دانياعا دەس بەرمەدى

وتكەن جەكسەنبى كۇنى وتان­دىق فۋتبول جانكۇيەرلەرى ەل تاري­حىندا ءجيى قايتالانا بەر­مەيتىن تاعى ءبىر سەنساتسيالىق جە­ڭىستىڭ كۋاسى بولدى. ەۋرو-2024 ءتۋرنيرىنىڭ ىرىك­تەۋ كەزەڭى ايا­سىنداعى ەكىنشى تۋر ويىنىن «استانا ارەنادا» وتكىزگەن قا­زاق­ستاننىڭ ۇلتتىق قۇ­راماسى 1992 جىلعى ەۋروپا چەم­پيونى, كارى قۇرلىقتىڭ ەكى دۇركىن قولا جۇلدەگەرى (1984, 2020) داڭقتى دانيا قۇراماسىن 3:2 ەسە­بىمەن تىزە بۇكتىرىپ, الەم فۋت­بو­لىن­داعى ەڭ ءىرى سەن­ساتسيا­نىڭ ءبىرىن جاسادى.

ءبىر قىزىعى, قازاقستان فۋتبولشىلارى تاريحي جەڭىستەرىنىڭ كوبىنە ناۋرىز ايىندا قول جەت­كىزىپ ءجۇر. ماسەلەن, وسىدان 16 جىل بۇرىن, ياعني 2007 جىلدىڭ 24 ناۋرىزىندا ەۋرو-2008 ءتۋر­نيرى اياسىندا نيدەرلاند وكىلى ارنو پايپەرس جاتتىقتىرعان قا­زاق­ستان ۇلتتىق قۇراماسى ال­ما­تىدا سەربيا فۋتبولشىلارىنان 2:1 ەسەبىمەن باسىم تۇسكەن بول­سا, 2018 جىلدىڭ 24 ناۋرىزىندا سىرت الاڭدا ماجارستان قۇ­را­ماسىن ءدال كەشەگىدەي ەسەپپەن سۇ­رىندىرگەن ەدى – 3:2. بۇل ماتچ جولداستىق كەزدەسۋ اياسىندا وتكەنىن ايتا كەتەيىك.

ال 2019 جىلدىڭ 21 ناۋ­رىزىندا ەۋرو-2020 ىرىكتەۋ كە­زەڭىندە شوتلانديا قۇراماسىن 3:0 ەسەبىمەن قاپى قالدىرىپ, قازاقتىڭ جاڭا جىلىن جارقىن جەڭىسپەن باستاعان ەدى. ارينە, كۇنى كەشەگە دەيىن قازاق فۋت­بولىنداعى ەڭ ايتۋلى جەڭىس رە­تىندە 2007 جىلعى سەربيامەن وت­كەن ويىن ايتىلاتىن. ويتكەنى قازاق­ستان قۇراماسى باسىم تۇس­كەن وزگە ەلدەردىڭ اتاق-داڭقى سەربيادان جوعارى ەمەس ەدى. 2007 جىلعى فيفا رەيتينگىنە كوز جۇگىرتەر بولساق, سول كەزدە سەر­بيا قۇراماسى الەمدىك رەيتينگ­تە 28-ورىندا تۇرعان ەكەن. ەندى قازاق فۋتبولىنداعى تاريحي جە­ڭىستەر ايتىلعاندا, ءبىرىنشى دانيا قۇراماسى تۇراتىنى ءسوزسىز. ويت­كەنى دانيانىڭ اتاق-دا­رە­­جەسى دە, دەڭگەيى دە سەربيا, شوت­لان­­­­ديادان الدەقايدا جو­عارى. «دات ءدي­­ناميتى» ءدال قازىرگى تاڭ­دا فيفا رەي­تينگىندە 12-ورىن­عا جاي­­عاسقان.

جالپى, قازاقى ۇعىمدا ناۋرىز ايى – جاڭارۋ مەن جاڭعىرۋدىڭ, بەرەكە مەن بىرلىكتىڭ باستاۋى دەپ جاتادى عوي. قازاق فۋتبولىندا دا ناۋرىز ايى تاريحي جەڭىستەردىڭ, جاڭا بەلەستەردىڭ باستاۋى رەتىندە ەل جادىندا ساقتالماق.

جانكۇيەرلەردىڭ ەسىندە بولسا, قازاقستان مەن دانيا قۇرامالارى بۇگىنگە دەيىن جاسىل الاڭدا ءتورت مارتە كەزدەسىپ, سونىڭ تورتەۋىندە دە ەۋروپالىقتار جەڭىسكە جەتكەن. 1992 جىلعى ەۋروپا چەمپيوندارى قازاقستان قۇراماسىن جاي جەڭىپ قانا قوماي, ءۇش رەت ءىرى ەسەپپەن تىزە بۇكتىرگەن. ءبىر مارتە الماتىدا وتكەن ويىندا 2:1 ەسەبى تىركەلسە, ونىڭ الدىنداعى ويىنداردا سكانديناۆيالىقتار 3:0, 4:1 جانە 3:1 ناتيجەسىمەن باسىم تۇسكەن بولاتىن.

تاعى ءبىر ايتا كەتەرلىگى, ەكى ەلدىڭ فۋتبولشىلارى العاش رەت 2005 جىلدىڭ 26 ناۋرىزىن­دا كەزدەسىپ, دانيالىقتار 3:0 ەسە­بىمەن جەڭىسكە جەتكەن-ءدى. ارا­دا تۇپ-تۋرا 18 جىل وتكەندە قا­زاق­ستان قۇراماسى استانادا دانيا قۇ­­را­ماسىن 3:2 ەسەبىمەن تىزە بۇك­تىردى.

ەندى قازاق جانكۇيەرلەرىنىڭ مەرەيىن اسىرىپ, دانيالىق­تار­دىڭ كوڭىلىن كۇپتى ەتكەن سول تاريحي ماتچقا از-كەم توقتالىپ وتسەك. موگامەد اديەۆ شاكىرتتەرى العاشقى تۋردا سلوۆەنيا قۇرا­ماسىنا جول بەرگەننەن كەيىن دانيامەن بولاتىن ويىندا قا­زاقستان قۇراماسىنان ەشكىم جەڭىس كۇتكەن جوق. ءتىپتى اۋزى دۋالى دەگەن فۋتبول ماماندارىنىڭ ءوزى بۇل ويىندا قازاقستان قۇراماسى ءۇش ۇپايدان ۇمىتتەنبەي-اق قويسا دا بولادى دەگەن سارىندا پىكىر ايتقان بولاتىن. بىراق ء«ۇمىتسىز – شايتان» دەمەكشى, قازاقستان قۇراماسىنىڭ فۋتبولشىلارى مەن باپكەرلەرىنىڭ جەڭىسكە دەگەن ءۇمىت ءجىبى سوڭعى ساتكە دەيىن ۇزىلگەن جوق.

جەرەبەدەن كەيىن «H» تو­بى­نىڭ ءسوزسىز ءفاۆوريتى دەپ سا­نالعان دانيا العاشقى ويىندا فين­ليانديانى 3:1 ەسەبىمەن جەڭگەن سوڭ, قازاقستانعا بۇل قۇرامانى دا «قال­پاقپەن ۇرىپ الامىز» دەگەن ويمەن كەلگەنى انىق. «استانا ارە­ناداعى» ماتچتىڭ العاشقى مينۋتتارىندا دانيالىقتاردىڭ الاڭداعى قيمىلى, دوپتى ۇس­تاۋى وزدەرىنىڭ جەڭىسىنە دەگەن سەنىمدىلىگىن انىق بايقاتتى. نا­تيجەسىندە, ءبىرىنشى تايمدا قوناق­تار ەكى گول سوعىپ, ەسەپتە اي­قىن با­سىمدىقپەن العا شىعىپ الدى. ەكى گولدى دا فينليانديا قاق­پاسىنا حەت-تريك جاساعان راسمۋس حويلۋند سوقتى.

ەكىنشى تايم ءدال قازاقستان – سلوۆەنيا ماتچىنىڭ ستسەناريى­مەن باستالدى. قوناقتار قازاق­ستان قۇراماسى سەكىلدى ەكىن­شى تايمدى وتە سىلبىر باستاسا, جەر­لەس­تەرىمىز سلوۆەنيا فۋتبولشى­لارىنا ۇقساپ بەلسەندى بولدى. ارينە, ءبىزدىڭ جىگىتتەرگە ەكىنشى تايم باستالا سا­لا گول سوعۋ باقىتى بۇيىرعان جوق. دەگەنمەن 73-مينۋتتا باق­تيەر ءزاينۋتدينوۆتىڭ پەنالتيدەن سوققان گولى فۋتبولشىلاردىڭ كەۋ­­­دەسىندەگى ءۇمىت وتىن جاعىپ بەردى. ال 86-مينۋتتا اسحات تا­عى­­بەر­گەن الىستان قاقىراتا تەۋىپ, كاس­­پەر شمەيحەلدىڭ قاق­پا­سى­نان سا­ڭىلاۋ تاپقان سوڭ, ءبىز­دىڭ جىگىتتەردە جەڭىسكە دەگەن جى­گەر, سەنىم پايدا بولدى. سول سە­نىممەن العا قاراي ۇمتىلعان قازاقستان قۇراماسىنىڭ فۋتبولشىلارى 89-مينۋتتا تاعى ءبىر گول سالىپ, وپ-وڭاي ءۇش ۇپاي­­دى ولجالايمىز دەپ كەلگەن قار­سىلاستارىنىڭ جىگەرىن قۇم قىل­دى. يان ۆوروگوۆسكيدىڭ اۋە­لەتە بەرگەن پاسىنان كەيىن ابات ايىم­بەتوۆ باسپەن گول سو­عىپ, قا­زاقستان قۇراماسىنا تاريحي جە­ڭىس سىيلادى. قورىتىندى ەسەپ – 3:2.

قازاقستان قۇراماسى بۇل جەڭى­سىنەن كەيىن «H» توبىندا ءۇش ۇپايمەن ءۇشىنشى ورىنعا كوتە­رىلىپ الدى. ەكى ويىندا التى ۇپاي جيناعان سلوۆەنيا كوش باستاسا, قازاقستانمەن بىردەي ۇپايى بار دانيا تەك دوپ ايىرماسى بو­يىنشا ەكىنشى ورىندا تۇر. سونداي-اق ەكى ويىندا ءۇش ۇپايعا قول جەتكىزگەن فينليانديا مەن سولتۇستىك يرلانديا قۇرامالارى ءتورتىنشى جانە بەسىنشى ورىندارعا جايعاسقان. ال سوقىر ۇپايى دا جوق سان-مارينو سوڭعى ورىندا كەلەدى. قازاقستان قۇراماسى كەلەسى تۋر ويىنىن سىرت الاڭدا ءدال وسى سان-مارينومەن وتكىزەدى. ماتچ 16 ماۋسىمعا جوسپارلانعان.