«كورەيا رەسپۋبليكاسىنا كىرۋگە ءتيىستى رۇقسات الماعان قازاقستاننىڭ ەكى ازاماتى ينچحون حالىقارالىق اۋەجايىنان زاڭسىز قاشىپ كەتكەن. كەيىنىرەك ولاردىڭ ءبىرىن جەرگىلىكتى پوليتسيا ۇستادى. ەكىنشى ازامات ىزدەستىرىلىپ جاتىر. اتالعان ازاماتتار وڭتۇستىك كورەياعا 24 ناۋرىزدا تاشكەنت قالاسىنان «Koreana» اۋەكومپانياسىنىڭ رەيسىمەن كەلىپ, دەپورتاتسيالىق رەيستى كۇتىپ وتىرعان. سودان كەيىن اۋەجايدان رۇقساتسىز شىعىپ كەتكەن», دەدى ءسىم رەسمي وكىلى.
ونىڭ ايتۋىنشا, قازاقستاننىڭ سەۋل قالاسىنداعى ەلشىلىگى بۇل ماسەلە بويىنشا كورەيا رەسپۋبليكاسىنىڭ ۋاكىلەتتى ورگاندارىمەن بايلانىس ورناتتى.
«بولعان وقيعا وڭتۇستىك كورەيادا قوعامدىق رەزونانس تۋدىرىپ, جەرگىلىكتى باق-تا كەڭىنەن جاريالاندى. ءوز كەزەگىندە بۇل جاعداي بولاشاقتا كورەيا رەسپۋبليكاسىنىڭ قۇقىق قورعاۋ جانە يمميگراتسيالىق ورگاندارىن اسىرەسە قازاقستان ازاماتتارىنىڭ ەلدە زاڭسىز ءجۇرىپ-تۇرۋىنا قارسى بەلسەندى كۇرەسۋىنە, سونداي-اق ءبىزدىڭ وتانداستارىمىز ءۇشىن ەلگە كىرۋ ءتارتىبىن قاتاڭداتۋعا يتەرمەلەۋى دە مۇمكىن», دەپ قوستى ايبەك سمادياروۆ.
