العاش رەت 6 پارتيا وكىلى زاڭ شىعارۋشى ورگاننىڭ 69 مانداتىنا يە بولدى. اراسىندا جەتىنشى شاقىرىلىمدا پارلامەنت مىنبەرىنەن وزەكتى ماسەلەلەردى كوتەرە بىلگەن قازىبەك يسا مەن ەرلان سايروۆتىڭ پارتيا ءتىزىمى ارقىلى مانداتقا قايتا يە بولعانى قۋانتادى. ويتكەنى ولاردىڭ بۇعان دەيىن ۇلتقا قاتىستى ماسەلەلەر تۋرالى تالاي دەپۋتاتتىق ساۋال جولداعاندارىن كوز كورىپ, قۇلاق ەستىدى.
ماجىلىسكە پارتيا تىزىمىمەن حالىققا سۇيكىمى بار اسحات ايماعامبەتوۆتىڭ وتكەنىن جۇرت الەۋمەتتىك جەلىدە قۋانا جازىپ جاتىر. حالىق ايتسا, قالت ايتپايدى. جاس بولسا دا, سەنىم مانداتىنا يە بولعان ازامات. ەندى حالىق قالاۋلىسى رەتىندە وسى سەنىمدى اقتاي الا ما, جوق پا, وعان دا ۋاقىت تورەشى.
ءبىرمانداتتى وكرۋگتەر بويىنشا سايلانعان دەپۋتاتتار اراسىندا ەرمۇرات باپي, مۇقاش ەسكەندىروۆ پەن گۇلدارا نۇرىموۆانى ەرەكشە اتار ەدىم. العاشقىسى شىندىقتى شىرقىراتا ايتا الدى, «دات» جوباسىمەن شىعارعان گازەتتەرى وزەكتى تاقىرىپتاردى باتىل كوتەرە الدى. سول ءۇشىن گازەتتەرى تالاي جابىلدى. وندا دا قايتقان جوق. وعان كۇمان كەلتىرگەندەر «داتتىڭ» بۇرىنعى مەن بۇگىنگى تىگىندىلەرىن قاراسا بولادى. جامبىل وبلىسىنان سايلانعان سوڭعى ەكەۋى راسىندا حالىق قالاۋلىسى. جەرلەستەرىمنىڭ باسىم بولىگى سايلاۋدا ولارعا داۋىس بەردى. سەنىم ءبىلدىردى. مۇقاش زۇلقارناي ۇلى سىلدىر ءسوزدىڭ ەمەس, ناقتى ءىستىڭ ادامى ەكەنىن باياعىدا-اق دالەلدەپ قويعان. ال گۇلدارا الدانىشقىزى جەتىنشى شاقىرىلىمدا «حالىق قالاۋلىسى» اتىنا ابدەن لايىق ەكەنىن كورسەتتى. ءوز سالاسى سانالاتىن مەديتسينا ماسەلەسىن تالاي كوتەردى. قۇرى كوتەرىپ قانا قويعان جوق, ونىڭ شەشىلۋىنە دە ازدى-كوپتى ۇلەس قوستى. سەگىزىنشى شاقىرىلىمدا دا سولاي بولاتىنىنا كۇمان جوق.
ارينە, كىمنىڭ كىم ەكەنىن ۋاقىت كورسەتەدى. تەك 98 دەپۋتات حالىق سەنىمىنەن ارتىق باعا جوق ەكەنىن ۇمىتپاي, تۇرعىنداردىڭ تۇرمىسىن تۇزەيتىن زاڭداردىڭ قابىلدانۋىنا ىقپال ەتسە بولعانى.
جاسۇلان ماۋلەن ۇلى,
«قازاق» گازەتىنىڭ باس رەداكتورى
