ەڭ العاش 2011 جىلى تۇساۋى كەسىلگەن قازاق كۇرەسىنەن «قازاقستان بارىسى» جوباسى از ۋاقىتتا اسقان تانىمالدىققا يە بولىپ, ءاپايتوس بالۋاندارىمىزدىڭ دۋماندى باسەكەسىنە اينالىپ شىعا كەلدى. ۇلتتىق سپورت دەسە ىشكەن اسىن جەرگە قوياتىن ءتول سپورتتىڭ جاناشىرلارى ناعىز دەلەبەنى قوزدىراتىن تاماشا بەلدەسۋلەردىڭ كۋاسى بولدى. سونداي-اق اينالدىرعان 10 جىلدان اسا ۋاقىتتىڭ ىشىندە بۇل جوبا ەلىمىزدەگى تالاي بىلەكتى بالۋانداردىڭ جۇلدىزىن جاعىپ بەرگەنىن دە ايتا كەتكەن ءجون. ال سول بالۋاندار ءوز كەزەگىندە ءتول كۇرەسىمىزدىڭ بۇگىنگىدەي كەڭ قانات جايۋىنا ۇلەسىن قوستى. اتاپ ايتقاندا «قازاقستان بارىسى» جوباسىنىڭ تۇڭعىش جەڭىمپازى, الماتى وبلىسىنىڭ بالۋانى – ۇلان رىسقۇل, اتالعان جوبانىڭ ءۇش دۇركىن جەڭىمپازى, بۇگىنگى تىلمەن ايتقاندا, قازاقشا كۇرەستىڭ امباسسادورىنا اينالعان جامبىلدىق جامپوز بەيبىت ىستىباەۆ, «قازاقستان بارىسى» جوباسىنىڭ ەكى دۇركىن جەڭىمپازى شىعىس قازاقستان وبلىسىنىڭ داڭقتى بالۋانى ايبەك نۇعىماروۆ, ءبىر-ءبىر رەتتەن ۇزدىك شىققان تاعى ءبىر شىعىسقازاقستاندىق مۇحيت تۇرسىنوۆ, قاراعاندىلىق ەرجان شىنكەەۆ, قىزىلوردالىق ەلامان ەرعاليەۆ, الماتىلىق داۋرەن نۇرالينوۆ پەن قىزىلوردالىق ماقسات يساعابىلوۆ جانە تاعى دا باسقا بالۋاندار ءتول كۇرەسىمىزدى تورگە وزدىردى. سونىمەن قاتار قازاق كۇرەسىنىڭ الەمدىك سپورت رەتىندە مويىندالۋىنا «الەم بارىسى», «ەۋرازيا بارىسى» سەكىلدى تۋرنيرلەر زور سەپتىگىن تيگىزگەنىن دە ايتا كەتۋگە ءتيىسپىز.
جۋىردا عانا جەتىسۋ وبلىسىنىڭ دەنەشىنىقتىرۋ جانە سپورت باسقارماسىنىڭ باسشىسى بولىپ تاعايىندالعان العاشقى «بارىس» ۇلان رىسقۇل «قازاقستان بارىسى» جوباسى ۇلتتىق سپورت تۇرلەرىنىڭ جاندانۋىنا ۇلكەن سەرپىلىس اكەلگەنىن ايتادى.
– قازاق كۇرەسىنەن «قازاقستان بارىسى» جوباسى ەلىمىزدەگى ۇلتتىق سپورت تۇرلەرىنىڭ جاڭا دەڭگەيگە كوتەرىلۋىنە, اسىرەسە ءتول كۇرەسىمىزدىڭ قارىشتاپ دامۋىنا زور ۇلەسىن تيگىزدى. كەيدە «ەگەر, بۇل جوبا بولماعاندا, قازاق كۇرەسى ءالى كۇنگە دەيىن توي-تومالاقتىڭ, اس-جيىنداردىڭ دەڭگەيىنەن اسا الماس پا ەدى», دەپ تە ويلايمىن. سوندىقتان وسى جوبانى قولعا الىپ, قازاق كۇرەسىنىڭ بولاشاعىنا داڭعىل جول اشىپ بەرگەن جاندارعا ەرەكشە العىسىمدى بىلدىرەمىن. سونداي-اق بۇل جوبا ۇلتتىق سپورتتىڭ كەز كەلگەن ءتۇرىن دۇنيە جۇزىنە دامىتۋعا بولاتىنىن دالەلدەپ بەردى. الداعى ۋاقىتتا وزگە دە ۇلتتىق سپورت تۇرلەرىنىڭ تىزگىنىن ۇستاپ وتىرعان جاندار «قازاقستان بارىسى» جوباسىن نەگىزگە الا وتىرىپ, ءتول سپورتىمىزدى ودان ءارى جانداندىرسا ەكەن دەيمىن. الەمدە قانشا جەردەن جاھاندانۋ ءجۇرىپ جاتسا دا, ءالى كۇنگە دەيىن ۇلتتىق سپورتقا دەگەن سۇرانىستىڭ بار ەكەنىنە كوز جەتكىزدىك. ۋاقىتتىڭ وزىنە ۋاقىت جەتپەي جاتقان زاماندا «قازاقستان بارىسى» جوباسى 10 مىڭنان اسا ۇلتتىق سپورت جاناشىرلارىن ءبىر سپورت كەشەنىنە جيناپ, 6-7 ساعات بويى بوزكىلەمگە تەلمىرتتى. قۇدايعا شۇكىر, اتا-بابامىزدان مۇرا بولىپ قالعان ۇلتتىق ويىندارىمىز جەتەرلىك قوي. كوكپار, تەڭگە ءىلۋ, اسىق اتۋ, ساداق اتۋ جانە تاعى باسقا تۇرلەرىنىڭ نەگىزىن ساقتاي وتىرىپ, جاڭا زامانعا ساي ەتىپ وتكىزسە بولادى, دەيدى ول.
سونداي-اق ۇلان رىسقۇل «قازاقستان بارىسى» ءتۋرنيرى وزىنە تانىمالدىق سىيلاعانىن جانە ءومىرىن كۇرت وزگەرتكەنىن جاسىرمايدى.
– وسىدان 12 جىل بۇرىن جەڭىمپاز اتانسام دا, ءالى كۇنگە دەيىن تۋرنيردەگى جەڭىسىمدى, سول كەزدەگى قۋانىشىمدى سوزبەن ايتىپ جەتكىزە المايمىن. دزيۋدو كۇرەسىمەن 15 جىل اينالىسقانىممەن, مەنى ەلگە تانىتقان «قازاقستان بارىسى» جوباسى. ءومىرىمدى كۇرت وزگەرتتى دەپ ايتسام ارتىق بولماس. قازاقستاننىڭ قاي بۇرىشىنا بارسام دا, قوناقجاي حالقىمىز مەنى ۇلكەن قۇرمەتپەن قارسى الادى. كوبىسى «بالام ساعان ۇقساعان, ەلىمىزدىڭ اتىن الەمگە تانىتاتىن بالۋان بولسىن دەپ سپورتقا, قازاقشا كۇرەس ۇيىرمەسىنە بەردىم», دەپ جاتادى. بۇل – حالقىمىزدىڭ بىزگە دەگەن پەيىلى, ىقىلاسى دەپ بىلەمىن. وسىنداي جىلى سوزدەردى ەستىپ, سپورتقا بەكەر كەلمەگەن ەكەنبىز عوي دەگەن ويعا قالامىز. ءبىر بالانىڭ دۇرىس جولعا تۇسۋىنە, سپورتقا كەلۋىنە سەپتىگىمىز ءتيىپ جاتسا, بىزگە ودان اسقان باقىتتىڭ كەرەگى جوق شىعار, ءسىرا! دەيدى جوبانىڭ تۇڭعىش جەڭىمپازى.
ال «قازاقتان بارىسىندا» ءۇش رەت جەڭىمپاز اتانامىن دەپ حالىق الدىندا ۋادە بەرىپ, ەر جىگىتكە ءتان مىنەز كورسەتىپ, ۋادە ۇدەسىنەن شىققان بەيبىت ىستىباەۆ قازاق كۇرەسىنە بەرگەنىمىزدەن العانىمىز كوپ بولدى, دەيدى.
– ەلىمىزدە ءتول كۇرەسىمىزدەن «قازاقستان بارىسى» دەگەن ءىرى تۋرنير ۇيىمداستىرىلادى ەكەن دەگەندە ەرەكشە قۋانعانداردىڭ ءبىرى مەن ەدىم. ويتكەنى بالا كەزىمنەن بەرى كۇرەسپەن شۇعىلدانىپ كەلەمىن. سپورتشى بولعان سوڭ, جەتىستىككە قول جەتكىزۋىڭ كەرەك, جاڭا بەلەستەردى باعىندىرۋىڭ كەرەك. «قازاقستان بارىسى» جوباسى باستالعانعا دەيىن ءتۇرلى جيىن-تويلاردا كۇرەستىك. العاشىندا تەلەديدار, كىلەم ءۇشىن دە بەلدەسكەنمىن. تۇيە ءۇشىن دە كۇرەسكەن كەزىم بولعان. بىراق كەيىن تەك كولىك ءۇشىن عانا بەلدەسەمىن دەپ شەشتىم. سەبەبى ول كەزدە مەن وزىمە وتە سەنىمدى بولاتىنمىن. سپورتشى مايدالانباۋى كەرەك دەپ ويلادىم. قالتامدا نان الىپ جەيتىن اقشام بولماسا دا, قارجىعا قاتتى مۇقتاج بولىپ تۇرسام دا, ءوزىمنىڭ ۇستانىمىمنان تايماي, جارىستارعا قاتىسپايتىنمىن. وزىمە تەك ءىرى جۇلدە ءۇشىن كۇرەسەمىن دەپ شارت قويعان بولاتىنمىن. ءسويتىپ جۇرگەندە «قازاقستان بارىسى» جوباسى ۇيىمداستىرىلىپ, ءوزىم ءۇشىن جاڭا بەلەستى باعىندىرۋعا تىرىستىم. ءتىپتى, وزىمە سەنىمدى بولعانىم سونشالىق, «بۇل جارىستا مەن جەڭەمىن, قارسىلاستارىما تۋرنيرگە كەلىپ اۋرە بولماي-اق قويىڭدار», دەپ تە ايتقانمىن. ويتكەنى تۇڭعىش «بارىس» اتانۋ ارمانىم ەدى, امال نەشىك, العاشقى تالپىنىسىمدا تۇعىردىڭ بيىك ساتىسىنان كورىنە المادىم. ەشتەن كەش جاقسى دەيدى عوي. كەلەسى جىلعى دودادا ءوز مىقتىلىعىمدى دالەلدەدىم. جەڭىستىڭ ءتاتتى ءدامىن سەزىنە العانىما قۋانىشتىمىن. ءوز الدىما «قازاقستان بارىسى» تۋرنيرىندە ءۇش مارتە توپ جارىپ, سول ويىمدى جۇزەگە اسىرعاننان كەيىن سپورتپەن قوش ايتىسامىن دەپ ماقسات قويعان بولاتىنمىن. قۇدايعا شۇكىر, ەل الدىندا ماسقارا بولماي, ماقساتىما قول جەتكىزدىم, دەگەن ەدى ب.ىستىباەۆ ءبىر سۇحباتىندا.
قىسقاشا ايتقاندا, «قازاقستان بارىسى» جوباسى از ۋاقىتتىڭ ىشىندە ءتول كۇرەسىمىزدىڭ تىنىسىن اشىپ قانا قويماي, وسكەلەڭ جاس ۇرپاققا ۇلتتىق قۇندىلىقتارىمىزدى دارىپتەۋگە, سالاماتتى ءومىر سالتىن ۇستانىپ, بۇقارالىق سپورتتى سەرىك ەتۋىنە ايتارلىقتاي ۇلەسىن قوستى.
