جيىندى اشقان نۇرلان ءابدىروۆ پارلامەنت دەپۋتاتتارىنىڭ كەزەكتەن تىس سايلاۋى وتكەن جىلدىڭ ماۋسىم ايىندا رەسپۋبليكالىق رەفەرەندۋمدا جالپىحالىقتىق داۋىس بەرۋدەن باستالعان ۇلكەن سايلاۋ تسيكلىن اياقتايتىنىن ايتتى.
«سايلاۋدى وتكىزۋدىڭ جاڭا فورماتى ازاماتتاردىڭ ساياسي پروتسەسكە قاتىسۋ مۇمكىندىكتەرىن ەداۋىر كەڭەيتتى جانە تۇتاستاي سايلاۋ سالاسىن جانداندىردى. پارلامەنت ءماجىلىسىنىڭ بارلىق 98 دەپۋتاتى تىكەلەي سايلاۋ قۇقىعى نەگىزىندە سايلاندى, ياعني تىكەلەي ازاماتتار سايلادى», دەپ اتاپ ءوتتى وسك توراعاسى.
ول سونداي-اق «قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ مارتەبەسى تۋرالى» كونستيتۋتسيالىق زاڭنىڭ 24-بابىنا سايكەس پارلامەنت دەپۋتاتىنىڭ وكىلەتتىگى ونى ورتالىق سايلاۋ كوميسسياسى پارلامەنت دەپۋتاتى رەتىندە تىركەگەن كەزدەن باستالاتىنىن اتاپ ءوتتى.
پارلامەنت ءماجىلىسىنىڭ VIII شاقىرىلىمى دەپۋتاتتارىن تىركەۋ تۋرالى ورتالىق سايلاۋ كوميسسياسى قازاقستان رەسپۋبليكاسى پارلامەنتى ءماجىلىسىنىڭ VIII شاقىرىلىمى دەپۋتاتتارىن تىركەۋ ماسەلەسى بويىنشا ءتيىستى شەشىمدەردىڭ جوبالارىن ازىرلەگەنىن حابارلاعان وسك حاتشىسى مۇحتار ەرمان بايانداما جاسادى. وسىلايشا, وسك قاۋلىلارىنا سايكەس پارلامەنتى ءماجىلىسىنىڭ VIII شاقىرىلىمىنىڭ 98 دەپۋتاتى تىركەلدى. ونىڭ ىشىندە تىركەلگەن التى ساياسي پارتيانىڭ پارتيالىق تىزىمدەرى بويىنشا 69 دەپۋتات («Amanat» پارتياسى – 40, «اق جول» قازاقستان دەموكراتيالىق پارتياسى – 6, «اۋىل» پارتياسى – 8, قازاقستان حالىق پارتياسى – 5, «Respublica» پارتياسى – 6 جانە جسدپ – 4 دەپۋتات) جانە 29 دەپۋتات بىرمانداتتىق اۋماقتىق سايلاۋ وكرۋگتەرى بويىنشا سايلاندى.
وسك توراعاسى نۇرلان ءابدىروۆ دەپۋتاتتارعا رەسپۋبليكانىڭ جوعارى وكىلدى ورگانىندا ەل يگىلىگى ءۇشىن جەمىستى جۇمىس تىلەي وتىرىپ, كۋالىكتەر مەن ءتوس بەلگىلەردى تاپسىردى.
