سپورتتى دامىتۋ ديرەكتسياسىنىڭ ءباسپاسوز قىزمەتى تاراتقان مالىمەت بويىنشا, ەرلەر اراسىنداعى جەكەلەي سىننىڭ باس جۇلدەسىن ەلوردالىق كيريلل گەراسيمەنكو مەن قاراعاندىلىق الان قۇرمانعاليەۆ ساراپقا سالدى. حالىقارالىق جارىستاردا ەل نامىسىن ابىرويمەن قورعاپ جۇرگەن قوس شەبەردىڭ اراسىنداعى تارتىستى باسەكە 4:1 ەسەبىمەن گەراسيمەنكونىڭ پايداسىنا شەشىلدى. ال ايەلدەر اراسىندا زاۋرەش اقاشەۆا (قاراعاندى وبلىسى) توپ جاردى. ول فينالدا تاعى ءبىر ۇلتتىق قۇراما وكىلى سارۆينوز ميركاديروۆاعا (شىمكەنت) ەش مۇمكىندىك بەرمەدى (4:1). ءبىر قىزىعى, بىلتىر پاۆلودار قالاسىندا وتكەن ەل چەمپيوناتىنىڭ جەكەلەي سىنداعى فينالىنا دا وسى 4 سپورتشى شىققان بولاتىن.
ارالاس جۇپتىق سىندا زاۋرەش اقاشەۆا مەن ۆلاديسلاۆ زاحاروۆ دۋەتى كيريلل گەراسيمەنكو مەن اناستاسيا لاۆروۆاعا توتەپ بەرە المادى. ەسەپ – 3:0. ۇزدىك ۇشتىكتى بەكۇلان جامال پەن سارۆينوز ميركاديروۆا (شىمكەنت) جانە الان قۇرمانعاليەۆ پەن اراي اشكەەۆا (قاراعاندى وبلىسى) تۇيىندەدى.
ايەلدەر اراسىندا جۇپتىق سايىستا شىمكەنتتىك سارۆينوز ميركاديروۆا مەن انەل باقىت جۇبى باتىس قازاقستان وبلىسىنان كەلگەن گۇلچەحرا حۋسەينوۆا مەن السۋ ساپاروۆانى جەڭدى. قولا جۇلدە يۋليا دانياروۆا مەن الينا دۋبروۆسكايا (قوستاناي وبلىسى) جانە ايا الىمباەۆا مەن ۆالەنتينا ۋسپانوۆا (الماتى) جۇبىنا بۇيىردى.
ەرلەر اراسىنداعى جۇپتىق باسەكەدە الان قۇرمانعاليەۆ پەن ۆلاديسلاۆ زاحاروۆ فينالدا اعايىندى كيريلل جانە الەكساندر گەراسيمەنكودان باسىم ءتۇسىپ, جارىس جەڭىمپازى اتاندى. قولا مەدالدى دەنيس جولۋدەۆ/ساعانتاي قۇرمامباەۆ (شقو) پەن باقداۋلەت اكىمالى/بەكۇلان جامال (شىمكەنت) جۇبى يەلەندى.
كوماندالىق سايىستا قاراعاندى وبلىسىنىڭ تەننيسشىلەرى ۇزدىك شىقتى. ولار فينالدا شىعىس قازاقستان وبلىسىن 3:1 ەسەبىمەن تىزە بۇكتىردى. ايەلدەر اراسىندا دا قاراعاندى وبلىسى قۇراماسىنىڭ وكىلدەرى قارسىلاس شاق كەلتىرگەن جوق. جەرگىلىكتى تەننيسشىلەر فينالدا شىمكەنت كومانداسىن سەنىمدى ۇتتى – 3:1.
ايتا كەتەيىك, 20 ناۋرىزدا باستالعان ۇستەل تەننيسى باسەكەسىنە 20 وڭىردەن كەلگەن 180-نەن استام سپورتشى قاتىستى.
