كەيىنگى جىلداردا ەلىمىزدە ۇدەمەلى يندۋستريالىق-يننوۆاتسيالىق دامۋ باعدارلاماسىنا ەرەكشە كوڭىل ءبولىنىپ كەلە جاتقانى بەلگىلى. ەلباسىمىز نۇرسۇلتان نازارباەۆ وسى ارقىلى مەملەكەتتىڭ شيكىزاتتى ەكونوميكاعا تاۋەلدىلىگىن بولدىرماۋدى كوزدەپ وتىر. ويتكەنى, قالاي دەگەندە دە, مۇنايدىڭ دا, گازدىڭ دا ءبىر كەزدە ازاياتىنى, ءتىپتى تۇگەسىلەتىنى بەلگىلى. يننوۆاتسيالى ەكونوميكاعا ارقا سۇيەگەن وزىق ەلدەردىڭ ءوز جەرىندە قازبا بايلىقتارى بولماسا دا دامۋدىڭ داڭعىل جولىنا تۇسكەنىن بۇكىل الەم كورىپ وتىر.
سونىمەن بىرگە, جەر قويناۋىنا بىتكەن بايلىقتى بىرىڭعاي ساتۋمەن ءبىراز جىل جاعدايىن تۇزەپ, ول بايلىق سارقىلۋعا جاقىنداعاندا داعدارىسقا ۇشىراعان ەلدەردىڭ مىسالى دا مىنا دۇنيەدە جەتكىلىكتى. ال دايىن ونىمدەر شىعارۋ, ونى باسەكەگە قابىلەتتى ەتۋ ماسەلەسىن شەشكەن ەلدەردىڭ ءجونى بولەك. قازاقستان وسى باعىتتى ۇستانىپ وتىر.
قازاقستان پرەزيدەنتىنىڭ ەلدى وزا دامىعان وتىزدىقتىڭ قاتارىنا قوسۋ ماقساتىن كوزدەگەن ستراتەگياسى ويداعىداي ورىندالىپ كەلە جاتقان وڭىرلەردىڭ ءبىرى – شىعىس قازاقستان. مۇندا قۇرىلعان يندۋستريالىق ايماقتاردىڭ نەگىزگى مىندەتتەرى قاتارىندا ونەركاسىپتە, قۇرىلىستا شاعىن جانە ورتا كاسىپكەرلىكتى دامىتۋعا سەپتەسۋ, وتاندىق جانە شەتەلدىك ينۆەستورلاردى وسى ىسكە تارتۋ, جاڭا وندىرىستىك باعىتتاردى قۇرۋعا بەيىمدەلگەن يننوۆاتسيالىق باعدارلامالاردى ەنگىزۋ بار. يندۋستريالىق ايماقتار يمپورت الماستىراتىن جانە باسەكەگە قابىلەتتى وندىرىستەر قۇرۋدى ىنتالاندىرۋ ءۇشىن قاجەتتى جاعدايلار جانە بۇگىنگى كۇنگى ينفراقۇرىلىم جاساۋ ماقساتىمەن دۇنيەگە كەلگەن.
كەشە ەلباسى نۇرسۇلتان نازارباەۆ شىعىس قازاقستان وبلىسىنداعى جۇمىس ساپارىن ءوڭىردىڭ ءىرى كاسىپورنى – «وسكەمەن تەحنولوگيالىق جابدىقتار زاۋىتى» جاۋاپكەرشىلىگى شەكتەۋلى سەرىكتەستىگىن ارالاپ كورۋدەن باستادى. زاۋىت جىلۋ ەنەرگەتيكاسىندا, سونداي-اق, ەكولوگيالىق ونەركاسىپتە گازداردان تازارتۋ ءۇشىن پايدالانىلاتىن ەلەكترلى فيلترلەر شىعارادى. ونىڭ ءونىمدەرى ەلىمىزدە عانا ەمەس, الىس جانە جاقىن شەتەلدەردە دە سۇرانىسقا يە. مۇندا جىلۋ ەنەرگەتيكا كەشەنىنە, قۇرىلىس يندۋسترياسى مەن مەتاللۋرگياعا ارنالعان ونىمدەر دە شىعارىلادى. ەلىمىزدە بۇعان ۇقساس كاسىپورىن جوق.
ەلباسى وبلىستىڭ يندۋستريالاندىرۋ كارتاسىمەن تانىستى. وندا پرەزيدەنت نۇرسۇلتان نازارباەۆقا وڭىردە جۇزەگە اسىرىلىپ جاتقان جوبالار كورمەسى ۇسىنىلدى. كورمەدە وبلىستىڭ الەۋمەتتىك-ەكونوميكالىق دامۋىنا تىڭ سەرپىن بەرەتىن ماڭىزدى جوبالار كورىنىس تاپقان. بيىل 17,5 ملرد. تەڭگەگە 13 جوبانى جۇزەگە اسىرۋ كوزدەلىپ وتىر. وسى ارقىلى 1454 جاڭا جۇمىس ورنى قۇرىلاتىن بولادى.
پرەزيدەنتتىڭ جۇمىس ساپارى بۇگىن جالعاسادى. ەلباسى ساپار بارىسىندا وڭىردەگى بىرقاتار ءوندىرىستىك جانە الەۋمەتتىك نىسانداردى ارالاپ كورەدى, سونداي-اق, كاسىپكەرلەرمەن جانە جۇرتشىلىق وكىلدەرىمەن كەزدەسۋ وتكىزەدى دەپ جوسپارلانۋدا.
دۋمان اناش,
«ەگەمەن قازاقستان».
شىعىس قازاقستان وبلىسى.
سۋرەتتەردى تۇسىرگەندەر
س.بوندارەنكو, ب.وتارباەۆ.
