بۇل ساياسي ناۋقاننىڭ ەڭ باستى ەرەكشەلىگى – ءماجىلىس دەپۋتاتتىعىنا ۇمىتكەرلەردىڭ ۇشتەن ءبىرى 19 جىلدان بەرگى كەزەڭدە ءبىرىنشى رەت ماجوريتارلىق جۇيە بويىنشا سايلاۋعا تۇسەيىن دەپ وتىر. جالپى, الەمدىك دەڭگەيدەگى ءىرى ساياساتكەرلەردىڭ كوبى ءبىرمانداتتى وكرۋگتەن شىققانىن ەسكەرسەك, بۇل جولعى سايلاۋدا ءادىل باسەكە بولىپ, بۇعان دەيىن كولەڭكەدە قالىپ كەلگەن بىلىكتى, ەلشىل, نامىستى ازاماتتار ءوز قابىلەتتەرىن كورسەتەدى دەگەن ۇمىتتەمىن. كەيىنگى جىلدارى ساياسي پارتيالارعا دەگەن حالىق سەنىمى ازايىپ كەتكەنى بەلگىلى. الداعى سايلاۋدىڭ ناتيجەسىندە, وسى سەنىمنىڭ قايتا ويانۋىنا سەپ بولاتىن, ەل يگىلىگىنە جۇمىس ىستەيتىن قۋاتتى زاڭدار قابىلدايتىن ۇلكەن كۇش قالىپتاسادى دەگەن ءۇمىتىمىز بار.
ەڭ باستىسى, حالىقتىڭ ساياسي ناۋقانعا بەلسەندى اتسالىسۋى ماڭىزدى. جەكە باسىنىڭ, بالا-شاعاسىنىڭ, ەلدىڭ بولاشاعىن ويلاعان ءاربىر ازامات ءوزى تىركەلگەن سايلاۋ ۋچاسكەسىنە بارىپ, سانالى تۇردە ءوز تاڭداۋىن جاساۋعا ءتيىس. سايلاۋداعى حالىقتىڭ بەلسەندىلىگى – دەموكراتيالىق قوعامنىڭ بىردەن-ءبىر ولشەمى.
ءبىز ءوزىمىز اۋىل شارۋاشىلىعىنداعى ادام بولعاننان كەيىن, ۇنەمى اۋىلدىڭ جاعدايىن ويلاپ تۇرامىز. قازىر ۇگىت-ناسيحات جۇمىستارىنىڭ ناعىز قىزىپ تۇرعان شاعى. ءبىرتالاي جيىنعا قاتىسىپ, ۇمىتكەرلەردىڭ باعدارلاماسىمەن تانىستىم. بۇل جولعى سايلاۋ قارساڭىندا اۋىل حالقىنىڭ تۇرمىسىن جاقسارتۋ, اۋىل ينفراقۇرىلىمىن دامىتۋ تۋرالى ءجيى ايتىلىپ جاتىر. مەنى وسى جاعداي قۋانتادى. كوڭىلگە ۇلكەن ءۇمىت ۇيالاتادى.
«بىرلىك بولماي, تىرلىك بولمايدى», ءبارىڭىزدى الداعى سايلاۋعا ءبىر ادامداي اتسالىسىپ, ەل مۇددەسى ءۇشىن داۋىس بەرۋگە شاقىرامىن.
سايران بۇقانوۆ,
قازاقستاننىڭ ەڭبەك ەرى
قوستاناي وبلىسى
