وقيعا كادرلارى الەۋمەتتىك جەلىدە پايدا بولدى. ۆيدەو سيپاتتاماسىندا توبەلەس قازالى اۋدانىندا بولعانى ايتىلعان. كادرلاردان اۋىلدىڭ ورتالىق كوشەلەرىنىڭ بىرىندە ادامدار جۇگىرىپ جۇرگەنىن كورۋگە بولادى. باسقا كادرلاردا ولاردى پوليتسيا قۋىپ كەلە جاتقانى بايقالادى.
قۇقىق قورعاۋ ورگاندارى مالىمەتىنشە, 26 ناۋرىزدا تۇنگى ساعات 2 شاماسىندا قازالى اۋداندىق پوليتسيا بولىمىنە حابارلاما كەلىپ تۇسكەن. وندا تۇندە ايتەكە بي كەنتىندەگى ءپىرىموۆ كوشەسىندە شۋ شىعارعان ءبىر توپ ادام تۋرالى ايتىلعان.
«وقيعا ورنىنا جەدەل تۇردە پوليتسيا جاساقتارى جەتتى, قابىلدانعان جەدەل شارالار ناتيجەسىندە سەگىز ادام پوليتسيا بولىمىنە جەتكىزىلدى, قالعاندارىن انىقتاۋ جۇمىستارى جۇرگىزىلىپ جاتىر. زارداپ شەككەندەر جوق. پوليتسياعا شاعىمدار مەن ارىزدار تۇسكەن جوق», دەدى پوليتسياداعىلار.
دەرەك قىلمىستىق كودەكستىڭ 293-بابى 2-بولىگى 1-تارماعى بويىنشا سوتالدى تەرگەپ-تەكسەرۋدىڭ بىرىڭعاي تىزىلىمىنە تىركەلگەن. قازىر تەرگەۋ امالدارى جۇرگىزىلىپ جاتىر.
«اۋداندا قوعامدىق ءتارتىپتى قامتاماسىز ەتۋ ماقساتىندا پاترۋلدىك پوليتسيا مەن ۋچاسكەلىك ينسپەكتورلار كۇشەيتىلىپ, پروفيلاكتيكالىق جۇمىستار جۇرگىزىلىپ جاتىر. اۋداندا قىلمىستىق احۋال تۇراقتى», دەپ قوستى پوليتسەيلەر.
