اسكەري تاقىرىپقا قالام تەربەيتىن تىلشىلەر قاۋىمى تامارا قۋانىشبەكقىزىن «بەسكە» بىلەدى. شەكارا شەبىندەگى شىمىر جىگىتتەردىڭ تىرشىلىك تىنىسىن ارقاۋ ەتكەن ويلى وچەركتەرىن وقىپ وتىرىپ, موينىنان فوتواپپاراتى تۇسپەيتىن, قاشان كورسەڭ شاپقىلاپ جۇرەتىن تانىس بەينە كوزىمىزگە وتتاي باسىلادى. ۇلتتىق قاۋىپسىزدىك كوميتەتى شەكارا قىزمەتىنىڭ «وتان ساقشىسى» گازەتىندە شيرەك عاسىر بويى تابان اۋدارماي قىزمەت ەتىپ كەلە جاتقان اقمىلتىق ءجۋرناليستىڭ العاشقى ەڭبەك جولى ءىىم ىشكى اسكەرىنىڭ «قالقان» باسىلىمىنان باستاۋ العان. 1997 جىلى ۇلتتىق ۇلان ساپىندا اسكەري شەن العان ول, بۇگىندە زاپاستاعى پودپولكوۆنيك.
ءوز ىسىنە جانىمەن بەرىلگەن تامارا حانىممەن قىزمەت بابىندا ءجيى كەزدەسەمىز. تىلشىلەردى قيىرداعى شەكارا زاستاۆالارىنا باستاپ بارىپ, ەل شەتىن كىرپىك قاقپاي كۇزەتەتىن جاۋىنگەرلەردىڭ ەڭبەگىمەن تانىستىرۋدا الدىنا جان سالمايدى. ەڭ العاش ونى باقىلاۋ بەكەتتەرىنىڭ بىرىندەگى مۇنارادان كورىپ, باس اينالار بيىكتىكتەن ساتى بويىمەن زاۋلاپ بارا جاتقان جانكەشتىلىگىنە قايران قالعانبىز. ءبازبىر ساپتاعى ساربازداي قيمىلى شيراق, سويلەۋ مانەرى دە اسكەري ومىرگە بەيىمدەلگەن. تەلەفون شالساڭ, تۇتقانى كوتەرە سالا: «تامارا حانىم تىڭداپ تۇر» دەپ اسكەريلەرشە ءتىل قاتادى. ونىڭ اۋزىنان شىققان شەكارا تۋرالى اڭىزعا بەرگىسىز اڭگىمەلەردى ارىپتەستەرمەن بىرگە اۆتوبۋس ىشىندە الماتىعا جەتكەنشە تاڭعالا تىڭداعانىمىز جەكە ماقالاعا جۇك بولارلىق دۇنيە. كەيىننەن بۇل ماتەريالداردىڭ جەلىسىن اۆتوردىڭ «اردا تۋعاندار» جانە «شەكارا سوقپاقتارى» اتتى كىتاپتارىنان تانىپ بىلدىك.
– وسى ناۋرىزدا مەنىڭ شەكاراشى اتانعانىما تۋرا 25 جىل تولدى. ويلاپ وتىرسام, ەل شەبىندەگى جىلدارىم بوسقا وتكەن جوق. قىزىقتى وقيعالارعا تولى بولدى. قازاقتىڭ باعىنا تۋعان ناعىز پاتريوتتارىمەن جۇزدەسىپ, سۇحباتتاس بولىپ كەلەمىن. ءبىزدىڭ ارامىزدا بىلايعى جۇرت بايقاي بەرمەيتىن تاعدىرلارى ەرەكشە ادامدار وتە كوپ. ولار ماعان شابىت بەرەدى. وسى جىلدار ىشىندە رەسپۋبليكانىڭ بارلىق شەكارا ايماقتارىن ارالاپ, شەكاراشىلاردىڭ ومىرىمەن, قيىن دا قىزىقتى قىزمەتتەرىمەن تانىستىم. ولارمەن بىرگە جاۋىنگەرلىك كەزەكشىلىككە تۇرعان كەزىم دە بولدى. بۇل ماعان جازىپ جۇرگەن سالامنىڭ تابيعاتىن تولىق تانۋىم ءۇشىن كەرەك ەدى. بىردە اتتى شەكارا ناريادىنىڭ قۇرامىندا قىزمەت اتقارۋ كەزىندە استىمداعى اتىم ۇركىپ, مەنى الا قاشقانى بار... شەكارا بۇزۋشىنىڭ ءرولىن سومدادىم. تۇندە تاۋ ىشىمەن ناريادتان ورالىپ كەلە جاتىپ, قاسقىرلاردىڭ وتشا جانعان كوزدەرىن كوردىم. بىراق ءبىزدىڭ قارۋىمىزدىڭ ءيىسىن سەزىپ, ءتۇز تاعىلارى قاسىمىزعا جاقىنداپ كەلە المادى. شەكاراشىلاردىڭ ەل شەبىندە باستارىنان كەشىرگەن وقيعالارىن جازىپ الۋ – مەنىڭ ءحوببيىم, – دەپ تەبىرەنەدى تامارا قۋانىشبەكقىزى.
كەيىپكەرىمىز تاريحى ارىدەن باستالاتىن باسىلىمنىڭ قابىرعاسىندا ەڭبەك ەتە ءجۇرىپ, قاتارداعى تىلشىدەن ءبولىم باستىعىنا دەيىنگى باسپالداقتان ءوتتى. قىزمەتتىك جولدا جەڭىستى ءھام جەمىستى ساتتەرى جەتەرلىك. 2017 جىلى ۇقك-ءنىڭ قۇرىلعانىنا 25 جىل تولۋىنا وراي, باق وكىلدەرى اراسىندا وتكەن رەسپۋبليكالىق بايقاۋدىڭ جۇلدەگەرى اتانسا, 2021 جىلى اتالعان قۇرىلىم اباي قۇنانباي ۇلىنىڭ 175 جىلدىعىن مەرەكەلەۋ اياسىندا ۇيىمداستىرعان «اباي» شىعارماشىلىق بايقاۋىنىڭ «ۇزدىك پروزالىق شىعارما» جانە «ۇزدىك جۋرناليستيكالىق تۋىندى» نوميناتسيالارىنىڭ جەڭىمپازى بولدى. ال 2019 جىلى ءابىش كەكىلباەۆتىڭ تۋعانىنا 80 جىل تولۋىنا وراي سالتانات قۇرعان شىعارماشىلىق بايقاۋدىڭ ء«ابىش كەكىلباەۆ – پاتريوت ولكەتانۋشى» اتالىمىندا جۇزدەن جۇيرىك شىققانىن شەكاراشىلار ماقتانىشپەن ايتادى.
مىقتى مامان – قاي ۇجىمنىڭ دا ماقتانىشى. ارىپتەسىمىزدىڭ قالامىنا ىلىنگەن قانشاما شەكاراشى جۇرت قۇرمەتىنە بولەنىپ, ەڭبەگى ەلەنگەنى ءوز الدىنا بولەك اڭگىمە. قۋاتتى قۇرىلىمنىڭ تىنىس-تىرشىلىگىن تەرەڭ سەزىنەتىن ول تىلشىلىك-تىرشىلىكتە تالاي شەكاراشىنىڭ تاعدىرىنا اراشا بولدى. تاعى بىردە ءوز سۇيىكتى تاقىرىبىنا قاتىستى: «شەكارانى كۇزەتۋ مىندەتى – ديىرمەننىڭ توقتاۋسىز اينالعان دوڭگەلەگى سەكىلدى, كۇن-ءتۇن دەگەندى بىلمەيدى. ءبىر شەكاراشى قىزمەتتەن ورالىپ كەلە جاتسا, قارۋ اسىنىپ, يت جەتەكتەگەن ەكىنشىسى قاقپادان شىعىپ بارا جاتادى», دەپ اڭگىمە باستاپ ەدى ول. ءبىز دە ءوز كەزەگىندە قالامىن قارۋ ەتكەن ارىپتەسىمىزدى كوكتەم مەرەكەسىمەن قۇتتىقتاپ, ەل يگىلىگى جولىندا ديىرمەننىڭ توقتاۋسىز اينالعان دوڭگەلەگىندەي تىنىم تاپپاي ەڭبەك ەتە بەرىڭىز دەپ تىلەك بىلدىرەمىز.
الماتى
