كوپ كەشىكپەي اباي وبلىسى قۇرىلدى. بۇل اباي قۇنانباي ۇلى, شاكارىم قۇدايبەردى ۇلى, مۇحتار اۋەزوۆ سياقتى ۇلى تۇلعالارىمەن قازاقتىڭ اتىن الەمگە ايگىلەگەن قاسيەتتى توپىراقتى قاشان دا قاستەرلەۋگە شاقىرعان باتىل قادام ەدى. مۇنىڭ الدىندا پرەزيدەنت سەمەي قالاسىن ەلىمىزدىڭ تاريحي ورتالىعى دەپ تانۋ جونىندە باستاما كوتەرگەنى دە بارشاعا ايان. تاعى ءبىر اتاپ وتەرلىگى, اباي وبلىسىنىڭ شىعىس قازاقستاننان ءبولىنىپ, ۇلى اقىن ەسىمىن يەلەنۋى – م.اۋەزوۆتىڭ تۋعانىنا 125 جىل تولۋىمەن ورايلاس كەلىپ, پرەزيدەنت شەشىمىنىڭ ادىلەتتىلىگىن تانىتا ءتۇستى. ۇلى جازۋشىنىڭ مەرەيتويىنا وراي اباي وبلىسىنا كەلگەن ساپارىندا مۇحتار اۋەزوۆ پەن ابايتانۋشى قايىم مۇحامەدحانوۆقا ارنالعان «ۇستاز بەن شاكىرت» ەسكەرتكىشىنىڭ اشىلۋىنا قاتىسقانى دا سەمەيلىكتەر ءۇشىن تاريحي وقيعا بولىپ ەستە قالدى. پرەزيدەنت سول ايتۋلى ءىس-شارادا قوس تۇلعانىڭ قازاق رۋحانياتىنداعى الار ورنىن دا ەرەكشە اتاپ وتكەن ەدى.
مەملەكەت باسشىسىنىڭ «بۇل – ۇستاز بەن شاكىرت, اعا مەن ءىنى اراسىنداعى رۋحاني بىرلىكتىڭ سيمۆولى. شىن مانىندە, قوس الىپتى بولە-جارىپ قاراۋ مۇمكىن ەمەس. ولار اباي مۇراسىن زەرتتەپ, دارىپتەۋگە ولشەۋسىز ەڭبەك ءسىڭىردى. ءتول ادەبيەتىمىزدى جاڭا بەلەسكە كوتەردى. مۇحتار اۋەزوۆ ابايدى, اباي ارقىلى قازاقتى بۇكىل الەمگە تانىتتى. ۇلى ويشىلدىڭ كوركەم بەينەسىن سومداپ, ونىڭ اسىل مۇراسىن ادامزاتتىڭ ورتاق قازىناسىنا قوستى. جازۋشىنىڭ ءار تۋىندىسى جۇرتىمىزدىڭ جۇرەگىنەن وشپەس ورىن الدى. مۇحتار اۋەزوۆ – الەم ادەبيەتىنىڭ شىڭىنا كوتەرىلگەن قالامگەر. ال قايىم مۇحامەدحانوۆ – ۇلى جازۋشىنىڭ جاقىن سەرىگى ءارى شاكىرتى», دەپ تەبىرەنە سويلەگەنى جۇرت جۇرەگىنە سەنىم ۇيالاتتى.
مىنە, سودان بەرى ءبىر جىلدى ارتقا تاستاعان بۇگىنگى اباي وبلىسىنىڭ سودان بەرگى دامۋ باعىتى ايقىندالدى ما؟ پرەزيدەنت جولداۋى نەگىزىندەگى تاپسىرمالاردىڭ ورىندالۋ بارىسى قالاي؟ بۇعان تەك جەرگىلىكتى اتقارۋشى بيلىك قانا ەمەس, ۇكىمەتتىڭ قۇزىرلى ورگاندارى دا جاۋاپتى ەكەندىگى تۇسىنىكتى.
ءبىر انىعى, «اباي وبلىسىن دامىتۋدىڭ 2023-2027 جىلدارعا ارنالعان الەۋمەتتىك-ەكونوميكالىق دامۋىنىڭ كەشەندى جوسپارى» جىل باسىنداعى ۇكىمەت وتىرىسىندا قارالىپ, ماقۇلدانعان. ونى كورسەتىلگەن جىلدار مەرزىمىندە ورىنداۋ ءۇشىن 1,9 ترلن تەڭگە قاراجات جۇمسالۋى قاجەت. ۇلتتىق ەكونوميكا ءمينيسترى الىبەك قۋانتىروۆتىڭ مالىمدەۋىنشە, بۇل دامۋ جوسپارىنا اباي وبلىسى جەرىندەگى پايدالى قازبالاردى انىقتاۋ ماقساتىنداعى گەولوگيالىق زەرتتەۋلەردى, اۋىل شارۋاشىلىعى, تۋريزم, ءتۇرلى كولىك قاتىناسى سياقتى ماڭىزدى سالالارعا قان جۇگىرتۋمەن قاتار 102 نەگىزگى باعىتتى جۇزەگە اسىرۋ جوباسى ەنىپ وتىر. مينيستر ءا.قۋانتىروۆ ءوز سوزىندە «جاڭادان ءبىلىم بەرۋ, دەنساۋلىق ساقتاۋ, مادەنيەت جانە سپورت نىساندارىن اشۋ, سونداي-اق تۇرعىن ءۇي-كوممۋنالدىق شارۋاشىلىقتى دامىتۋ جونىندەگى شارالاردى ىسكە اسىرۋ جوسپارلانىپ وتىر. 2023-2027 جىلدارى ءوڭىر ەكونوميكاسىنا شامامەن 1,9 ترلن تەڭگە ينۆەستيتسيا تارتىلادى: 515 ملرد – رەسپۋبليكالىق بيۋدجەت, 110 ملرد – جەرگىلىكتى بيۋدجەت, 1,3 ترلن – جەكە ينۆەستيتسيالار, 22 ملرد ءبىلىم بەرۋ ينفراقۇرىلىمىن قولداۋ قورىنان بولىنەدى», دەگەن بولاتىن. ءسوز جوق, ۇكىمەت وتىرىسىندا ايقىندالعان جوسپار جاڭادان اشىلعان وبلىستىڭ بولاشاعىنا وڭ ىقپالىن تيگىزەرى انىق.
ال اباي وبلىسىنىڭ اكىمى نۇرلان ۇرانحاەۆتىڭ ۇكىمەت وتىرىسىندا جاساعان بايانداماسىندا ايتىلعانىنداي, بەس جىلدان كەيىن, ياعني 2028 جىلعا قاراي وڭىردە ونەركاسىپ ءونىمىن ءوندىرۋ كولەمى 1,4 ترلن تەڭگەگە, ال اۋىل شارۋاشىلىعىنىڭ جالپى ءونىمى 725,9 ملرد تەڭگەگە دەيىن ارتادى. وبلىس قانا ەمەس, مەملەكەت ەكونوميكاسىنىڭ وركەندەۋى ءۇشىن دە ماڭىزى زور تۋريزم سالاسىن دامىتۋ ماقساتىندا سەمەيدە ەكى جاڭا ساۋدا ويىن-ساۋىق ورتالىعى, قوناقۇي كەشەنى بوي كوتەرمەك. جۇرت جازعى ماۋسىمدا جىل سايىن اعىلاتىن الاكول جاعالاۋىندا كەشەندى دەمالىس بازاسىن سالۋ دا جوسپارلانىپ وتىر.
وبلىستى دامىتۋ جوباسىندا الىپ قۇرىلىستاردى جۇزەگە اسىرۋ دا قامتىلعانىن اتاپ وتكەن ءجون. ماسەلەن, اياگوز – باقتى – قىتاي شەكاراسى باعىتىندا وتەتىن تەمىرجول ۋچاسكەسىن سالۋ, «ايدارلى» مىس-كەن ورنىن يگەرۋ, ەت كومبيناتى, «قۇرعاق» پورت جانە لوگيستيكالىق پارك سياقتى ءىرى جوبالاردى ىسكە اسىرۋ ارقىلى 14 مىڭ جاڭا جۇمىس ورىندارى اشىلىپ, حالىقتىڭ كۇنكورىس دەڭگەيى ناقتىلانىپ, تۇرمىسىن جاقسارتۋعا جول اشىلماق.
بۇگىندە حالىق دەنساۋلىعىن وڭالتۋ, زامان تالابىنا ساي مەديتسينالىق قىزمەتپەن قامتۋدىڭ ماسەلەسىن شەشۋ قاشاندا ماڭىزدى ەكەندىگى تۇسىنىكتى. وسى ورايدا «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا اباي وبلىسى بويىنشا 65 مەديتسينالىق نىسان سالۋ جوسپارلانعان. ونىڭ ىشىندە 57 نىسان بيىل پايدالانۋعا بەرىلمەك, ونىڭ 34-ءى مەديتسينالىق پۋنكت, 14-ءى دارىگەرلىك امبۋلاتوريا بولسا, 9 فەلدشەرلىك-اكۋشەرلىك پۋنكت تە جىل سوڭىنا دەيىن ەل يگىلىگىنە قىزمەت ەتپەك. انا مەن بالا دەنساۋلىعىنا نازار اۋدارۋ ماقساتىندا وتكەن جىلى ءبىر تاماشا ءىستىڭ تۇساۋ كەسىلدى. اباي وبلىسىندا ەندى ءبىر جاستاعى بالالارعا مرت زەرتتەۋلەرىنەن ءوتۋ قولجەتىمدى. ويتكەنى ەرەكشە كۇتىمدى قاجەت ەتەتىن بالالاردىڭ انالارى ءوڭىر باسشىسى نۇرلان ۇرانحاەۆپەن كەزدەسكەندە سابيلەردى دياگنوستيكادان وتكىزۋ ماسەلەسىن شەشۋدى سۇراعان ەدى. كەزدەسۋ بارىسىندا بۇرىن ولار مرت-عا ءتۇسۋ ءۇشىن باسقا قالالارعا بارۋعا ءماجبۇر بولعانىن جاسىرمادى. انالار جايىن تۇسىنگەن وبلىس اكىمى ماسەلەنى بىردەن نازارعا الىپ, 5 ايدىڭ ىشىندە شەشىلۋىن جۇزەگە اسىردى.
جوعارىدا ايتىلعان جايلاردان بولەك بيىل وبلىس ورتالىعى سەمەي قالاسىن كوركەيتۋ جۇمىسى قارقىندى جۇرگىزىلمەك. بيىل سەمەي قالاسىندا 32 كوپپاتەرلى تۇرعىن ءۇيدىڭ قاسبەتتەرى جوندەۋدەن وتەدى. سونىمەن قاتار شاكارىم قۇدايبەردى ۇلى, باۋىرجان مومىش ۇلى, قانىش ساتباەۆ كوشەلەرىندەگى كوپقاباتتى ۇيلەر قابىرعاسىنا اتالعان تۇلعالاردىڭ بەينەلەرى مەنمۇندالاپ تۇراتىن مۋرالدار سالىنادى. سونىمەن قاتار №1 شاعىن اۋدانداعى بىرنەشە ءۇيدىڭ قابىرعالارىنا اباي وبلىسىنىڭ كورىكتى جەرلەرىنىڭ سۋرەتتەرى بەينەلەنىپ, قالا كەلبەتىنىڭ تاريحي ماڭىزى دا ارتا تۇسپەك.
ءساتجان قاسىمجان ۇلى,
جۋرناليست
اباي وبلىسى
