«بىرنەشە جىل بويى ءجوندى جىلىماي, جۇرتى جاۋراعان تەمىرتاۋدا قازىرگى تاڭدا جەو-2-دە جەتىنشى قازاندىقتىڭ قۇرىلىسى ءجۇرىپ جاتىر. ازىرشە مۇنداعى جۇمىستار كەستەگە ساي جۇرگىزىلۋدە. قاجەتتى جابدىقتار ورناتىلۋدا», دەپ مالىمدەيدى ورتالىق باسشىلىعى.
اتالعان قۇرىلىس ايماق باسشىسى ەرماعانبەت بولەكپاەۆتىڭ تىكەلەي باقىلاۋىندا. جۋىردا وبلىس اكىمى «ارسەلورميتتال تەمىرتاۋ» اق جەو-2-دە جەتىنشى قازاندىق سالىنىپ جاتقان قۇرىلىس الاڭىنا ارنايى باردى. قۇرىلىستىڭ ءجۇرۋ بارىسىن باقىلادى. سودان سوڭ كومپانيانىڭ باس ديرەكتورى ۆلاديمير يابلونسكي قاتىسقان كەڭەستە قازاندىققا قاتىستى ماسەلەلەر تالقىعا سالىندى.
– جۇمىس كەستەگە ساي. كونۆەكتيۆتى بولىك تولىعىمەن جيناقتالعان. ەندى ءبىز ەلەكتر بولىگىنە قاتىستى جۇمىستاردى باستادىق. ەلەكتر سىمدارىن تارتۋعا كىرىسەمىز. سونىمەن قاتار قازاندىق وتتىعىن مونتاجداۋعا دايىندىق جۇرگىزىلۋدە, – دەدى جەو-2 ديرەكتورى سەرگەي كريۆوۆ.
قازاندىق قۇرىلىسىنداعى ماماندار تاۋلىك بويى جۇمىستى توقتاتقان جوق. كۇندىزگى جانە تۇنگى اۋىسىمداعى جۇمىستىڭ ناتيجەسىندە بۇگىن قازاندىقتاعى قۇرىلىس جۇمىسىنىڭ ۇلەسى – 70 پايىز كولەمىندە.
سونداي-اق ايماق باسشىسىنا جىلۋ ەلەكتر ورتالىقتارىن جوندەۋدەن وتكىزۋ دە باياندالدى. كومپانيا باسشىلىعىنىڭ مالىمدەۋىنشە, قازىر جوندەۋ جۇمىستارىن باستاۋعا ەش كەدەرگى جوق.
«جۇمىس جوسپارى بەكىتىلدى. قارجىلاندىرۋ ءبولىندى», دەيدى ۆلاديمير يابلونسكي. ونىڭ ايتۋىنشا, ءبىرىنشى قازاندىق كەڭ اۋقىمدى اعىمداعى جوندەۋدەن وتەدى. جۇمىس الداعى كۇندەرى باستالادى. وعان قوسا, بيىل جەو-2-دە ەكى قازاندىقتى كۇردەلى جوندەۋ جوسپارلانعان. ولار – № 4 جانە №5 قازاندىقتار. جۇمىسقا كومپانيا ماۋسىمدا كىرىسەدى.
قاراعاندى وبلىسى
