بۇل ساياسي دودا بيىلعى جىلدىڭ ەرەكشە وقيعالارىنىڭ ءبىرى رەتىندە تاريحتا قالاتىنىنا ءوز باسىم سەنىمدىمىن. جۇرەگى ەلىم دەپ سوققان ءاربىر ازامات ەرتەڭىمىز ءۇشىن تاڭداۋ جاساۋعا اسىعىپ, وعان ءوز وتباسىن, كورشى-قولاڭدارىن جۇمىلدىرىپ, سايلاۋ كۇنىن كادىمگى مەيرامداي ەتىپ جاتسا, ءبىر عانيبەت. بۇگىندە نەبىر اسىل ازاماتتارىمىز, ۇكىلى ۇمىتكەرلەرىمىز حالىق كوڭىلىنەن شىعاتىن باعدارلامالارىن ۇسىنىپ, اۋىلدارىمىز بەن قالالارىمىزدىڭ دامۋىنا سەرپىن بولارلىق ءجون-جوبالارىن جاريالادى. كوپتىڭ كوڭىلىنە جاققانى الاماندا اتى وزسىن دەيمىز.
بارشامىز ءۇشىن ەل تاعدىرىنا ارالاسۋ, بولاشاققا ءۇن قوسۋدىڭ ورايى كەلىپ تۇر. وسى ءبىر سىن ساعاتىن لايىقتى جاۋاپكەرشىلىكپەن اتقارىپ شىعايىق. بىزدەن كەيىنگى ۇرپاق گۇلدەنگەن, قۋاتتى مەملەكەتتە ءومىر ءسۇرسىن دەسەك, بەلسەندى بولايىق. الداعى جىلدارى حالىقتىڭ ءۇنىن ءماجىلىس پەن ءماسليحاتتاردا جەتكىزەتىن تۇلعالاردىڭ كىم بولماعىن شەشەتىن ساياسي ناۋقان ءاربىرىمىز ءۇشىن ماڭىزدى.
بالتاباي سىزدىقوۆ,
مادەنيەت قايراتكەرى,
باياناۋىل اۋدانىنىڭ
قۇرمەتتى ازاماتى
