موگامەد اديەۆ شاكىرتتەرىنىڭ ۇلتتار ليگاسىنداعى ءساتتى ماۋسىمىنان كەيىن قازاقستاننىڭ فۋتبول جانكۇيەرلەرى بيىل دا جاسىل الاڭداعى جىگىتتەردىڭ جىگەرلى جەڭىسىنەن دامەلى ەدى. وكىنىشكە قاراي, ەلىمىزدىڭ تۇكپىر-تۇكپىرىنەن وسى ماتچقا ارنايى كەلگەن ستاديونداعى 27 مىڭنان اسا جانكۇيەردىڭ دە, تەلەديدار ارقىلى تاماشالاپ, تىلەكشى بولعان ميلليوننان اسا كورەرمەننىڭ دە بۇل جولى ءۇمىتى اقتالمادى. سلوۆەنيا – «استانا ارەنادا» جەڭىلە سالاتىن سلوۆاكيا ەمەس, ال قازاق فۋتبولىن ۇشپاققا شىعارادى دەگەن اديەۆ – قاھارمان ەمەس ەكەن.
ەۋروپا چەمپيوناتتارىنىڭ كەيىنگى ەكى ىرىكتەۋ كەزەڭىندەگى جەرلەستەرىمىزدىڭ ونەرىنە كوز جۇگىرتەر بولساق, ۇلتتىق قۇراما ۇلاندارى ەكى رەتىندە دە العاشقى ويىندا قارسىلاستارىنان ۇپاي العانىن بايقايمىز. ماسەلەن, 2014 جىلدىڭ قىركۇيەگىندەگى ءبىرىنشى كەزدەسۋدە «استانا ارەنادا» لاتۆيا فۋتبولشىلارىمەن تەڭ تۇسكەن بولسا (0:0), 2019 جىلدىڭ ناۋرىزىندا شوتلانديا قۇراماسىن 3:0 ەسەبىمەن تىزە بۇكتىرىپ, ايدى اسپانعا ءبىر-اق شىعارعان ەدى. بىراق ستاتيستيكا ءاردايىم ءبىر قۇراماعا ساتتىلىك اكەلە بەرمەيدى. بۇعان قازاقستان ۇلتتىق قۇراماسىنىڭ بيىلعى ىرىكتەۋدەگى العاشقى ماتچىنىڭ ەسەبى دالەل بولماق.
سلوۆەنيامەن وتكەن ماتچقا توقتالار بولساق, ءبىرىنشى تايمدا قازاقستان قۇراماسى ناتيجە كورسەتۋ جاعىنان الدا بولعانىمەن, ستاتيستيكا بويىنشا باسىمدىق تولىعىمەن سلوۆەنيا قۇراماسىندا بولدى. قوناقتار العاشقى 45 مينۋتتا كوبىرەك دوپقا يەلىك ەتىپ, يگور شاتسكي قورعاعان قاقپاعا بىرنەشە قاۋىپتى سوققى جاسادى. دالىرەك ايتار بولساق, سلوۆەنيالىقتار العاشقى تايمدا دوپتى 62 پايىز ءوز باقىلاۋىندا ۇستاپ, ءبىزدىڭ قاقپاعا 6 مارتە سوققى جاسادى. ونىڭ ۇشەۋى ءدال باعىتتالعان سوققىلار. قىراعى قاقپاشى يگور شاتسكي ءۇش رەتىندە دە مىقتىلىعىمەن دارالانىپ, قاقپاسىن گولدان امان ساقتاپ قالدى. ال قازاقستان قۇراماسىنىڭ فۋتبولشىلارى 38 پايىز دوپپەن جۇرسە دە, ءۇش سوققى جاساپ, سونىڭ بىرەۋىن گولعا اينالدىرا ءبىلدى.
كەزدەسۋدىڭ 24-مينۋتىندا بيىل «اقتوبە» ساپىندا ناتيجەلى ويىن كورسەتىپ جۇرگەن (چەمپيوناتتىڭ ءۇش ماتچىندا ءتورت گول سوققان) 20 جاستاعى شابۋىلشى ماكسيم سامورودوۆ مەرگەندىگىمەن كوزگە ءتۇسىپ, ۇلتتىق قۇراماداعى دەبيۋتتىك گولىن سوقتى. يان ۆوروگوۆسكيدىڭ سول قاپتالدان ءبىر-ەكى ويىنشىنى الداپ ءوتىپ, اۋەلەتە اسىرعان پاسىنان كەيىن سامورودوۆ داڭقتى قاقپاشى يان وبلاكتىڭ قاقپاسىنا باسپەن تاماشا گول سوقتى. سلوۆەنيا قۇراماسىنىڭ بويشاڭ قورعاۋشىلارى بۇل ساتتە ماكسيمدى نازاردان تىس قالدىردى. ايتپاقشى, يان وبلاك «استانا ارەنا» ستاديونىندا وسىمەن ەكىنشى رەت قاقپا كۇزەتتى. ءبىرىنشى مارتە ول 2015 جىلى ەلوردانىڭ «استانا» كلۋبى چەمپيوندار ليگاسىنىڭ توپتىق كەزەڭىندە ويناعاندا يسپانيانىڭ «اتلەتيكوسىمەن» بىرگە استاناعا كەلگەن-ءدى. سول جىلى جۋنيور كابانانگا مەن پاتريك ءتۆۋماسيدىڭ تەپكەن دوپتارىن قايتارا بىلگەن وبلاك بۇل جولى سامورودوۆتىڭ سوققىسىنان كەيىن سان سوعىپ قالدى.
سونداي-اق ماكسيم سامورودوۆتىڭ ويىننىڭ العاشقى مينۋتتارىندا-اق ەسەپتى اشاتىن جاقسى مۇمكىندىگى بولعان ەدى. الايدا دوپتى اشىق تۇرعان ارىپتەسىنە بەرۋدەن گورى ءوزى سوققى جاساۋعا تىرىسقان جاس شابۋىلشىعا بۇل جەردە ازداعان ساتتىلىك جەتىسپەدى. دەسە دە, ۇلتتىق قۇراماداعى تاجىريبەسىنىڭ ازدىعىنا قاراماستان, وسىنداي جاۋاپتى ساتتە ءوزى سوققى جاساۋعا تىرىسقانى, جاس بولسا دا جاۋاپكەرشىلىكتى سەزىنگەنى قۋانتادى. ادەتتە مۇنداي ساتتە كەي فۋتبولشىلار دوپتان تەزىرەك قۇتىلعىسى كەلىپ تۇراتىنىن ءجيى بايقايمىز.
جالپى, ۇلتتىق قۇراماعا اديەۆ كەلگەلى جىگىتتەردە ءوز-وزىنە دەگەن سەنىمدىلىك پايدا بولا باستاعانى بايقالادى. بۇرىنعىداي جاۋاپكەرشىلىكتەن قاشىپ, دوپتى بەتالدى تەبە بەرمەيدى. بايقاساڭىزدار, ءبىزدىڭ فۋتبولشىلار ءتىپتى, ءوز قاقپامىزدىڭ الدىندا دا پاس الماساتىن دارەجەگە جەتتى. ارينە, سەنىمدىلىك بولعان جەردە ناتيجە دە بولاتىنى ايتپاسا دا تۇسىنىكتى جايت.
ويىنعا ورالار بولساق, ءبىرىنشى تايم اياقتالار تۇستا سلوۆەنيا فۋتبولشىلارى بەلسەندىلىگىن ارتتىرىپ, ۇزىلىسكە تەڭ ەسەپپەن شىعۋعا تىرىسىپ باقتى. 37-مينۋتتا يگور شاتسكي جان تسەلاردىڭ گول سوعۋىنا مۇمكىندىك بەرمەسە, ارادا بەس مينۋت وتكەندە يتاليانىڭ «ۋدينەزە» كلۋبىندا وينايتىن ياكا بيولدىڭ جويقىن سوققىسىن قايتارىپ, جانكۇيەرلەردىڭ قوشەمەتىنە يە بولدى. ءسويتىپ, ءبىرىنشى تايم 1:0 ەسەبىمەن قازاقستان قۇراماسىنىڭ پايداسىنا اياقتالدى.
ەكىنشى تايم باستالىسىمەن سلوۆەنيا فۋتبولشىلارى جىلدام گول سوعىپ, تارازى باسىن تەڭەستىرىپ كەتتى. ويىننىڭ 47-مينۋتىندا 23 جاستاعى ادام گنەزدا-چەرين بۇرىشتامادان گول سوقتى. قارسىلاستاردان مۇنداي قارقىن كۇتپەگەن الاڭ يەلەرى ءبىراز ابدىراپ قالدى. قازاقستان فۋتبولشىلارىنىڭ ويىنى جۇرمەي جاتقانىن بايقاعان قوناقتار شابۋىلىن كۇشەيتتى. 70-مينۋتتا الاڭعا تىڭنان قوسىلعان جان ۆيپوتنيك 78-مينۋتتا مەرگەندىك تانىتىپ, سلوۆەنيانى ەسەپتە العا شىعاردى. ماگومەد اديەۆ تەڭ ناتيجەگە قول جەتكىزۋ ءۇشىن ويىنعا ءۇش جىلدان كەيىن ۇلتتىق قۇراماعا ورالعان باۋىرجان يسلامحان مەن تسسكا ويىنشىسى باقتيەر ءزاينۋتدينوۆتى شىعارعانىمەن, ءبارىبىر سلوۆەنيا قۇراماسىنان ۇپاي الا المادىق. قورىتىندى ەسەپ – 2:1.
وسىلايشا, قازاقستان قۇراماسى ەۋرو-24 تۋرنيرىندەگى العاشقى ويىنىندا جەڭىلىپ قالدى. جەرلەستەرىمىز توپتاعى ەكىنشى ويىنىن كەشە گازەت بەتتەلىپ جاتقاندا «استانا ارەنادا» قاتارداعى الەم چەمپيوناتىنىڭ توپتىق كەزەڭىندە ويناعان دانيا قۇراماسىمەن وتكىزىپ جاتتى. بۇل ويىننىڭ قورىتىندىسىن گازەتىمىزدىڭ ەرتەڭگى سانىنان وقي الاسىزدار. ءبىرىنشى تۋردى دانيا فۋتبولشىلارى ءوز الاڭىندا وتكىزىپ, فينليانديانى 3:1 ەسەبىمەن جەڭگەن بولاتىن.
