىستىرىپ شىقتى. سودان كەيىن ولاردى بىرتىندەپ مىنبەرگە انت بەرۋگە شاقىردى.
«قازاقستان حالقىنا ادال قىزمەت ەتۋگە, قازاقستان رەسپۋبليكاسىنىڭ تۇتاستىعى مەن تاۋەلسىزدىگىن نىعايتۋعا, ونىڭ كونستيتۋتسياسى مەن زاڭدارىنا قاتاڭ باعىنۋعا, دەپۋتاتتىڭ وزىمە جۇكتەلگەن مارتەبەلى مىندەتتەرىن ادال اتقارۋعا انت ەتەمىن», دەدى دەپۋتاتتار قولىن كونستيتۋتسياعا قويىپ تۇرىپ.
سودان كەيىن دەپۋتاتتار پالاتانىڭ جاڭا توراعاسىن سايلاۋ ۇدەرىسىنە كوشتى. ءوز سوزىندە باقتىقوجا ىزمۇحامبەتوۆ ءماجىلىس توراعاسىنا ەرلان قوشانوۆتىڭ كانديداتۋراسىن ۇسىندى. سايلاۋ تىكەلەي جاسىرىن داۋىس بەرۋ ارقىلى ءوتتى. ونى قاداعالاۋ ءۇشىن دەپۋتاتتار اراسىنان ساناق كوميسسياسى قۇرىلدى. ناتيجەسىندە, داۋىس بەرۋ قورىتىندىسى بويىنشا VIII سايلانعان ءماجىلىس سپيكەرى بولىپ «Amanat» پارتياسىنىڭ توراعاسى ەرلان قوشانوۆ سايلاندى.
ايتا كەتەرلىگى, كونستيتۋتسيانىڭ 58-بابىنىڭ 1-تارماعىنا سايكەس ءماجىلىس توراعاسى مەملەكەتتىك ءتىلدى ەركىن مەڭگەرگەن دەپۋتاتتار اراسىنان پالاتا دەپۋتاتتارى جالپى سانىنىڭ كوپشىلىك داۋسىمەن جاسىرىن داۋىس بەرۋ ارقىلى سايلانادى.
بۇدان كەيىن ءسوز العان ءماجىلىس توراعاسى ە.قوشانوۆ سەنىم بىلدىرگەن ارىپتەستەرىنە العىس ايتتى. دەپۋتاتتار جاڭا سپيكەردى قىزمەتكە تاعايىندالۋىمەن قۇتتىقتادى.
«بۇگىنگى كورسەتكەن سەنىمدەرىڭىز ءۇشىن زور العىسىمدى بىلدىرگىم كەلەدى. بۇل مەن ءۇشىن حالقىمىزدىڭ, سىزدەردىڭ الدارىڭىزداعى ۇلكەن مارتەبە, زور جاۋاپكەرشىلىك. سوندىقتان وزدەرىڭىزبەن بىرگە سايلاۋشىلاردىڭ اماناتىن, مەملەكەت باسشىسىنىڭ رەفورمالارىن جۇزەگە اسىرۋ ءۇشىن بار كۇش-جىگەرىمدى, تاجىريبەمدى سالاتىنىما ۋادە بەرەمىن. بۇگىن پرەزيدەنتىمىز قاسىم-جومارت توقاەۆ VIII سايلانعان ءماجىلىستىڭ العاشقى سەسسياسىن اشىپ, ءبىزدىڭ باعىت-باعدارىمىزدى انىقتاپ بەردى. ونى ساپالى ءارى جەدەل ىسكە اسىرۋ – ءبىزدىڭ ورتاق مىندەتىمىز. ول ءۇشىن بارلىق مۇمكىندىك بار. ەڭ باستىسى, حالىقتىڭ سەنىمىن ابىرويمەن اتقارايىق», دەدى جاڭادان سايلانعان سپيكەر ە.قوشانوۆ.
كەلەسى كەزەكتە دەپۋتاتتار پالاتانىڭ قوس ۆيتسە-سپيكەرىن سايلادى. ە.قوشانوۆ ارىپتەستەرىنە البەرت راۋ مەن دانيا ەسپاەۆانىڭ كانديداتۋراسىن ۇسىندى. داۋىس بەرۋ اشىق فورماتتا ءوتتى. ماجىلىسمەندەر پالاتا توراعاسىنىڭ ۇسىنىسىن قولدادى.
كۇن تارتىبىنە شىعارىلعان كەلەسى ماسەلە – ءماجىلىس كوميتەتتەرىنە قاتىستى ەدى. ءماجىلىس دەپۋتاتى جۇلدىز سۇلەيمەنوۆا ءماجىلىس كوميتەتتەرىنىڭ سانى مەن اتاۋلارىن VII شاقىرىلىمداعى قالپىمەن قالدىرۋدى ۇسىندى. داۋىس بەرۋگە قاتىسقان 97 دەپۋتاتتىڭ 96-سى ۇسىنىستى جاقتادى. بۇدان كەيىن دەپۋتاتتار كوميتەتتەر توراعالارىن سايلادى.
الەۋمەتتىك-مادەني دامۋ كوميتەتىنىڭ توراعاسىنا – اسحات ايماعامبەتوۆ, زاڭناما جانە سوت-قۇقىقتىق رەفورما كوميتەتىنىڭ توراعاسى بولىپ سنەجاننا يماشەۆا, قارجى جانە بيۋدجەت كوميتەتىنىڭ توراعاسىنا – ءمادي تاكيەۆ, ەكولوگيا ماسەلەلەرى جانە تابيعات پايدالانۋ كوميتەتىنىڭ توراعاسى بولىپ ەدىل جاڭبىرشين, حالىقارالىق ىستەر, قورعانىس جانە قاۋىپسىزدىك كوميتەتىنىڭ توراعالىعىنا – ايگۇل قۇسپان, اگرارلىق ماسەلەلەر كوميتەتىنىڭ توراعاسى بولىپ سەرىك ەگىزباەۆ, ەكونوميكالىق رەفورما جانە وڭىرلىك دامۋ كوميتەتىنىڭ توراعالىعىنا نۇرتاي سابيليانوۆ سايلاندى.
دەپۋتاتتار جالپى وتىرىستا ءماجىلىس رەگلامەنتىنە ەنگىزىلگەن وزگەرىستەر مەن تولىقتىرۋلاردى قابىلدادى. وزگەرىستەر ماجىلىسكە كىرگەن پارتيالاردىڭ وكىلەتتىكتەرىن كەڭەيتۋگە قاتىستى. فراكتسيا قۇرۋ ءۇشىن قاجەتتى دەپۋتاتتار سانىنىڭ ەڭ از شەگىن الىپ تاستاۋ ۇسىنىلدى.
وسىلايشا, ماجىلىستەگى التى پارتيا دا ءوز فراكتسيالارىن قۇرۋعا مۇمكىندىك الدى, ولاردى قاتارىندا «اmanat», «Respublica», «اق جول», «قازاقستان حالىق پارتياسى», «اۋىل» جانە جالپىۇلتتىق سوتسيال-دەموكراتيالىق پارتياسى بار.
ەسكە سالا كەتەيىك, بۇل جولى ءماجىلىس دەپۋتاتتارىنىڭ سايلاۋى جاڭا جۇيە بويىنشا ءوتتى. كانديداتتار پارتيالىق ءتىزىم بويىنشا عانا ەمەس, ءبىر مانداتتى وكرۋگتەر بويىنشا دا سايلاندى. ءماجىلىس قۇرامىنا التى پارتيادان 98 دەپۋتات ەندى. سونىڭ ىشىندە 29 دەپۋتات ءبىر مانداتتى وكرۋگتەردەن سايلاندى.
