كوميتەت توراعاسى اسقار شاكىروۆ پارلامەنت سەناتى كوكتەمگى سۋ تاسقىنىنا بايلانىستى پروبلەمالىق ماسەلەلەردى جىل سايىن كوتەرىپ كەلە جاتقانىن اتاپ ءوتتى. ول سوڭعى جىلدارى كوكتەم كەلگەن سايىن سۋ تاسقىنى بولاتىنىن جانە ول مىڭداعان اۋىل تۇرعىندارى قيىن جاعدايدا قالاتىنىن ەسكە ءتۇسىردى.
– اتقارۋشى بيلىك توتەنشە جاعدايلارعا دايىندىق تۋرالى جىل سايىن ەسەپ بەرەدى, الايدا سۋ تاسقىنى كەزىندە كۇش-قۋات پەن قۇرال-جابدىق ۇدايى جەتىسپەي قالادى. كەيىننەن سونىڭ زارداپتارىن جويۋعا اجەپتاۋىر بيۋدجەت قارجىسى جۇمسالادى, – دەدى اسقار شاكىروۆ.
سەناتور بۇل كەزدەسۋدىڭ ماقساتى – يەسىز گيدروتەحنيكالىق قۇرىلىستاردى كوممۋنالدىق مەنشىككە بەرۋ, گيدرومەتەورولوگيالىق قىزمەتتەردىڭ جاي-كۇيى جانە باسقا دا بىرقاتار ماڭىزدى ماسەلەلەردى تالقىلاۋ ەكەنىن ايتتى.
جيىندا توتەنشە جاعدايلار ءمينيسترىنىڭ ورىنباسارى مەرەكە پىشەمباەۆ سۋ تاسقىنىنىڭ الدىن الۋعا قاتىستى بايانداما جاسادى. ول جىل باسىنان بەرى جاۋىن-شاشىننىڭ جيىلەۋى مەن تەمپەراتۋرانىڭ كۇرت كوتەرىلۋىنىڭ كەسىرىنەن 1 ءۇي مەن 46 ەلدى مەكەندەگى 317 اۋلا اۋماعى زارداپ شەككەنىن جانە 24 جول ۋچاسكەسىن سۋ شايىپ كەتكەنىن تىلگە تيەك ەتتى. اپات سالدارىن جويۋ ءۇشىن تجم كۇشىمەن سۋ سورۋ, قۇم تولى قاپشىقپەن اعىن جولىن بوگەۋ جانە سۋ كەتەتىن ارنالاردى تازارتۋ جۇمىستارى جۇرگىزىلدى. بۇگىندە سينوپتيكتەردىڭ الدىن الا بولجامى بويىنشا سۋ تاسقىنى قاۋپى تونەتىن ايماقتار انىقتالدى. زەردەلەۋدەن سوڭ سولتۇستىك قازاقستان, شىعىس قازاقستان, اقمولا, قاراعاندى, اقتوبە, الماتى, جامبىل, تۇركىستان, قىزىلوردا, باتىس قازاقستان, اتىراۋ, قوستاناي وبلىستارىندا, سونداي-اق اباي جانە جەتىسۋ وبلىستارىندا دا قاتەر قاۋپى جوعارى ەكەنى انىقتالدى.
سونداي-اق سەناتورلارعا سۋ تاسقىنى جاعدايىنا دايىندىق اياسىنداعى شارالار تۋرالى ەكولوگيا جانە گەولوگيا ءمينيسترىنىڭ ورىنباسارى گاليدۋللا ازيدۋللين ايتىپ بەردى. ونىڭ ايتۋىنشا جەدەل شتاب قۇرىلىپ, كەزەكشىلىك كەستەسى بەكىتىلدى, سونداي-اق تاسقىن سۋدى جىبەرىپ جيناقتايتىن قاۋىپسىز ورىن بەكىتىلگەن.
جيىندا الماتى, تۇركىستان, جامبىل جانە قىزىلوردا وبلىستارى اكىمدەرىنىڭ ورىنباسارلارى دا سەناتورلاردى جەرگىلىكتى جەرلەردەگى جاعداي تۋرالى حاباردار ەتتى. اسقار شاكىروۆ كەزدەسۋدى قورىتىندىلاي كەلىپ, اپاتتى جاعدايلاردىڭ الدىن الۋ ءۇشىن سۋ نىساندارىنا تۇراقتى مونيتورينگ ۇيىمداستىرۋدىڭ, باقىلاۋ پۋنكتتەرى مەن گيدروبيولوگيالىق كورسەتكىشتەر ستانسالارىن كۇشەيتۋ ماڭىزدىلىعىنا توقتالدى.
– توتەنشە جاعدايلاردىڭ تۋىنداۋ قاۋپىن باعالاۋ كەزىندە ترانسشەكارالىق سۋ وبەكتىلەرىنىڭ بولۋىن ەسكەرۋ قاجەت. وسىعان بايلانىستى ترانسشەكارالىق سۋ وبەكتىلەرىن باسقارۋ سالاسىنداعى حالىقارالىق ىنتىماقتاستىقتى دامىتۋ جانە كەڭەيتۋ, قولدانىستاعى شارتتار مەن كەلىسىمدەردى ەسكەرە وتىرىپ, شارالار كەشەنىن جۇزەگە اسىرۋ ماڭىزدى باعىتتاردىڭ ءبىرى بولىپ تابىلادى, – دەدى كوميتەت توراعاسى.
كەزدەسۋدە ەلىمىزدەگى سۋ تاسقىنى جاعدايىنا قارسى ءىس-قيمىل تۋرالى ايتىلعان ۇسىنىستار سالالىق مينيسترلىكتەردىڭ جۇمىس بارىسىندا, سونداي-اق دەپۋتاتتاردىڭ زاڭ شىعارۋ قىزمەتىندە ەسكەرىلەدى.
