كۇدىكتىلەرگە قىلمىستىق كودەكستىڭ 115-بابى «قورقىتۋ», 147-بابى «جەكە ومىرگە قول سۇعۋ», 158-بابى «جۋرناليستىك قىزمەتكە كەدەرگى كەلتىرۋ», 202-بابى «بىرەۋدىڭ مۇلكىن قاساقانا جويۋ نەمەسە ءبۇلدىرۋ» جانە 293-بابى «بۇزاقىلىق» بويىنشا ايىپ تاعىلىپ وتىر.
رەسمي مالىمەتكە سۇيەنسەك, الماتىداعى ارانداتۋشىلىق شابۋىلداردىڭ تىكەلەي ۇيلەستىرۋشىسى دەگەن كۇدىكپەن شەتەلدىك ازامات, بىلىكتى حاكەر و.توكارەۆ ۇستالعان. ونىڭ ۋاقىتشا تۇرىپ جاتقان جەرىنەن شابۋىلداردى باسقارۋ, ءانونيمدى Telegram-اككاۋنتتاردا «تاپسىرىستار» بەرۋ, ورىنداۋشىلاردى تابۋ جانە ولاردىڭ ارەكەتىنە اقى تولەۋ جۇرگىزىلگەن تەحنيكا تابىلعان. اتالعان توپ ۆاديم بورەيكوعا, گۇلنار باجكەنوۆاعا, گۇلجان ەرعاليەۆاعا, سامال يبراەۆاعا جانە بۇقارالىق اقپارات قۇرالدارىنىڭ باسقا دا وكىلدەرىنە قارسى 30-دان استام ارانداتۋشىلىق شابۋىل جاساعان.
اتاپ ايتقاندا, كۇدىكتى اۆتوكولىكتى ورتەۋ, جۋرناليستەرگە, ولاردىڭ تۋىستارى مەن رەداكتسيالارعا قوقان-لوقى كورسەتىپ, سايتقا DDoss شابۋىل جاساۋعا تاپسىرىس بەرگەن. رەسمي مەكەمەنىڭ حابارلاۋىنشا, قىلمىستىق توپتىڭ باستى ماقساتى – جۋرناليستەرگە وسىنداي شابۋىل جاساۋ ارقىلى پرەزيدەنت پەن جۇرگىزىلىپ جاتقان دەموكراتيالىق رەفورمالاردى ديسكرەديتاتسيالاۋ. كۇدىكتى ۋاقىتشا ۇستاۋ يزولياتورىنا قامالدى. تەرگەۋ مۇددەسىنە بايلانىستى باسقا مالىمەتتەر جاريا ەتىلمەيدى.
«الماتى مامانداندىرىلعان اۋدانارالىق تەرگەۋ سوتىنىڭ 2023 جىلى 24 اقپانداعى اقپاراتى بويىنشا, سوت قاۋلىسىمەن تەرگەۋ ورگاندارىنىڭ كۇدىكتى ت-نى ەكى ايعا قاماۋعا الۋ تۇرىندەگى بۇلتارتپاۋ شاراسى تۋرالى ءوتىنىشى قاناعاتتاندىرىلدى. ياعني 2023 جىلدىڭ 22 ساۋىرىنە دەيىن», دەلىنگەن سوت حابارلاماسىندا.
بۇعان دەيىن ىشكى ىستەر مينيسترلىگى كەيىنگى جارتى جىلدا جۋرناليستەر مەن بلوگەرلەرگە قاتىستى زاڭسىز ارەكەتتەر جاساعان 18 ادام ۇستالعانىن حابارلاعان ەدى.
«جابىرلەنۋشىلەرگە قاتىستى جىلجىمايتىن مۇلىككە قاساقانا زاقىم كەلتىرۋ, اۆتوكولىكتەردى ورتەۋ, ولارعا ءارتۇرلى زاتتاردى جونەلتۋ ارقىلى قورقىتۋ فاكتىلەرى, جابىرلەنۋشىلەردىڭ مەكەنجايلارى بويىنشا تەرروريزم اكتىسى تۋرالى كورىنەۋ جالعان حابارلامالار جانە ينتەرنەت جەلىسىندە دەربەس دەرەكتەرىن تاراتۋ فاكتىلەرى جاسالدى. وسى قىلمىستاردى اشۋ ءۇشىن ۆەدومستۆوارالىق جەدەل-تەرگەۋ توبى قۇرىلدى. بۇعان قاتىسى بار 18 ادام ۇستالدى», دەگەن ەدى ءىىم.
ەستەرىڭىزدە بولسا, بۇعان دەيىن جۋرناليستەر مەن بلوگەرلەرگە بىرنەشە رەت شابۋىل جاسالعان ەدى. ماسەلەن, بەلگىسىز بىرەۋلەر ۆاديم بورەيكونىڭ پاتەرىن سىرتىنان بەكىتىپ كەتۋگە تىرىسقان. سونداي-اق تاياۋدا جۋرناليست پەن ونىڭ وپەراتورىنىڭ كولىگىن ورتەپ كەتتى. ال 14 قاڭتاردا بەلگىسىز ادامدار جۋرناليست دينارا ەگەۋباەۆانىڭ اۆتوكولىگىنە وت قويىپ كەتكەن-تۇعىن. سونداي-اق بىرقاتار سايتقا شابۋىل جاسالىپ, رەداكتسيالارعا قوقان-لوقى كورسەتىلگەن «سالەمدەمەلەر» جەتكىزىلگەن-ءدى.
پرەزيدەنتتىڭ ءباسپاسوز حاتشىسى رۋسلان جەلدىباي الەۋمەتتىك جەلىدەگى پاراقشاسىندا مەملەكەت باسشىسى قاسىم-جومارت توقاەۆ قۇقىق قورعاۋ ورگاندارىنا جۋرناليستەرگە قارسى قىلمىستارعا قاتىستى تاپسىرما بەرگەنىن حابارلاعان.
«پرەزيدەنت قۇقىق قورعاۋ ورگاندارىنا جۋرناليستەرگە قارسى باعىتتالعان بىرقاتار قىلمىس بويىنشا مۇقيات تەرگەۋ جۇرگىزۋدى تاپسىردى. قوعامدىق قاۋىپسىزدىك پەن مەملەكەتتىڭ بەدەلىنە نۇقسان كەلتىرۋ ءۇشىن جاسالعان بۇل زاڭسىز ارەكەتتەردىڭ ورىنداۋشىلارى عانا ەمەس, تاپسىرىس بەرۋشىلەرى دە انىقتالۋعا ءتيىس», دەلىنگەن جازبادا.
