سونىمەن سايلاۋ دا ءوتتى. تاڭداۋ جاساعان كۇن تاريحقا اينالادى. ال «كىمدى تاڭدادىق؟ نە ءۇشىن تاڭدادىق؟» دەگەن سۇراق ۇنەمى ءتىل ۇشىندا تۇرا بەرەدى. سونداي-اق بۇل سايلاۋ سونشالىقتى ماڭىزدى ما دەگەن دە وي كەلەدى. اقيقاتىندا, بۇل سايلاۋدا وتانداستارىمىز ادىلەتتى قازاقستاننىڭ باقۋاتتى تۇرمىسى ءۇشىن ايانباي ەڭبەك ەتەتىن ۇمىتكەرلەردى تاڭداپ الدى. تاڭداۋ مەن تالعام تۋرالى تالاسپايدى, دەگەنمەن كوزى اشىق كوپشىلىك كانديداتتارعا داۋىس بەرە وتىرىپ, ەلدىڭ الداعى 5 جىلداعى زاڭ مەن ادىلدىك جولىنداعى دامۋىنا دەگەن جاۋاپكەرشىلىكتى دە ارقالايتىنى انىق.
وسى جەردە ادىلەتتى قازاقستان قۇرۋ جولىنداعى جۇمىس ارىدەن باستالعانىن دا ايتۋىمىز كەرەك. ونىڭ ەگجەي-تەگجەيىن مەملەكەت باسشىسى قاسىم-جومارت توقاەۆ بۇعان دەيىن جاريالاعان جولداۋىندا انىق ايتتى. ارينە, ۋاقىتتىڭ قىسقالىعىنا قاراماستان, قىرۋار جۇمىس ىستەلدى.
ەلدە رەفەرەندۋم ءوتىپ, قابىلداعان رەفورمالاردى ىسكە اسىرۋ قارقىن الدى. كونستيتۋتسيالىق رەفورما قابىلداندى. پرەزيدەنت سايلاۋى ءوتتى. ۇلتتىق قۇرىلتاي قۇرىلدى جانە باسقا دەگەندەي... وسىلاي باستالعان ۇلى مۇرات جولىنداعى جۇمىس وتكەن سايلاۋدىڭ ماقساتى مەن مىندەتىن ايقىنداپ بەرگەن ەدى. مەملەكەت باسشىسى بىلتىرعى جولداۋىندا ارالاس سايلاۋ جۇيەسىن ەنگىزۋدى باستاما ەتىپ كوتەرىپ, پروپورتسيونالدى جانە ماجوريتارلىق سايلاۋ جۇيەسىن بىرگە قولدانۋدى ۇسىندى. بۇل سايلاۋدىڭ بۇرىنعى سايلاۋلاردان وزگەشەلىگى دە وسىندا. ياعني وتكەن سايلاۋدى قازاقستان تاريحىنىڭ جاڭا كەزەڭى دەپ ايتۋعا تولىق قۇقىلىمىز. بۇل – ەلدەگى ساياسي رەفورمالاردىڭ مارەگە جەتكەنىن ايعاقتايدى. جاقىندا ول تۋرالى مەملەكەت باسشىسى دا ايتقان بولاتىن.
ء«بىزدىڭ بولاشاعىمىز – ايقىن, ناقتى جوسپارىمىز بار. ءماجىلىس جانە ءماسليحاتتار سايلاۋى – بيلىك ينستيتۋتتارىن جاڭارتۋ جۇمىسىنىڭ قورىتىندى كەزەڭى. وسىلايشا, بيلىك جان-جاقتى رەفورمالاردى جالعاستىرۋ ءۇشىن جاڭا سەنىم مانداتىنا يە بولادى. ەلىمىزدى دامىتۋ جولىندا تىڭ باستامالار كوتەرىپ, ونى تابىستى جۇزەگە اسىرۋ – باستى مىندەت. قازىر جەتىستىككە ءماز بولىپ وتىراتىن زامان ەمەس. جۇمىستى تىڭ قارقىنمەن جالعاستىرۋ كەرەك», دەدى پرەزيدەنت.
وسى جەردە بۇل سايلاۋ سونشالىقتى ماڭىزدى ما ەدى دەگەن ساۋالدىڭ جاۋابى تابىلادى: ماڭىزدى, وتە ماڭىزدى! ويتكەنى قازاقستان قوعامى بۇل سايلاۋ ءۇشىن وتە قىمبات قۇن تولەدى. ءبىز ەندى «قاسىرەتتى قاڭتار» وقيعاسىنىڭ ۇمتىلماۋىنا عانا ەمەس, قايتالانباۋىنا دا جاۋاپتىمىز. ونىڭ جاۋابى – ادىلەت سالتانات قۇرعان ەلدە ءومىر ءسۇرۋ بولسا كەرەك.
مارەگە جەتكەن ءماجىلىس پەن ءماسليحات دەپۋتاتتارىن سايلاۋ – ادىلدىك جولىنداعى تاعدىرشەشتى ارەكەتتىڭ ايعاعى.
