«ورتالىق سايلاۋ كوميسسياسى وكىلەتتى مەملەكەتتىك ورگاندارمەن بىرلەسىپ, ءماجىلىس دەپۋتاتى بولىپ سايلانۋ ءۇشىن پارتيالىق تىزىمگە ەنگىزىلگەن ادامداردىڭ كونستيتۋتسيا مەن «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ تالاپتارىنا سايكەستىگىنە تەكسەرۋ جۇرگىزدى. پارتيالىق تىزىمگە ەنگىزىلگەن بارلىق ادام كونستيتۋتسيانىڭ جانە كونستيتۋتسيالىق زاڭنىڭ تالاپتارىنا سايكەس كەلەدى», دەدى وسك حاتشىسى مۇحتار ەرمان.
ونىڭ ايتۋىنشا, پارتيالىق ءتىزىمدى ۇسىنعان پارتيالار پارتيالىق تىزىمگە ەنگىزىلگەن ءاربىر ادام ءۇشىن قازاقستان زاڭناماسىندا بەلگىلەنگەن ەڭ تومەنگى جالاقىنىڭ 15 ەسەلەنگەن مولشەرىندە وسك شوتىنا ساياسي پارتيالاردىڭ قاراجاتىنان سايلاۋ جارناسىن ەنگىزەدى.
«پارلامەنت ءماجىلىسى دەپۋتاتتارىنىڭ الدىڭعى سايلاۋىندا داۋىس بەرۋگە قاتىسقان سايلاۋشىلاردىڭ 5 جانە ودان دا كوپ پايىز داۋىسىن العان ساياسي پارتيالار سايلاۋ جارناسىن تولەمەيدى. 2021 جىلعى قاڭتاردا وتكەن پارلامەنت ءماجىلىسى دەپۋتاتتارىنىڭ سايلاۋىندا «Amanat» پارتياسى سايلاۋشىلار داۋىسىنىڭ 71,9 پايىزىن العان. وسىعان بايلانىستى «Amanat» پارتياسى سايلاۋ جارناسىن تولەۋدەن بوساتىلادى», دەدى م.ەرمان.
وسىدان كەيىن ورتالىق سايلاۋ كوميسسياسىنىڭ مۇشەلەرى «Amanat» پارتياسى قوعامدىق بىرلەستىگىنەن پارلامەنت ءماجىلىسى دەپۋتاتتىعىنا كانديداتتاردىڭ كونستيتۋتسيادا جانە «سايلاۋ تۋرالى» كونستيتۋتسيالىق زاڭدا ولارعا قويىلاتىن تالاپتارعا سايكەستىگىن انىقتاۋ تۋرالى, «Amanat» پارتياسىنىڭ پارتيالىق ءتىزىمىن تىركەۋ تۋرالى حاتتامالارعا قول قويدى.
پارتيانىڭ اتقارۋشى حاتشىسى ەلنۇر بەيسەنباەۆ ۇمىتكەرلەر تىزىمىندە 90 ادام بار ەكەنىن اتاپ ءوتتى. ونىڭ 29-ى ايەلدەر, جاستار جانە ەرەكشە قاجەتتىلىكتەرى بار ادامدار. بۇل تىزىمگە ەنگىزىلگەن جالپى ساننىڭ 32,2 پايىزىن قۇرايدى.
«وسىدان تۋرا ءبىر اپتا بۇرىن ءبىز ورتالىق سايلاۋ كوميسسياسىنا پارتيامىزدىڭ اتىنان ماجىلىسكە ۇسىناتىن كانديداتتاردىڭ ءتىزىمىن وتكىزگەن بولاتىنبىز. بارلىق كانديدات تالاپقا ساي ەكەنى, سايلاۋ كەزەڭىنە وتەتىنى حابارلاندى. ءبىز ەندى الداعى سايلاۋالدى ۇگىت-ناسيحات جۇمىستارىنا قىزۋ دايىندالاتىن بولامىز. ءبىز ءوز كۇشىمىزگە, مۇمكىندىگىمىزگە تولىقتاي سەنىمدىمىز», دەدى ە.بەيسەنباەۆ.
وسك وتىرىسىنان كەيىن ەلنۇر بەيسەنباەۆ جۋرناليستەردىڭ سۇراقتارىنا جاۋاپ بەردى. سايلاۋالدى باعدارلامانىڭ تولىق ءماتىنى ۇگىت-ناسيحات كەزەڭىنىڭ العاشقى كۇنىندە جاريالانىپ, پارتيانىڭ سايتىنا ورنالاستىرىلادى. بيىل 7 اقپاندا «Amanat» پارتياسىنىڭ كەزەكتەن تىس XXV سەزى ءوتىپ, سونىڭ قورىتىندىسى بويىنشا پارتيا بارلىق دەڭگەيدەگى ماسليحاتتارعا 3821, ماجىلىسكە 119 كانديدات ۇسىندى. ەلىمىزدىڭ وكىلدى ورگاندارىنا ۇسىنىلعان «Amanat» كانديداتتارى 75 پايىزعا جاڭاردى.
