قۇستى باۋلىپ اڭعا سالۋ اركىمنىڭ پەشەنەسىنە جازىلا بەرمەيتىن قادىرلى دە قاسيەتتى ونەر. سوندىقتان دا ءداستۇرلى قازاق قوعامىندا ونىڭ الار ورنى ەرەك. جەتىسۋ ءوڭىرى ءوز الدىنا جەكە وبلىس بولعالى العاش رەت قۇسبەگىلەردى ءبىر شاڭىراق استىنا جيناپ, ۇلتتىق ويىننىڭ كوركىن قىزدىردى.
ەسكەلدى اۋدانىنا قاراستى جەتىسۋ اۋىلىنىڭ قىسى جانعا جايلى, قوڭىر سالقىن, سپورتتىق ءىس-شارالار وتكىزۋگە وتە ىڭعايلى. مۇنى كورگەن قازاقستان قۇسبەگىلەر فەدەراتسياسىنىڭ جاۋاپتى ماماندارى ساياساتشىلىق جارىسىن وتكىزۋگە وسى جەردى تاڭداپتى. جارىستىڭ قولايلى وتۋىنە بارلىق جاعداي جاسالعان. بۇل يگىلىكتى ءىستى وبلىستىق دەنە شىنىقتىرۋ جانە سپورت باسقارماسى ماماندارى مويىنعا الىپ, بارىنشا ابىرويمەن وتكىزۋگە تىرىستى. سولاي بولدى دا.
قۇسبەگىلەردىڭ جىل سايىنعى جاۋاپتى جارىستارى الماتى وبلىسىنىڭ نارىنقول وڭىرىندە وتەتىن. ءوڭىر ەكىگە بولىنگەننەن كەيىن, ءداستۇرلى دودانى وتكىزۋ كەزەگى جەتىسۋلىقتارعا بۇيىردى. سول كۇنى تابيعاتتا توسىن مىنەز تانىتپادى, كۇن دە ك ۇلىمدەپ تۇردى.
جاستار اراسىنداعى قۇسبەگىلەردىڭ ءحىV رەسپۋبليكالىق چەمپيوناتىنا الماتى, تۇركىستان, اباي, اتىراۋ, ماڭعىستاۋ, شىعىس قازاقستان وبلىستارى مەن استانا جانە الماتى قالاسىنىڭ قۇسبەگىلەرى قاتىستى. اشىلۋ سالتاناتىنا جينالعان اعايىننىڭ قاراسى كوپ بولدى. ەكى كۇنگە سوزىلعان جارىس ەلدىڭ ەسىندە قالدى. بالاپان كۇنىنەن باپتاعان ءارتۇرلى اڭشى قۇستىڭ ايلاسى, ءبىتىم-بولمىسى, مىنەزى كوپشىلىكتى تاڭداي قاقتىردى.
جارىس سوڭىندا ەڭ ۇزدىك كورسەتكىشتەرگە يە بولعان جەڭىمپازدار ارنايى جۇلدەلەرگە يە بولدى. بۇركىتشىلەر اراسىندا اتىراۋ وبلىسىنان كەلگەن يمانعالي ابدىكارىم ۇلى چەمپيون بولسا, قارشىعا سالۋدا الماتى وبلىسىنىڭ وكىلى سەيىتجان بەكسۇلتان ۇزدىك اتاندى. يتەلگى سالۋدان تۇركىستان وبلىسىنان كەلگەن ءمۇسالىم سالمانعا تەڭ كەلەر قۇسبەگى بولعان جوق.
ال تۇركىستان وبلىسىنىڭ قۇسبەگىلەرى 1 التىن, 1 كۇمىس, 2 قولا مەدالعا يە بولدى. اتىراۋ جانە الماتى وبلىسىنىڭ وكىلدەرى ءبىر-بىردەن التىن مەدالدى جەڭىپ الدى.
جەتىسۋ وبلىسى
