قازاقستان ۇلتتىق قۇراماسىنىڭ كاپيتانى ياروسلاۆا شۆەدوۆا پولشامەن وتەتىن كەزدەسۋدە مىنا تەننيسشىلەرگە سەنىم ارتادى. ولار: ەلەنا رىباكينا (جەكەلەي سىندا WTA رەيتينگىندە 7-ورىندا), يۋليا پۋتينتسەۆا (WTA رەيتينگىندە 43-ورىندا), اننا دانيلينا (جۇپتىق سىندا رەيتينگتە 25-ورىندا), گوزال اينيتدينوۆا (جەكەلەي سىن, WTA, 333-راكەتكا), جانەل رۇستەموۆا (جۇپتىق سىن, WTA, 973). سونىمەن قاتار قوسىمشا ويىنشى رەتىندە ارۋجان ساعىندىقوۆا (جەكەلەي سىن, WTA, 968) تىركەلگەن.
ايەلدەر اراسىنداعى قازاقستاننىڭ ءبىرىنشى, الەمنىڭ جەتىنشى راكەتكاسى ەلەنا رىباكينا قازىر ناعىز بابىندا. جەرلەسىمىز بۇل كۇندەرى اقش-تىڭ مايامي قالاسىندا ءوتىپ جاتقان WTA 1000 تۋرنيرىندە ءساتتى ونەر كورسەتىپ جاتىر. جۋىردا عانا مۇحيتتىڭ ارعى بەتىندەگى ينديان-ۋەللس قالاسىندا ۇيىمداستىرىلعان جىلدىڭ العاشقى «Masters» تۋرنيرىندە توپ جارعان رىباكينا ماياميدەگى دودادا دا سول جەتىستىگىن قايتالاۋعا جاقىن. وتانداسىمىز كەشە جارىستىڭ شيرەك فينالىندا الەمنىڭ 24-راكەتكاسى يتاليالىق مارتينا ترەۆيزاندى ەكى سەتتە 6:3. 6:0 ەسەبىمەن تىزە بۇكتىرىپ, جارتىلاي فينالعا جولداما الدى. بۇل – قازاقستاندىق تەننيسشىنىڭ بيىلعى ماۋسىمدا قول جەتكىزگەن قاتارىنان 12-ءشى جەڭىسى. سونداي-اق وتانداسىمىز قازىرگى تاڭدا ەيس ء(بىرىنشى دوپتان ۇپاي الۋ) بويىنشا الەمدە ءبىرىنشى ورىندا كەلەدى.
ال دۇنيەجۇزىلىك رەيتينگتە 43-ورىندا تۇرعان يۋليا پۋتينتسەۆانىڭ ازىرگە جولى بولار ەمەس. ول جىل باسىنان بەرگى جارىستاردىڭ ەكىنشى اينالىمىنان ارىگە اسا الماي كەلەدى. تەك ءبىر مارتە عانا اۋستراليانىڭ حوبارت قالاسىندا وتكىزىلگەن جارىستىڭ ءۇشىنشى كەزەڭىندە ويناۋعا مۇمكىندىك العان ەدى. اقش-تا ۇيىمداستىرىلعان ەڭ كەيىنگى ەكى ءىرى ءتۋرنيردىڭ ءبىرىنشى اينالىمىندا-اق جارىس جولىنان شىعىپ قالدى. سونداي-اق جۇپتىق سىندا باق سىنايتىن اننا دانيلينا كەيىنگى جارىستاردا ءتاۋىر ونەر كورسەتىپ ءجۇر. ۇلتتىق قۇراماعا العاش رەت شاقىرتۋ العان جاس تەننيسشىلەر – گوزال اينيتدينوۆا, جانەل رۇستەموۆا جانە ارۋجان ساعىندىقوۆا بولاشاعىنان ءۇمىت كۇتتىرەتىن تەننيسشىلەرىمىزدىڭ قاتارىندا. قازىرگى ۋاقىتتا ولار دا ەرەسەكتەر اراسىنداعى جارىستارعا قاتىسىپ, ۇلكەن تاجىريبە جيناپ ءجۇر.
پولشا قۇراماسىنا كەلەر بولساق, كوماندا كاپيتانى داۆيد تسەلت قازاقستانمەن وتەتىن ماڭىزدى ويىندا الەمنىڭ 1-راكەتكاسى, رىباكينانىڭ سىرالعى قارسىلاسى يگا شۆيونتەككە سەنىم ارتا المايدى. يگا وتكەن ايدا دوحادا ۇيىمداستىرىلعان دودادا العان جاراقاتىن ينديان-ۋەللستە اسقىندىرىپ الىپ, الداعى بىرقاتار جارىسقا قاتىسا المايتىنىن مالىمدەدى.
ەلورداداعى ماتچتا پولشا قۇراماسىنىڭ نامىسىن ماگدا لينەتت (جەكەلەي سىندا WTA رەيتينگىندە 19-ورىندا), ماگدالەنا فرەنح (WTA رەيتينگىندە 105-ورىندا), اليسيا روسولسكا (WTA جۇپتىق رەيتينگىندە 39-ورىندا), ۆەرونيكا فالكوۆسكا (WTA جۇپتىق رەيتينگىندە 92-ورىندا) قورعايدى.
بۇل تەننيسشىلەردىڭ ىشىندە ماگدا لينەتتىڭ ەسىمى قازاقستان جانكۇيەرلەرىنە جاقسى تانىستى. بيىلعى اۋستراليا اشىق بىرىنشىلىگىنىڭ جارتىلاي فينالىندا دەيىن جەتكەن ماگدا بۇگىنگە دەيىن يۋليا پۋتينتسەۆامەن جەتى مارتە كەزدەسىپ, سونىڭ بەسەۋىندە باسىم تۇسكەن. ەكى كەزدەسۋدە وتانداسىمىزدىڭ باعى جانعان. سونداي-اق لينەتت ەلەنا رىباكينامەن دە ءبىر مارتە شەبەرلىك بايقاسىپ, جەڭىلىستىڭ كەرمەك ءدامىن تاتۋعا ءماجبۇر بولعان. ەكى تەننيسشى 2021 جىلى چەحيانىڭ وستراۆا قالاسىندا وتكەن ءتۋرنيردىڭ 1/8 فينالىندا جولىعىپ, ەلەنا ءۇش سەتكە جالعاسقان ماتچتا 6:3. 2:6, 6:1 ەسەبىمەن باسىم تۇسكەن-ءدى. پولشا قۇراماسىنىڭ وزگە تەننيسشىلەرى الەمدىك جارىستاردا ءالى جارقىراپ كورىنە العان جوق. دەسە دە ولار ءتۇرلى حالىقارالىق دودالاردا باق سىناپ, ۇلكەن تاجىريبە مەكتەبىنەن ءوتىپ ءجۇر.
پولشا قۇراماسى 1966 جىلدان بەرى وسى جارىستا ونەر كورسەتىپ كەلەدى. ولار 1992 جانە 2015 جىلدارى بۇرىنعى فەدەراتسيا كۋبوگى, قازىرگى بيللي دجين كينگ تۋرنيرىندەگى ەڭ ۇزدىك ناتيجەسىنە قول جەتكىزدى. پولشالىقتار ەكى رەتىندە دە ءتۋرنيردىڭ شيرەك فينالىنا دەيىن جەتتى. 1992 جىلى گەرمانيا قىزدارىنان 3:0 ەسەبىمەن جەڭىلسە, 2015 جىلى رەسەي قۇراماسىنان باسىم تۇسە الماعان ەدى – 4:0.
جوعارىدا ايتىپ وتكەنىمىزدەي, 2020 جىلعا دەيىن ايەلدەر اراسىنداعى بۇل جارىس – فەدەراتسيا كۋبوگى دەپ اتالىپ كەلدى. ءۇش جىل بۇرىن ءتۋرنيردىڭ اتاۋى وزگەرىپ, وعان اقش-تىڭ ايگىلى تەننيسشىسى, «ۇلكەن دۋلىعا» ساناتىنداعى جارىستاردىڭ 39 دۇركىن جەڭىمپازى بيللي دجين كينگتىڭ ەسىمى بەرىلدى. 1960-1983 جىلدار ارالىعىندا ونەر كورسەتكەن داڭقتى تەننيسشى بىرنەشە جىل بويى الەمنىڭ ءبىرىنشى راكەتكاسى دەگەن مارتەبەلى اتاققا يە بولدى.
استانادا وتەتىن قازاقستان – پولشا ماتچى ادەتتەگىدەي ءتورت جەكەلەي كەزدەسۋدەن جانە ءبىر جۇپتىق باسەكەدەن تۇرادى. ءار ويىن ءۇش سەتكە جالعاسادى. جارىستىڭ ءبىرىنشى كۇنىندە تەننيسشىلەر جەكەلەي سىندا ەكى ويىن, كەلەسى كۇنى تاعى دا ەكى ماتچ وتكىزەدى. قۇرامالار ءتورت ماتچ قورىتىندىسى بويىنشا تەڭ ءتۇسىپ جاتسا, جەڭىمپاز جۇپتىق سىندا انىقتالادى. ءسويتىپ بەس ماتچتىڭ قورىتىندىسى بويىنشا جەڭىسكە جەتكەن قۇراما كۇزدە وتەتىن ءتۋرنيردىڭ فينالدىق كەزەڭىنە جولداما الادى.
سونداي-اق قازاقستان – پولشا قۇراماسىنان بولەك, الەم چەمپيوناتىنىڭ فينالىنا شىعۋ ءۇشىن يسپانيا – مەكسيكا, ۋكراينا – چەحيا, ۇلىبريتانيا – فرانتسيا, كانادا – بەلگيا, اقش – اۋستريا, سلوۆاكيا – يتاليا, گەرمانيا – برازيليا جانە سلوۆەنيا – رۋمىنيا تەننيسشىلەرى ىرىكتەۋ ماتچتارىندا كۇش سىناسادى.
ءسويتىپ توعىز جۇپتىڭ جەڭىمپازى بىلتىرعى بيللي دجين كينگ كۋبوگىندە توپ جارعان شۆەيتساريا, فيناليست اۋستراليا جانە جارىستى قابىلداۋشى ەل قۇرامالارىنىڭ قاتارىن تولىقتىرىپ, 2023 جىلعى چەمپيوندىقتى ساراپقا سالادى. ال ىرىكتەۋ كەزەڭىنەن وتە الماعان كوماندالار قاراشا ايىندا الەمدىك توپتاعى ورنىن ساقتاپ قالۋ ءۇشىن پلەي-وفف ساتىسىندا باق سىنايدى.
