«ورتالىق» ستاديوندا وتكەن كەزدەسۋدىڭ ءبىرىنشى تايمىن الاڭ يەلەرى ءساتتى باستادى. ماتچتىڭ 17-مينۋتىندا ارتۋر شۋشەناچەۆ جەكە شەبەرلىگىنىڭ ارقاسىندا قارسىلاس كوماندانىڭ ءتورت ويىنشىسىن الداپ ءوتىپ, دوپتى قاقپا تورىندا تۋلاتتى. ارادا بەس مينۋت وتكەندە گۇلجىگىت الىقۇلوۆ «اتىراۋ» قورعاۋشىلارىنىڭ قاتەلىگىنەن كەيىن ەسەپتى ەسەلەدى. تابلوداعى كورسەتكىش 2:0-گە جەتكەن سوڭ, جەرگىلىكتى جانكۇيەرلەر ءوز كومانداسىنىڭ جەڭىسىنە سەنىمدى بولا باستاعان ەدى. الايدا ويىننىڭ 36-مينۋتىندا قوناقتار ساپىنان دەمير يمەري ەسەپ ايىرماسىن قىسقارتسا, ەكىنشى تايمنىڭ 66-مينۋتىندا ەۆگەني كوزلوۆ تارازى باسىن تەڭەستىرىپ كەتتى – 2:2. وسىلايشا, «قايرات» ماڭىزدى ەكى ۇپايىنان ايىرىلدى.
ال 5 ناۋرىزعا جوسپارلانعان تاعى ەكى كەزدەسۋدە «ماقتاارال» ءوز الاڭىندا كوكشەتاۋدىڭ «وقجەتپەس» كلۋبىنان 1:0 ەسەبىمەن جەڭىلسە, «قايسار» دا قىزىلوردادا ءدال سونداي ەسەپپەن «قىزىلجارعا» جول بەردى. «وقجەتپەس» ساپىنان شوقان ابزالوۆ گول سوقسا, «قىزىلجاردان» رافاەل سابينو دالدىك تانىتتى. ەكىنشى تۋر ويىندارى 9-10 ناۋرىز كۇندەرىنە جوسپارلانعان.
