ۋنيۆەرسيتەتتىڭ ۇيىمداستىرۋىمەن 8-10-سىنىپ وقۋشىلارى اراسىندا «جاس زەرتتەۋشى جانە جاراتىلىستانۋ عىلىمدارىنىڭ دامۋى» اتتى ءى رەسپۋبليكالىق عىلىمي جوبالار كونكۋرسى ءوتتى. بايقاۋ بالالاردىڭ زەرتتەۋ قىزمەتىنە قاتىستى داعدىلارىن دامىتۋ, ورتا جاستاعى مەكتەپ وقۋشىلارىنىڭ ينتەللەكتۋالدىق-شىعارماشىلىق الەۋەتىن ىنتالاندىرۋ ماقساتىندا ۇيىمداستىرىلدى. سونداي-اق زەرتتەۋ جۇمىستارىنا قىزىعۋشىلىق تانىتقان دارىندى وقۋشىلاردى انىقتاۋ جانە ولارعا قولداۋ كورسەتۋ, وقۋشىلاردىڭ ۇزدىك جەتىستىكتەرىن ناسيحاتتاۋ, وقۋشىلاردىڭ ءوزارا قارىم-قاتىناستارىن ۇيىمداستىرۋ, قوعامنىڭ تۇراقتى دامۋ ماقساتتارىنا كوپشىلىكتىڭ نازارىن اۋدارۋ سىندى ماڭىزدى ۇستانىمداردى دا كوزدەگەنىن اتاپ وتەيىك.
الدىمەن مەكتەپىشىلىك دەڭگەيدە ءبىرىنشى كەزەڭى ءوتىپ, ەكىنشى كەزەڭى ۋنيۆەرسيتەتتە ۇيىمداستىرىلدى. ءۇشىنشى قورىتىندى كەزەڭگە وقۋشىلار بارىنشا ىرىكتەلىپ, دايىندالىپ كەلۋگە مۇمكىندىك جاسالدى. كونكۋرسقا ەلىمىزدىڭ ءار وبلىسىنان, نازارباەۆ زياتكەرلىك مەكتەپتەرىنەن حيميا, بيولوگيا جانە گەوگرافيا سەكتسيالارى بويىنشا جالپى 58 جۇمىس تىركەلىپ, ىرىكتەۋ ناتيجەسى بويىنشا كونكۋرستىڭ ءۇشىنشى كەزەڭىنە 24 عىلىمي جوبا جولداما الىپ, قورعالدى.
– عىلىمنىڭ دامۋىنا تىكەلەي ۇلەس قوساتىن جاستار, بۇگىنگى مەكتەپ وقۋشىلارى ەكەنى ءسوزسىز. سەبەبى مەكتەپ كەزىنەن عىلىمعا قۇشتار, جاڭا يدەيانى ىسكە اسىرۋعا دايىن وقۋشىلار بولاشاقتا قازاقتىڭ مىقتى عالىمدارى بولارى انىق. شارا اياسىندا ءتۇرلى باعىتتا قىزىقتى دا جاڭالىعى مول عىلىمي جوبالار قورعالدى. جەڭىمپازدار مەن ۇزدىك جوبالاردىڭ جەتەكشىلەرى العىس حاتتارمەن جانە ديپلومدارىمەن, ارنايى سىيلىقتارمەن ماراپاتتالدى. عىلىمي جوبانىڭ قاتىسۋشىلارى مىقتى حيميكتەر, بيولوگتەر جانە گەوگرافتەر ەكەنىنە ءبارىمىز بىردەي كۋا بولدىق. ولار – بولاشاق عالىمدار. ۋنيۆەرسيتەت باسشىلىعىنىڭ قولداۋىمەن عىلىمي جوبالار كونكۋرسى الداعى جىلدارى دا جالعاسىن تابادى, – دەيدى ۋنيۆەرسيتەت قىزمەتكەرى, جاس عالىم باقتىباي جايلاۋ.
ەل عىلىمىن دامىتۋ ءۇشىن جاستارعا وسى باستان قامقورلىق جاساپ, ولاردى بەلگىلى ءبىر عىلىمي سالاعا باعىتتاۋ, ۇزدىك ناتيجەگە قول جەتكىزۋگە ۇمتىلدىرۋ – اعا بۋىننىڭ مىندەتى. «مەكتەپ جاسىنداعى بالالارمەن مەكتەپ اينالىسسىن» دەپ وتىرماي جاقسى ىسكە باستاماشى بولا بىلگەن ۋنيۆەرسيتەت ۇجىمىنا ريزاشىلىق بىلدىرگەندەر دە از ەمەس.
«مۇنداي ءىس-شارالار ايتۋعا تۇرارلىق جاڭالىق! جاستاردى قولداۋ دەگەن جاقسى ءسوز ولارعا شابىت بەرەتىن وسىنداي ءىس-شارالار ارقىلى سۇيەمەلدەنۋى كەرەك. بۇكىل الەم بلوگەرلىككە بەت بۇرىپ تۇرعاندا, «عىلىم جولىن قۋامىن» دەگەن ورەندەرگە «بارەكەلدى!» دەسەك جاراسار», دەپ مۇحيتتىڭ ارعى بەتىندە ءبىلىم الىپ جۇرگەن IT-مامان تيمۋر بەكتۇر الەۋمەتتىك جەلى ارقىلى ىستىق ىقىلاسىن جەتكىزدى.
جاستارعا موتيۆاتسيا بەرۋ, العا ۇمتىلدىرۋ – جاۋاپتى ءىس. ولارعا بولىنگەن نازار مەن قۇيىلعان ينۆەستيتسيا – ەل ەرتەڭى ءۇشىن قالانعان كىرپىش. اعا بۋىننان قولداۋ, قامقورلىق كورگەن جاستار ەل تىرەگىنە اينالارى انىق.
ماڭعىستاۋ وبلىسى
