جۇرت جاڭا جىلدى ادەتتە جەلتوقسان ايىنىڭ 31-ءى كۇنى تۇنگى ساعات 12.00-دە كۇتەتىن بولسا, «حابار» تەلەارناسى «تاڭعاجايىپ ناۋرىز» جوباسىنىڭ اياسىندا كۇنمەن تالاسىپ كەلگەن جاڭا جىلدى بيىل تاڭعى 06.00-دە قارسى الادى. وسى كۇندەرى ارنايى تەاترلاندىرىلعان قويىلىم مەن كونتسەرتتەردى تاماشالاي الاسىزدار. تاڭدى قارسى الىپ, جاڭا كۇننىڭ كەلۋىمەن حالىقتى قۇتتىقتاۋ تۇركى جۇرتىنىڭ رۋحاني بەسىگى – تۇركىستانداعى تابيعات اياسىندا ارنايى جاساقتالعان اۋىلدا وتەدى. مەرەكەلىك شوۋ ءۇشىن بەزەندىرىلگەن باس ساحنا ەڭ وزىق زاماناۋي تەحنولوگيامەن جابدىقتالعان. استاناداعى باستى ەفيردى ءۇش جۇرگىزۋشى – تۇرسىنبەك قاباتوۆ, ءمولدىر دوسپاەۆا جانە الماس توعاي تىزگىندەيدى. ال تۇركىستانداعى ءىس-شارانى قانات ءالجاپپاروۆ پەن قايرات ادىلگەرەي جۇرگىزەدى.
تەلەكوپىر «جىل باسىنا تالاسقان جانۋارلار» ەرتەگىسىندەي قويىلىممەن باستالادى. تۇيەگە مىنگەن قانات ءالجاپپاروۆ جاڭا جىلدى ءبىرىنشى كورمەككە ۇمتىلادى. وسى ساتتەگى ەكى جۇرگىزۋشىنىڭ امانداسۋى جاراسىمدى ازىلمەن استاسىپ, ەرەكشە كورىنىسكە ۇلاسادى. ونەرپازدار اننەن شاشۋ شاشىپ, مەرەكەنى كۇيمەن كومكەرەدى. اقشاڭقان كيىز ۇيلەر تىگىلگەن ايماقتا قولونەر شەبەرلەرى ءتۇرلى ۇلتتىق بۇيىمداردى جاساۋدىڭ ۇلگىسىن كورسەتەدى. مەرەكەلىك ەفيرگە جىل ۇزدىكتەرى قوناق بولىپ كەلەدى. جۇرگىزۋشىلەر ەلدەگى ماڭىزدى قوعامدىق وقيعالاردا جارقىراي كورىنگەن ازاماتتارمەن سۇحباتتاسىپ, اسەرگە تولى اڭگىمە وربىتەدى.
ناۋرىز – تۇركى ەلدەرىنىڭ ورتاق مەيرامى. ءار ۇلتتىڭ وزىنە ءتان سالت-ءداستۇرى بار. سول سەبەپتى ەلىمىزدەگى وزگە ەتنوستاردىڭ ناۋرىز مەيرامىن تويلاۋ ەرەكشەلىكتەرىمەن تانىسۋعا دا مۇمكىندىك بولادى.
قۇرمەتتى كورەرمەن, ناۋرىز مەرەكەسىن «حابار» تەلەارناسىمەن بىرگە قارسى الىڭىزدار!
«حابار» اگەنتتىگى» اق
