ساياسي ناۋقاننىڭ قورىتىندىسىنا وراي وتكەن جيىنعا بەلسەندى جۋرناليستەر ەرقانات كوپجاسار ۇلى, اقبوپە تاڭىربەرگەن, نۇرسۇلتان قۇرمان قاتىستى. ولار قوعامدا پىكىرىن اشىق ءبىلدىرىپ جۇرگەن ءار سالانىڭ بەلسەندى جاستارىنا ۇگىت-ناسيحات كەزىندە اقپاراتتىق قولداۋ كورسەتكەنىن جەتكىزىپ, بلوگ جۇمىسىنىڭ ستاتيستيكاسىن جاريا ەتتى.
– كەشە ءبىز دە كوپپەن بىرگە ىستەلگەن جۇمىستىڭ ناتيجەسى بولا ما دەپ الاڭداپ, تاعاتسىزدانا سايلاۋ قورىتىندىسىن كۇتتىك. ءبىز ەشقانداي ۇيىم نەمەسە ساياسي قوزعالىس ەمەسپىز. «جاستار ءۇنى» ءوتىنىش بىلدىرگەن جاس كانديداتتاردىڭ ۇسىنىلعان پارتيالارىنا قاراماي-اق, بارلىعىنا جاپپاي قولداۋ كورسەتتى. الايدا ءبىز ءوزىمىز ءۇشىن پارتيالىق تىزىمدەردە جاس كانديداتتاردىڭ ۇسىنىلۋى بويىنشا ستاتيستيكا جاسادىق. مىسالى, جالپىحالىقتىق سوتسيال-دەموكراتيالىق پارتيا تىزىمىندەگى 19 ادامنىڭ ىشىندە 1 جاس كانديدات بولسا, «اق جولدان» تۇسكەن 54 ۇمىتكەردىڭ 6-ۋى جاس. ال «بايتاقتاعى» 18 كانديداتتىڭ ىشىنەن 1-ءى جاس ۇمىتكەر. سونداي-اق «Respublica»-دان 25 ادامنىڭ 5-ەۋى, «Amanat»-تىڭ 90-نان 17-ءسى, «حالىق پارتياسىنىڭ» 52-دەن 3-ەۋى, «اۋىل» پارتياسىنىڭ 25-تەن 9-ى ءوتتى. باعدارلاعانىمىزداي, كورسەتكىشتەر جامان ەمەس. ەندى ءبىز بۇل جاس ۇمىتكەرلەردى Exit-رull-دىڭ سوڭعى ناتيجەلەرىنە سايكەس, تىزىمگە ەنگىزىلۋى بويىنشا باقىلايمىز, – دەدى جۋرناليست اقبوپە تاڭىربەرگەن.
جيىندا «جاستار ءۇنى» بلوگىنىڭ باستاماشىل وكىلدەرى ءبىر اي بويى پودكاستتار, بلوگتار, پوستتار جاريالاپ, جاس كانديداتتاردى جان-جاقتى قولداۋ بىلدىرگەنىن جەتكىزدى. بۇعان قوسا ولار بلوگ جۇمىسى ءارى قاراي دا جالعاساتىنىن ايتتى.
– بلوگ 20 اقپاندا الماتى قالاسىندا قۇرىلدى. بارلىق پارتيانىڭ تىزىمىندە كىمدەر بارىن الدىن الا قارادىق, زەردەلەدىك. پارتيا قاتارىنداعى جاستاردىڭ ۇلەسى قانشالىقتى؟ جاستارعا بولىنگەن 30 پايىز كۆوتا شارتى قانشالىقتى ورىندالىپ جاتقانىنا نازار اۋداردىق. ءبىز ءماجىلىس پەن ءماسليحاتتاردا ورىنداردى كۆوتانى جابۋ ءۇشىن قولدانباي, جاس كانديداتتارعا قولداۋ كورسەتۋ يدەياسىن العا تارتتىق. بۇگىندە 100-دەن استام جاس ۇمىتكەرگە قولداۋ كورسەتىلدى. ەڭ باستىسى, ءبىز ولاردى پارتيالار نەمەسە سالالار بويىنشا بولمەي, بارلىق جۇگىنگەن كانديداتتارعا كومەكتەستىك. باستى شارتىمىز – 35 جاسقا دەيىنگى جاستار بولۋى كەرەك ەدى. ارينە, ءبىزدىڭ اۋديتوريامىز بار بولعاندىقتان, نەگىزىنەن الەۋمەتتىك جەلىلەردە اقپاراتتىق قولداۋ كورسەتىلدى. جۇمىسىمىزدىڭ ماڭىزدى كورسەتكىشتەرىنىڭ ءبىرى – جاس كانديدات, قوعامدىق پىكىر كوشباسشىسى داۋلەت مۇقاەۆتىڭ جەڭىسى, – دەپ اتاپ ءوتتى جۋرناليست ەرقانات كوپجاسار ۇلى.
«جاستار ءۇنى» جاس كانديداتتاردى قولداۋ بلوگىنىڭ وكىلدەرىنىڭ ەسەپ بەرۋ ءباسپاسوز بريفينگىنە پارلامەنت ءماجىلىسى دەپۋتاتتىعىنا كانديدات داۋلەت مۇقاەۆ تا قاتىستى.
– مىنا حاتتامالاردىڭ بارلىعىن قاراپ وتىرساق, 167 وكرۋگتىڭ باسىم بولىگىنىڭ بارلىعىندا جەڭىسكە جەتكەنبىز. سوندىقتان 10-15 مينۋت بۇرىن الەۋمەتتىك جەلىگە سالىپ, ءسۇيىنشىمدى سۇراپ تاستادىم. بىراق رەسمي مالىمەتتى دە كۇتەمىز, – دەدى داۋلەت مۇقاەۆ.
جالپى بۇل جولعى سايلاۋ بيلىك جۇيەسىنە وزىندىك وزگەرىستەرىن ەنگىزدى. ويتكەنى Exit-poll ناتيجەسى بويىنشا ساياسي دوداعا تۇسكەن جەتى پارتيانىڭ التاۋى پارلامەنتكە بارۋى مۇمكىن. ونىڭ ىشىندە جىلدار بويى وسىنى ماقسات تۇتقان «اۋىل» مەن از عانا ۋاقىتتا قۇرامىن جاساقتاپ, تارتىسقا تۇسكەن «Respublica» پارتيالارى بار. سونداي-اق بۇل ەكى ەلەكتوراتتىڭ – اۋىل تۇرعىندارى مەن جاستاردىڭ پوزيتسيالارىنىڭ نىعايا تۇسكەنىن كورسەتەدى.
– جاس دەپۋتاتتارعا ۇلكەن جاۋاپكەرشىلىك جۇكتەلىپ وتىر. ويتكەنى ءوز بىلىمىمەن, كۇشىمەن العا سۋىرىلىپ شىققان, وزىندىك كونتسەپتسياسى بار جاستاردى جاس سايلاۋشىلار, قوعامدىق پىكىر كوشباسشىلارى قولدايدى. ولار شىنىمەن دە پارلامەنتكە جاڭاشىلدىق اكەلەتىنىنە جانە زاڭ شىعارۋشى ورگانداردى «وياتا الاتىنىنا» سەنىمدىمىز, – دەدى جۋرناليست نۇرسۇلتان قۇرمان.
ايتپاقشى, ەۋرازيا ينتەگراتسيالىق ينستيتۋتىنىڭ ساراپتاماسىنا سايكەس, پارلامەنت ماجىلىسىنەن «Amanat» پارتياسى 38-40 ورىن, «اۋىل» پارتياسى 8 ورىن, «Respublica» پارتياسى 6 ورىن, «اقجول» پارتياسى 6 ورىن, «حالىق پارتياسى» 5 ورىن, جسدپ 4 ورىن الۋعا ءتيىس.
