تيمۋر سانجار ۇلىنىڭ ەسىمى ەلىمىزدىڭ فۋتبول جانكۇيەرلەرىنە جاقسى تانىس. فۋتبولشى رەتىندە سەگىزباەۆ 19 جاسىندا كسرو چەمپيوناتىندا دەبيۋت جاساپ, «قايرات» ساپىندا ونەر كورسەتتى. 1963 جىلى وداق كۋبوگىنىڭ جارتىلاي فينالىنا شىققانى ءۇشىن «كسرو سپورت شەبەرى» اتاعىن الدى. 6 جىل قاتارىنان «قايراتتىڭ» كاپيتانى بولدى. مانسابىن اياقتاعاننان كەيىن «اۆتوموبيليست» (قىزىلوردا), «شاحتەر» (قاراعاندى), «قايرات» (الماتى), «مەليوراتور» (قىزىلوردا) كوماندالارى مەن يەمەن قۇراماسىندا باپكەر رەتىندە قىزمەت ەتتى. 1989 جىلدان 2001 جىلعا دەيىن ەلىمىزدىڭ فۋتبول فەدەراتسياسىنىڭ ۆيتسە-پرەزيدەنتى, باس حاتشىسى جانە پرەزيدەنتى قىزمەتىن اتقاردى.
بيىلعى چەمپيوناتتىڭ تۇساۋى شىمكەنتتەگى قاجىمۇقان اتىنداعى ورتالىق ستاديوندا كەسىلدى. بىلتىر قازاقستان كۋبوگىندە جەڭىمپاز اتانعان جەرگىلىكتى «ورداباسى» كلۋبى العاشقى تۋردا اقتاۋدىڭ «كاسپيىن» قابىلداپ, ءوز جانكۇيەرلەرىنىڭ الدىندا قوناقتاردى ءىرى ەسەپپەن تىزە بۇكتىردى – 3:1.
شىمكەنتتىك كلۋب قىسقى ترانسفەر كەزەڭىندە بەلسەندى جۇمىس ىستەپ, قۇرامىن ۇلتتىق قۇراما ساپىندا دوپ تەبەتىن بەدەلدى ويىنشىلارمەن تولىقتىردى. اتاپ ايتقاندا, بيىلعى ماۋسىمدا «ورداباسى» كلۋبىنىڭ نامىسىن ەل قۇراماسىنىڭ كاپيتانى اسحات تاعىبەرگەن, قورعاۋشىلار – سەرگەي مالىي, تەمىرلان ەرلانوۆ, جارتىلاي قورعاۋشى باۋىرجان يسلامحان, تاعى باسقا قازاقستاننىڭ جانە شەتەلدىڭ ەڭ مىقتى دەگەن فۋتبولشىلارى قورعايدى.
«كاسپيمەن» وتكەن ماتچتا الاڭ قوجايىندارىنىڭ سوققان ءۇش گولىن دا ماۋسىمارالىق ۇزىلىستە كوماندا قۇرامىن تولىقتىرعان ويىنشىلار سوعىپ, «ورداباسىعا» جەڭىس سىيلادى. ماسەلەن, كەزدەسۋدىڭ ەسەبىن 16-مينۋتتا ەكى جىلدىق ۇزىلىستەن كەيىن ۇلكەن فۋتبولعا ورالعان باۋىرجان يسلامحان اشىپ قانا قويماي, جاڭا ماۋسىمداعى ءبىرىنشى گولدىڭ اۆتورى اتاندى. بيىلعى قازاق فۋتبولىنداعى ەڭ ءىرى جاڭالىقتىڭ ءبىرى – يسلامحاننىڭ جاسىل الاڭعا قايتا ورالۋى دەسەك, ارتىق ايتقاندىق بولماس. ەكىنشى تايمنىڭ 49-مينۋتىندا اسحات تاعىبەرگەن ەسەپتى ەسەلەي تۇسسە, كەيىننەن «ورداباسىنىڭ» وزبەكستاندىق شابۋىلشىسى بوبۋر ابۋحوليكوۆ تابلوداعى ەسەپتى 3:0-گە جەتكىزدى. قوناقتار ساپىنان قارىمتا گولدى 71-مينۋتتا گەورگي پانتسۋلايا سوقتى.
4 ناۋرىزعا جوسپارلانعان ءبىرىنشى تۋردىڭ ەكىنشى ماتچىندا جوعارى ليگاعا قايتا ورالعان تالدىقورعاننىڭ «جەتىسۋ» كلۋبى بىلتىرعى ەل بىرىنشىلىگىنىڭ كۇمىس جۇلدەگەرى «اقتوبەنى» قابىلداپ, تەڭ دارەجەدە وتكەن ويىندا ءبىر دوپ ايىرماسىمەن جەڭىلىپ قالدى. الماتىداعى «جاس قىران» ستاديونىنداعى كەزدەسۋ 1:0 ەسەبىمەن قوناقتاردىڭ پايداسىنا شەشىلدى. ويىنداعى جالعىز ءارى جەڭىس گولىن 83-مينۋتتا قازاقستان قۇراماسىنىڭ شابۋىلشىسى ماكسيم سامورودوۆ سوقتى.
2022 جىلعى ماۋسىمنىڭ قولا جۇلدەگەرى اتانعان «توبىل» دا بيىلعى چەمپيوناتتى جەڭىسپەن باستادى. ءبىرىنشى تۋردا پاۆلوداردىڭ «اقسۋىن» قابىلداعان قوستانايلىقتار ەش قيىندىقسىز العاشقى ءۇش ۇپايىن ولجالادى – 3:1. ماتچتىڭ ەسەبىن 9-مينۋتتا الاڭ يەلەرىنەن ميلان ۆۋكادينوۆيچ اشسا, 59-مينۋتتا يسلام چەسنوكوۆ ەسەپتى ەسەلەي ءتۇستى. 66-شى مينۋتتا قوناقتار ساپىنان توني سيلۆا ەسەپ ايىرماسىن قىسقارتقانىمەن, قوسىمشا ۋاقىتتا سەرج دەبلە ويىننىڭ نۇكتەسىن قويدى.
ءبىرىنشى تۋردىڭ ءبىرىنشى كۇنىنە جوسپارلانعان سوڭعى ماتچتا بىلتىرعى ەل چەمپيونى, بيىلعى سۋپەركۋبوك يەگەرى «استانا» مەن قاراعاندىنىڭ «شاحتەرى» شەبەرلىك بايقاستى. «استانا ارەنا» ستاديونىنا جينالعان جانكۇيەرلەر اسا تارتىستى ماتچتىڭ كۋاسى بولدى. ءۇش گول سوعىلعان باسەكەدە «استانا» فۋتبولشىلارىنىڭ اسىعى الشىسىنان ءتۇستى – 2:1. 3-مينۋتتا ەلوردالىق كلۋبتان ۆلاديسلاۆ پروكوپەنكو دالدىك تانىتسا, ارادا 20 مينۋت وتكەندە بيىلعى چەمپيوناتتىڭ ەڭ قۇندى فۋتبولشىسىنىڭ ءبىرى سانالعان دەمبو داربو ەل چەمپيوناتىنداعى العاشقى گولىن سوعىپ, الاڭ يەلەرىنىڭ باسىمدىعىن ەسەلەي ءتۇستى – 2:0. ءبىرىنشى تايم اياقتالعانعا دەيىن قوناقتار ساپىنان شىڭعىس فليۋك مەرگەندىگىمەن كوزگە ءتۇسىپ, ەسەپ ايىرماسىن قىسقارتىپ ۇلگەردى. ەكىنشى تايمدا «كەنشىلەر» كومانداسى تارازى باسىن تەڭەستىرۋگە تىرىسقانىمەن, «استانا» قاقپاسىنان ساڭىلاۋ تابا المادى.
سونىمەن قاتار كەشە شىمكەنتتە «ماقتاارال» كوكشەتاۋدىڭ «وقجەتپەسىن», الماتىدا «قايرات» اتىراۋدىڭ «اتىراۋىن» قابىلداسا, جوعارى توپقا ورالعان «قايسار» قىزىلوردادا «قىزىلجار» كومانداسىمەن ءۇش ۇپايدى ساراپقا سالدى.
