سۋرەتتى تۇسىرگەن جۇماباي مۇسابەكوۆ
WorldSkills – جۇمىسشى ماماندىقتارى بويىنشا كادرلاردى دايارلاۋ ساپاسىن ارتتىرۋعا جانە ولاردى جاستار اراسىندا تانىمال ەتۋگە باعىتتالعان حالىقارالىق قوزعالىس. قازاقستان جۇمىسشى مامانداردى دايارلاۋ سالاسىنداعى ۇزدىك پراكتيكالاردىڭ بەنچماركينگى ءۇشىن بۇل قوزعالىستى ودان ءارى دامىتاتىن بولادى.
جەتىسۋ وبلىسى اكىمى ءباسپاسوز قىزمەتىنىڭ مالىمەتىنە سۇيەنسەك, جۋىردا تالدىقورعان سەرۆيس جانە تەحنولوگيالار كوللەدجىنىڭ بازاسىندا «تاماقتاندىرۋدى ۇيىمداستىرۋ» ماماندىعى بويىنشا اسپازدىقتا وقيتىن ءوڭىر كوللەدجدەرىنىڭ ستۋدەنتتەرى ءۇشىن 8 كۇندىك وبلىستىق تاعىلىمداما ۇيىمداستىرىلدى. ءىس-شاراعا وڭىردەگى 7 كوللەدجدەن 40-قا جۋىق ستۋدەنت پەن وقىتۋشى قاتىسقان.
تەوريالىق جانە پراكتيكالىق بولىمدەردەن تۇراتىن تاعىلىمدامادان كوكسۋ پوليتەحنيكالىق, الاكول گۋمانيتارلىق-تەحنيكالىق, سارقان پوليتەحنيكالىق, تەكەلى كاسىپتىك, باستوبە سەرۆيستىك-تەحنيكالىق, جاركەنت كوپسالالى, اقسۋ پوليتەحنيكالىق كوللەدجدەرىنىڭ 34 ستۋدەنتى مەن وقىتۋشىسى وتكەن. ولار اسپاز ماماندىعىن وقىپ جۇرگەن بىلىمگەرلەر مەن وسى ماماندىق بويىنشا ءبىلىم بەرەتىن وندىرىستىك وقىتۋدىڭ شەبەرلەرى. بۇل رەتتە تاعىلىمدامانىڭ تەوريالىق بولىگى ونلاين-رەجىمدە, ال پراكتيكالىق بولىگى تالدىقورعان سەرۆيس جانە تەحنولوگيالار كوللەدجىنىڭ قۇزىرەتتىلىك ورتالىعىنىڭ شەبەرحانالارىندا ۇيىمداستىرىلدى. ساباقتاردى جەرگىلىكتى پەداگوگتەر مەن وندىرىستىك وقىتۋ شەبەرلەرى وتكىزدى.
تاعىلىمدامانى ۇيىمداستىرۋداعى باستى ماقسات – زاماناۋي ۇردىستەردى ەسكەرە وتىرىپ, تاماق دايىنداۋ تاجىريبەسىن قالىپتاستىرۋ. بۇل رەتتە نەگىزىنەن جەكە تۇلعانى, ونىڭ شىعارماشىلىق قابىلەتتەرىن دامىتۋعا, كاسىپتىك ءبىلىم بەرۋ ساپاسى مەن جاس ءارى بولاشاق مامانداردىڭ كاسىبي شەبەرلىگىن ارتتىرۋعا ەكپىن ءتۇسىرىلىپ وتىر.
ءىس-شارا اياسىندا بىلىمگەرلەر جەڭسىك تاعامداردى, ءتۇرلى سوۋستاردى, بالىقتان جاسالاتىن اس-اۋقاتتاردى قالاي ازىرلەيتىنىن ۇيرەندى. سونداي-اق قوعامدىق تاماقتاندىرۋدى ۇيىمداستىرۋ سالاسىندا قولدانىلاتىن كاسىبي لەكسيكانى قولدانۋ داعدىلارىن جەتىلدىرۋمەن اينالىستى.
دايىندالعان تاعامنىڭ ماسساسىن كورسەتە وتىرىپ, ولاردىڭ تەحنولوگيالىق كارتالارىن جاسادى. وقىتۋ مەن ونىڭ ناتيجەلەرىن باعالاۋدىڭ ۇدەرىسى تولىعىمەن WorldSkills ستاندارتتارىنا نەگىزدەلگەنىن اتاپ ءوتۋ كەرەك. تاعىلىمداما اياقتالعاننان كەيىن بارلىق قاتىسۋشىعا قۇزىرەت ورتالىقتارىنان سەرتيفيكات بەرىلدى.
– 23 قاڭتار مەن 2 اقپان ارالىعىندا تالدىقورعاندا «اسپازدىق ءىس» قۇزىرەتتىلىگى بويىنشا تاعىلىمداما ءوتتى. ءبىزدىڭ وقىتۋ جانە پراكتيكالىق ساباقتارىمىز WorldSkills چەمپيوناتىنىڭ ستاندارتتارى مەن تاپسىرمالارىنا سايكەس وتكىزىلدى. ماعان شەبەرحانالاردىڭ ورنالاسۋ رەتى, جاڭا جابدىقتارمەن جۇمىس ىستەۋ, زاماناۋي اسپازدىق ونەردىڭ قىر-سىرىن مەڭگەرۋ قاتتى ۇنادى. جالپى, وقىتۋ اتموسفەراسى ەرەكشە اسەر ەتتى. ساباقتار شىن مانىندە قىزىقتى ءارى پايدالى, ەڭ باستىسى جاڭا تاسىلدەردى ەنگىزە وتىرىپ وتكىزىلدى, – دەيدى كوكسۋ پوليتەحنيكالىق كوللەدجىنىڭ ءىىى كۋرس ستۋدەنتى مارجان تەمىرحان.
مۇعالىمدەر دە ءدان ريزا. سولاردىڭ ءبىرى الاكول گۋمانيتارلىق-تەحنيكالىق كوللەدجىنىڭ وندىرىستىك وقىتۋ شەبەرى رومان ميشەنيننىڭ پىكىرىنشە, مۇنداي تاجىريبە الماسۋلار زاماناۋي قۇرال-جابدىقتار مەن تەحنولوگيالارعا قولى ۇنەمى جەتە بەرمەيتىن شالعاي اۋدانداردا ورنالاسقان وقۋ ورىندارى ءۇشىن اسا ماڭىزدى ءارى ولارداعى وقۋ ۇدەرىسىن جاڭارتۋعا ىقپال ەتەدى.
الداعى ۋاقىتتا ءارتۇرلى باعىت بويىنشا ءتۇرلى نىساندار مەن ادىستەمەلەردى پايدالانا وتىرىپ, وسىنداي تاعىلىمدامالار قۇزىرەت ورتالىقتارىندا ۇنەمى وتكىزىلىپ تۇرادى. مىسالى, تالدىقورعان جوعارى پوليتەحنيكالىق كوللەدجىنىڭ قۇزىرەتتىلىك ورتالىعى بازاسىندا ءىت-تەحنولوگيالار, قۇرىلىس سالاسى باعىتتارىندا, ال تالدىقورعان گۋمانيتارلىق-تەحنيكالىق كوللەدجىنىڭ بازاسىندا «جيھاز ءوندىرىسى» ماماندىعى بويىنشا پراكتيكالىق ساباقتار وتكىزىلەدى.
جەتىسۋ وبلىسى
