ولەگ كيسەلەۆ جەتەكشىلىك ەتەتىن قازاقستان باسكەتبولشىلارى ەكى كەزەڭنەن تۇراتىن ازيا ايماعىنداعى ىرىكتەۋ ماتچتارىنىڭ العاشقىسىن ءساتتى باستاپ, باسكەتبول سپورتىنان دا جوعارى ورىندارعا ءۇمىتتى ەكەنىمىزدى بايقاتقانداي ەدى. D توبىندا سيريا, يران جانە باحرەين سياقتى ىرگەلى قۇرامالارمەن شەبەرلىك بايقاسقان جەرلەستەرىمىز بەس ماتچتا جەڭىسكە جەتىپ, تەك بىرەۋىندە عانا جەڭىلىستىڭ كەرمەك ءدامىن تاتۋعا ءماجبۇر بولدى. وسى كورسەتكىشىمەن وتانداستارىمىز ءوز توبىندا كوش باستاپ, ىرىكتەۋدىڭ 2-اينالىمىنا جولداما الدى.
اتاپ ايتقاندا, ەلوردادا وتكەن العاشقى ويىندا ءبىزدىڭ جىگىتتەر سيريادان كەلگەن باسكەتبولشىلاردى 84:74 ەسەبىمەن تىزە بۇكتىرسە, جاۋاپتى ماتچتا 81:71 ناتيجەسىمەن ەكىنشى رەت جەڭدى. كەيىنگى تۋردا يران باسكەتبولشىلارىنان (73:69) باسىم ءتۇسىپ, ءتورتىنشى ماتچتا باحرەيندى ءوز ەلىندە تاس-تالقانىن شىعاردى – 95:48. ال 2022 جىلدىڭ شىلدەسىندە يراندى 8 ۇپاي ايىرماشىلىعىمەن (68:60) ۇتسا, ەش ماڭىزى قالماعان سوڭعى تۋردا باحرەين قۇراماسىنا جول بەردى – 82:51 (29:24, 28:5, 12:10, 13:12).
ءسويتىپ, الەم كۋبوگىنىڭ ەكىنشى ىرىكتەۋ كەزەڭىنە شىققان جەرلەستەرىمىز بۇل سىندا باحرەين, يران, اۋستراليا, قىتاي جانە جاپونيا قۇرامالارىمەن ءبىر توپتا ويناپ, جاھاندىق دوداعا بەرىلەتىن جولدامالاردى ساراپقا سالدى. قازاقستان باسكەتبولشىلارى ءبىرىنشى اينالىمدا باحرەين جانە يران سپورتشىلارىمەن ءبىر توپتا ويناعاندىقتان, بۇل جولعى ىرىكتەۋدە اتالعان قۇرامالارمەن جولدارى تۇيىسپەدى.
ىرىكتەۋدىڭ العاشقى كەزەڭىندە ورەلى ونەرىمەن كوزگە ءتۇسىپ, جانكۇيەرلەردى جارقىن جەڭىستەرىمەن قۋانتقان قازاقستان قۇراماسىنىڭ باسكەتبولشىلارىنان جوعارى ناتيجە كۇتكەن ەدىك. الايدا ەكىنشى ىرىكتەۋدە سپورتشىلارىمىز سول ەرلىكتەرىن قايتالاي الماي, جانارىمەن جەر شۇقىپ قالدى. جوسپارلانعان التى ماتچتىڭ بارلىعىندا قارسىلاستارىنا جول بەرىپ, تاعى دا الەم چەمپيوناتىنىڭ باسەكەلەرىن تەلەديداردان تاماشالايتىن بولدى. 2022 جىلدىڭ تامىز ايىنداعى ەكى ماتچتىڭ العاشقىسىندا جەرلەستەرىمىز قىتاي قۇراماسىنان ۇتىلسا (68:58), كەيىننەن جاپونيا باسكەتبولشىلارىنا ەسە جىبەردى (73:48). ال قاراشاداعى ماتچتاردا اۋستراليادان – 97:50, جاپونيادان 81:61 ناتيجەسىمەن وڭباي ۇتىلدى.
قازاقستان ويىنشىلارى قاتارىنان ءتورت ماتچتا جەڭىلسە دە, ازيا ايماعىنداعى سوڭعى ەكى جولدامانىڭ ءبىرىن ەنشىلەۋگە مۇمكىندىگى ساقتالىپ قالدى. ول ءۇشىن ولەگ كيسەليوۆ شاكىرتتەرى سوڭعى ەكى ماتچتىڭ بىرىندە قىتاي نەمەسە اۋستراليا باسكەتبولشىلارىن جەڭۋگە ءتيىس ەدى. وكىنىشكە قاراي, ءبىزدىڭ جىگىتتەر بۇل مۇمكىندىكتى دە پايدالانا الماي, سان سوعىپ قالدى. سىرت الاڭدا وتكەن ەكى ويىندا دا قارسىلاستارىنا ەسە جىبەرىپ, جالعىز جولدامادان قاعىلدى.
گونكونگتىڭ «تسۋەن ۆان ستاديۋمدا» سپورت كەشەنىندەگى ماڭىزدى ماتچتىڭ العاشقىسىندا ۇلتتىق قۇراما وكىلدەرى قىتاي باسكەتبولشىلارىنان 71:59 ەسەبىمەن جەڭىلدى. كەزدەسۋدى بەلسەندى باستاعان الاڭ قوجايىندارى العاشقى اينالىمدى 21:12 ەسەبىمەن ءوز پايداسىنا جازسا, ۇزىلىستەن كەيىن دە قارقىنىن ءبىر ساتكە باسەڭدەتپەگەن ولار 22 ۇپايعا قول جەتكىزدى. جەرلەستەرىمىز نەبارى 10 ۇپاي عانا جيناۋعا مۇمكىندىك الدى. ءۇشىنشى كەزەڭدە باسكەتبولشىلارىمىز ازداپ ەس جيا باستادى. بۇل 10 مينۋتتىقتا ولار 18:16 ەسەبىمەن العا شىقسا, شەشۋشى كەزەڭدە 19:12 ناتيجەسىمەن قارسىلاستارىنىڭ الدىن وراپ كەتتى. الايدا ماتچ قورىتىندىسىندا بۇل ۇپايلار قازاقستان قۇراماسىنىڭ جەڭىسى ءۇشىن جەتكىلىكسىز بولدى.
قىتاي قۇراماسىمەن وتكەن قارىمتا ماتچتا جەرلەستەرىمىزدەن رۋستام مىرزاعاليەۆ كەزدەسۋدىڭ ۇزدىك ويىنشىسى اتانعانىن ايتا كەتكەن ءجون. ول ءتورت كەزەڭدە 13 ۇپاي جينادى.
ءسويتىپ, شەشۋشى ەكى ماتچتىڭ العاشقىسىندا ۇتىلعان سوڭ, ءبىزدىڭ قۇرامادا بولماشى عانا ءۇمىت قالدى. ويتكەنى سوڭعى تۋردا الەمدىك رەيتينگتە ءۇشىنشى, ازيا قۇرلىعىندا كوش باستاپ تۇرعان اۋستراليا باسكەبولشىلارىنان ۇپاي الۋ ءتىپتى مۇمكىن ەمەس ەدى. ونىڭ ۇستىنە «جاسىل قۇرلىق» وكىلدەرى ەلورداداعى ماتچتا جەرلەستەرىمىزدى ءىرى ەسەپپەن (97:50) جەڭىپ كەتكەنىن جانكۇيەرلەر ۇمىتا قويعان جوق. قارىمتا كەزدەسۋدى ءوز الاڭىندا وتكىزەتىن اۋستراليا ءبىزدىڭ جىگىتتەرگە ەش مۇمكىندىك قالدىرمايتىنى ءاۋ باستان بەلگىلى بولدى. كوپشىلىك كۇتكەندەي ماتچ تولىق جەرگىلىكتى سپورتشىلاردىڭ باسىمدىعىمەن ءوتتى. ءبىرىنشى كەزەڭدە 21:13 ەسەبىمەن جەڭىسكە جەتكەن اۋستراليالىقتار ەكىنشى اينالىمدا 25:14 ناتيجەسىمەن العا ۇزاپ كەتتى. ال ءۇشىنشى كەزەڭدە الاڭ يەلەرىنىڭ قارقىنى ءتىپتى قاتتى بولدى – 33:11. سوڭعى 10 مينۋتتىقتا اۋستراليا باسكەتبولشىلارى بەلسەندىلىگىن باسەڭدەتكەنىمەن, جەرلەستەرىمىز ءبارىبىر جەڭىسكە جەتە المادى – 19:15. قورىتىندى ەسەپ – 98:53, اۋستراليا قۇراماسىنىڭ پايداسىنا.
وسىلايشا, قازاقستان قۇراماسى ەكىنشى ىرىكتەۋ كەزەڭىنىڭ بارلىق ماتچىندا جەڭىلىپ, ەل ءۇمىتىن اقتاي المادى. ال ازيا قۇرلىعىنىڭ سوڭعى ەكى جولداماسى يران مەن يوردانيا باسكەتبولشىلارىنا بۇيىردى.
ازيا ايماعىنان بولەك, 23-27 اقپان ارالىعىندا وزگە قۇرلىق وكىلدەرى دە الەم چەمپيوناتىنىڭ ىرىكتەۋ ماتچتارىن وتكىزىپ, الەم چەمپيوناتىنا باراتىن قۇرامالار انىقتالدى. جالپى, دۇنيەجۇزىلىك باسكەتبول فەدەراتسياسىنىڭ ەرەجەسى بويىنشا الەم چەمپيوناتىنا ەۋروپانىڭ – 12, ازيا جانە مۇحيت ايماعىنىڭ – 8 (جارىستى ۇيىمداستىرۋشى مەملەكەتتەردى قوسا ەسەپتەگەندە), سولتۇستىك جانە وڭتۇستىك امەريكانىڭ – 7 جانە افريكا قۇرلىعىنىڭ 5 قۇراماسى قاتىسادى.
الەم چەمپيوناتىنا قاتىساتىن 32 قۇراما تومەندەگىدەي:
ەۋروپا: گرۋزيا, گەرمانيا, گرەكيا, يتاليا, يسپانيا, لاتۆيا, ليتۆا, سەربيا, سلوۆەنيا, فينليانديا, فرانتسيا, چەرنوگوريا.
وڭتۇستىك جانە سولتۇستىك امەريكا: برازيليا, ۆەنەسۋەلا, دومينيكان رەسپۋبليكاسى, كانادا, مەكسيكا, پۋەرتو-ريكو, اقش.
ازيا جانە مۇحيت ايماعى: اۋستراليا, يوردانيا, يران, ليۆان, قىتاي, جاڭا زەلانديا, فيليپپين, جاپونيا.
افريكا: انگولا, مىسىر, كابو-ۆەردە, كوت د’يۆۋار, وڭتۇستىك سۋدان.
32 قۇرامانىڭ ىشىندەگى ءتورت مەملەكەتتىڭ باسكەتبولشىلارى بيىل ءوز تاريحىندا العاش رەت الەم چەمپيوناتىنا قاتىسادى. ولار: لاتۆيا, گرۋزيا, كابو-ۆەردە جانە وڭتۇستىك سۋدان.
باسكەتبولدان 2023 جىلعى الەم چەمپيوناتى 25 تامىز بەن 10 قىركۇيەك ارالىعىندا بىردەن 3 مەملەكەتتە – يندونەزيا, جاپونيا جانە فيليپپيندە وتەدى. قازاقستان قۇراماسى 2019 جىلى الەم بىرىنشىلىگىنىڭ ەكىنشى ىرىكتەۋ كەزەڭىنە وتكەنىمەن, بيىلعىداي فينالدىق سايىسقا جولداما الا الماعان ەدى. سول جىلى قىتايدا جالاۋى جەلبىرەگەن جاھاندىق دودادا يسپانيا قۇراماسى جەڭىسكە جەتكەن بولاتىن. پيرەنەي تۇبەگىنىڭ وكىلدەرى فينالدا ارگەنتينادان باسىم تۇسكەن-ءدى – 95:75.
