«قازمەدياداعى» اقشاڭقان اۋىل

ايتۋلى مەرەكەگە اقپارات جانە قوعامدىق دامۋ ءمينيسترى دارحان قىدىرالى قاتىسىپ، جي­نال­عانداردى مەيراممەن قۇتتىقتادى.

– بارشاڭىزدى جەر جارىلىپ كوك شىققان، كوك جارىلىپ كۇن شىققان ۇلىستىڭ ۇلى كۇنى – ناۋرىز مەيرامىمەن قۇتتىقتايمىن! ۇلىس وڭ بولسىن، اق مول بولسىن! ىرگەمىزدەن اتتاعان قويان جىلى جاقسىلىقتىڭ، بەرەكەنىڭ، تازالىقتىڭ جىلى بولسىن! جاڭا جىل ىرىس-بەرەكە، مولشىلىق اكەلسىن! ناۋرىز – ءبىزدىڭ ءتول جاڭا جىلىمىزدىڭ باس­تاۋى، جاڭعىرۋ مەن جاڭا ومىرگە ۇمتىلۋدىڭ نىشانى. كۇن مەن ءتۇن تەڭەلىپ، جارىق قاراڭعىنى جەڭگەن، ەل شاتتىققا كەنەلىپ، جىلۋ سۋىقتى جەڭگەن بۇل قاسيەتتى مەرەكە – بابالارىمىزدان قال­عان ميراس، كونەدەن قالعان ءداس­تۇر. تابيعاتتى تۇلەتىپ، تىرشىلىك­تى شۋاق­قا بولەيتىن كوكتەم مەرە­كەسىن كۇللى جۇرت اسىعا كۇتەتىنى بەلگى­لى. حالقىمىزدىڭ ەجەلگى جىل ەسەبى – ۇلكەن ۇلتتىق مادە­نيەت پەن ونەگەسى مەن تاعىلىمى مول تاريحىمىزدىڭ ايعاعى. مەملە­كەت باسشىسى «ناۋ­رىز مەي­رامىن اتاپ ءوتۋ تۇجى­رىم­داماسىن جاساپ، كوكتەم مەرە­كەسىنىڭ مازمۇنىن بايىتا تۇسكەن ءجون» دەگەن ەدى. بۇل وڭ باستاما ءاز ناۋرىزدى ۇرپاققا ونەگە، ءار ءساتى ەلگە پايدالى بولاتىن يگىلىككە اينالدىردى، – دەدى د.قىدىرالى.

سونداي-اق ول ءسوز اراسىندا، مينيسترلىككە قاراستى ۇجىم­دار سايلاۋ كەزىندە ءتۇرلى الەۋ­مەتتىك زەرتتەۋلەر جۇرگىزىپ، سال­ماقتى ساياسي ساراپتامالار جا­ساعانىن، «Qazaqstan»، «حابار» تەلەارنالارىندا ءتۇرلى دەباتتار ۇيىمداستىرىلىپ، تۇڭعىش رەت 17 ساعاتقا سوزىلعان ونلاين مارافون وتكەنىن ايتتى. ياعني ەلدەگى ساياسي ناۋقان ۋاقىتىندا جاڭالىقتار جەدەل تاراتىلىپ، جۋرناليستەر جارعاق قۇلاعى جاستىققا تيمەي جاقسى جۇمىس اتقارعانىن ەرەكشە اتاپ ءوتتى.

– تاريحي كەزەڭدە وسىنداي ىرگەلى ىستەردىڭ وتۋىنە اتسالىسقان اقپارات سالاسىندا جۇرگەن بارشا ارىپتەستەرىمىزگە جانە مينيسترلىككە قاراستى بارلىق ۇجىمعا العىس ريزاشىلىعىمدى بىلدىرگىم كەلەدى. سىزدەردىڭ قاجىرلى قىزمەتتەرىڭىز بەن سۇبەلى ۇلەستەرىڭىز قانداي قۇرمەتكە بولسا دا لايىق. بۇگىن، مىنە، بارشا ارىپتەستەرىمىز پاندەميادان كەيىن العاش رەت باس قوسىپ، مينيسترلىككە قاراستى ۇيىمدار، قاناتتاس مەكەمەلەرىمىز ارنايى كيىز ءۇي تىگىپ، ناۋرىز مەيرامىنىڭ كوركىن اسىرىپ، تاماشا ءىس-شارا ۇيىمداستىرىپ وتىر. ۇلتتىق ناقىشپەن كيىم كيگەن ازاماتتارىمىز بەن كوكتەمدەي قۇلپىرعان قىز-كەلىنشەكتەرىمىز مەرەكەنىڭ ءسان-سالتاناتىن كەلتىرىپ، جاراسىمىن ارتتىرا تۇسكەندەي. ءبىزدىڭ مينيسترلىك ازاماتتىق قوعامنىڭ دامۋىنا جاۋاپتى بولعاندىقتان، قاستەرلى قۇندىلىقتاردى ۇلىق­تاپ، كوپكە ۇلگى-ونەگە كورسەتۋى زاڭدى­لىق دەپ بىلەمىز. مەيرامعا وراي ۇيىمداستىرىلاتىن ءىس-شارا­لار، سپورتتىق جارىستار ۇجىم­نىڭ ىنتىماعىن، اۋىزبىرلىگىن ارتتىرا تۇسەدى دەپ سەنەمىز. ىزگى داستۇرلەرىمىزدى قاستەرلەپ، بەرەكە-بىرلىگىمىزدى نىعايتار تاعى­لىمدى جيىندار كوپ بولسىن، – دەدى اقپارات جانە قوعامدىق دامۋ ءمينيسترى.

«قازمەديا» ورتالىعىنىڭ ءبى­رىن­شى قاباتىندا ۇيىمداستى­رىل­عان ناۋرىز مەيرامىندا ءار­بىر ۇجىم ءوز كيىز ۇيلەرىن تىگىپ، مول داستار­قان­عا ۇلتتىق تاعام­دارىن قويدى. ماسەلەن، كونفەس­سياارالىق جانە وركەنيەتارالىق ديالوگتى دامىتۋ جونىندەگى ن.نازار­باەۆ ورتالىعى «قوعامدىق كەلىسىم» رمۋ جانە ەتنوساياساتتانۋ ينستيتۋتى بىرلەسىپ تىككەن «بەيبىتشى­لىك اۋىلى» كيىز ۇيىندە بەيبىتشى­لىك پەن كەلىسىم مۇراجايىنىڭ قۇندى جادىگەرلەرى قويىلعان. مۇراجايدىڭ بىرەگەيلىگى ونىڭ كومپوزيتسيالارىنىڭ ەجەلگى داۋىردەن بۇگىنگى كۇنگە دەيىنگى قازاقستان اۋماعىندا بەيبىتشى­لىك، كەلىسىم جانە وركەنيەتتەر مادەنيەتى قۇندىلىقتارىنىڭ قالىپتاسۋ جانە دامۋ تاريحىن تولىق بەينەلەۋىندە.

ساناۋلى ساعات ىشىندە قازاق اۋىلىنا اينالعان ورتالىقتا ۇلتىمىزدىڭ سالت-داستۇرلەرى دارىپتەلىپ، ادەت-عۇرىپتارى «تۇساۋ كەسۋ» مەن «جول تاڭداۋ» كور­سەتىلدى. سونداي-اق «ارقان تارتۋ»، «اسىق اتۋ»، «لاڭگى تەبۋ»، «قول كۇرەس» سەكىلدى ۇلتتىق ويىن­داردان سايىستار دا ۇيىمداس­تىرىلدى. ءىس-شارادا «سارىارقا» حا­لىق اسپاپتار ءانسامبلىنىڭ ورىن­­داۋىندا سىبىزعى، سازسىر­ناي، پري­ماقوبىز، نارقوبىز، قى­لقو­بىز­دا «ىڭعايتوك»، قۇر­مان­­عازىنىڭ «بالبىراۋىن» كۇيى، «اداي» شى­عار­مالارى ورىندالدى.

كەيىن مينيستر ورتالىقتاعى «حابار» ارناسىنىڭ قۇرعان كيىز ۇيىندە قوناق بولىپ، ءبۇلدىرشىن­نىڭ تۇساۋىن كەستى.

ۇلىستىڭ ۇلى كۇنىنە ار­نال­عان ۇلاعاتتى ءىس-شاراعا «قازاق گازەتتەرى» سەرىكتەستىگىنىڭ ۇجىمى دا ەرەكشە ۇلەس قوستى. ۇلت باسىلىمدارىنىڭ باس ەگەسى بۇل جولى اقپارات جانە قو­عام­دىق دامۋ مينيسترلىگىنە قاراس­تى «اقپارات جانە تالداۋ» ورتا­لىعى، «قازمەديا» ورتالىعى جانە «قازكونتەنت» اكتسيونەرلىك قوعامىمەن بىرلەسىپ اقشاڭقان قازاق ءۇي تىككەن بولاتىن. ءسان-سالتاناتى جاراسقان الاڭدا اۋەزدى اسەم ءان شىر­قالىپ، كۇمبىرلەگەن كۇي تىڭ­دال­دى.

ايتپاقشى، «قازاق گازەتتەرى» سەرىك­تەستىگىنىڭ ۇجىمى كەلۋشى­لەرگە ەرەكشە سىي جاسادى. مەرەكە قوناقتارى ارنايى قويىلعان 3D پرينتەرى ارقىلى اسىقتى باسىپ شىعارۋعا كۋا بولدى. العاشىندا وزىق تەحنولوگيا كومەگىمەن قول­ما قول جاسالعان اسىقتى قىزىق­تاۋشىلار قاراپ تۇرماي، ءداستۇرلى اسىق ويىنىنا كىرىسىپ تە كەتتى.

وسى­لاي­­شا، جۋرناليستەر قاۋىمى ناۋرىز مە­رە­كەسىن ءسان-سالتاناتىمەن اتاپ ءوتتى.