وڭدەلگەن قالدىق كولەمىن باقىلاۋدا ۇستاپ وتىرعان «جاسىل دامۋ» اق ۇيىمى, جوبا ىسكە قوسىلعان ۋاقىتتان بەرى اتقارىلعان جۇمىستىڭ العاشقى ناتيجەسى تۋرالى حابارلادى. بەس ايداعى مونيتورينگ ەسەبى بويىنشا ەلەكتروكومپوستەرلەر 5 توننا تاماق قالدىعىن وڭدەپ, ودان 500 كگ كومپوست (قاراشىرىك) العان. ياعني ارنايى قوندىرعىعا سالىناتىن تاماق قالدىقتارى قاراشىرىككە اينالدىرىلعان. دايىن قاراشىرىك بالالار ءۇيى جانىنداعى باۋ-باقشاعا تىڭايتقىش رەتىندە پايدالانىلاتىن بولادى.
«بۇدان بىلاي تاماق قالدىقتارىن جەرگە كومىپ تاستاماي, قورشاعان ورتاعا قاۋىپسىز ءارى پايدالى ماتەريالعا اينالدىرۋ – ەكولوگيالىق ۇتىمدى شەشىمگە اينالىپ وتىر. ءاربىر ەلەكتروكومپوستەردىڭ كۇنىنە 50-دەن 100 كگ دەيىن تاماق قالدىعىن وڭدەي الاتىن قۋاتىن ەسكەرەتىن بولساق, وڭدەۋ كولەمىن بۇدان بىرنەشە ەسەگە جەتكىزۋگە بولادى ەكەن. الايدا جينالاتىن تاماق قالدىعىنىڭ كولەمىنە بايلانىستى وسى ناتيجەنى كورسەتىپ وتىر», دەيدى ماماندار.
ەستەرىڭىزگە سالا كەتەيىك, تاماق قالدىقتارىن كادەگە جاراتۋ بويىنشا ارنايى قۇرىلعى ورناتۋدى قارجىلاندىرۋعا فرانتسۋز ۇكىمەتى 500 مىڭ ەۋرو گرانت بولۋگە شەشىم قابىلداعان بولاتىن. اقكول اۋدانىندا جۇزەگە اسىرىلىپ جاتقان جوبا اياسىندا فرناتسۋزدىق كومپانيا مەن «جاسىل دامۋ» اق جانە جەرگىلىكتى اكىمدىك ءوزارا تۇسىنىستىك جونىندە ۇشجاقتى مەموراندۋمعا قول قويعان. قاناتقاقتى جوباعا جىل تولعاندا قورىتىندىسى شىعارىلىپ, بارلىق ەرەكشەلىكتەرى مەن جۇزەگە اسىرىلعان تاجىريبە ەگجەي-تەگجەي جاريالاناتىن بولادى.
