تاياۋدا قىلقالام شەبەرى ونەرسۇيەر قاۋىمعا ساۋىن ايتىپ, «قازاق ونەرىنىڭ تۇركياعا كومەگى» اكتسياسىنا قاتىسۋعا ۇندەۋ جاريالاعان بولاتىن. بۇعان ءۇن قوسقاندار تابىلدى. ءسويتىپ, سۋرەتشىنىڭ «ۇماي انا» كارتيناسى 10 ميلليون تەڭگەگە ساتىلىپ, بۇكىل قاراجات تۇركيا ەلشىلىگى اشقان ارنايى قورعا اۋدارىلدى. وسى ماسەلەنىڭ انىق-قانىعىن بىلمەك ءۇشىن ەربولات تولەپباي مىرزانىڭ وزىنە حابارلاسقان ەدىك. «جاريالانعان ۇندەۋدەن كەيىن اۋكتسيون ماسەلەسىمەن اينالىستىم. ارينە, جەدەل ارادا ۇلكەن كولەمدە مۇنداي ءىس-شارا ۇيىمداستىرۋ كوپ ۋاقىتتى قاجەت ەتەدى. سەبەبى بۇل وڭاي جۇمىس ەمەس.
ويتكەنى ونىمەن اينالىساتىن ارنايى كومپانيالار بار, ولاردىڭ كەستەسىنە ساي كەلۋ, ۇستانعان ساياساتىمەن ۇندەس شىعۋ, ادام جيناۋ, جارناما جاساۋ سەكىلدى ماسەلەلەر تۋىندادى.
سوندىقتان جاقىن تۋىستارىما, جورا-جولداستارىما ساۋىن ايتىپ, ۇندەۋ تاستادىم. تۋىسقاندىق, اعايىندىق, جولداستىق كوڭىلىمىزدى بىلدىردىك. ۇلكەن اۋكتسيوندى كۇتكەنشە ءبىرشاما ۋاقىت ءوتىپ كەتەدى. ال قازىرگىدەي قيىن كەزەڭدە تۇركيا تاراپى قىرۋار قاراجاتقا مۇقتاج. جاعداي قيىن. سول سەبەپتى جەدەل اۋكتسيون ۇيىمداستىردىم. وعان نەگىزىنەن قانات تولەمەتوۆ باستاعان بەس جىگىت اتسالىستى. رۇستەم قاراەۆ, ەرجان وماروۆ, ۆيتالي كيم, ازامات سىرعاباەۆ سەكىلدى اتىمتاي جومارتتار بۇل ۇسىنىستى قوستادى», دەيدى ە.تولەپباي.
سۋرەتشىنىڭ بۇل قادامى تۇسىنىكتى. ويتكەنى تۇركياداعى اپاتتان حالىقتى قۇتقارۋ – ۋاقىت كۇتپەيتىن ماسەلە. قۇتقارۋشىلار قازىر كۇن ساناپ ەمەس, ساعات ساناپ ادام ءومىرى ءۇشىن كۇرەسىپ جاتىر. وسىنداي كۇردەلى كەزەڭدە انادولىداعى اعايىنعا بەرىلگەن ءاربىر تيىن ماڭىزدى. وسىلايشا, جەدەل وتكىزىلگەن اۋكتسيونعا قىلقالام شەبەرىنىڭ «ۇماي انا» كارتيناسى قويىلىپتى.
«بۇل وتە ساپالى سالىنعان ءبىرتۋار شىعارمامنىڭ ءبىرى ەدى. اتىمتاي جومارت بەس جىگىت قوسىلىپ, اۋكتسيون كەزىندە كارتينانى 10 ميلليون تەڭگەگە باعالادى. ونىڭ قورىتىندىسى شىققاننان كەيىن قاراجاتتى كىمگە تاپسىرۋ كەرەك دەگەن ماسەلە تۋىندادى. ءسويتىپ, تۇركيانىڭ الماتىداعى باس كونسۋلدىعىنا حابارلاستىق. تۇرىك باۋىرلارىمىز ءبىزدى ارنايى قابىلدادى. نەگىزى ساتىلعان كارتينا بىرەۋ عانا. ونى بەس جىگىت ءبولىپ الۋى كەرەك. ولار اقىلداسا كەلە شىعارمانى دا تۇركيا تاراپىنا سىيلىق رەتىندە تاپسىرۋعا شەشىم قابىلدادى. ءسويتىپ, كەزدەسۋ بارىسىندا 10 ميلليون تەڭگەنى تۇركياداعى اپاتتان زارداپ شەككەن باۋىرلارىمىزعا كومەك رەتىندە اۋداردىق. «ۇماي انا» كارتيناسىن دا تابىستادىق.
باس كونسۋلمەن كەزدەسۋ كەزىندە انادولىداعى اعايىنعا كوڭىلىمىزدى بىلدىردىك. ونەر ادامدارى, سۋرەتشىلەر مۇنداي قيىن كەزەڭدە شەتتە قالا المايدى. ءاردايىم باۋىرلاس ەكەنىمىزدى بىلدىرەمىز. قولىمىزدان كەلگەن كومەگىمىزدى كورسەتەتىنىمىزدى جەتكىزدىك. كونسۋلدىقتاعى جىگىتتەر بۇل قادامىمىزدى جىلى قابىلدادى. كوڭىلى بوساپ, العىسىن ايتتى», دەيدى ە.تولەپباي.
«ۇماي انا» كارتيناسىندا كونەدەن كەلە جاتقان انالارىمىز بەينەلەنگەن. قولىندا جاس ءسابيدى كوتەرىپ تۇر. قىلقالام شەبەرىنىڭ ايتۋىنشا, بۇل شىعارمانى سىيلاۋدىڭ رامىزدىك ءمانى بار. قازاقتار دا, تۇرىكتەر دە ەرتە زاماندا ءبىر انادان پايدا بولعان. سوندىقتان بالا ۇستاپ تۇرعان ۇماي انانىڭ كارتيناسىن جاڭارعان تۇركيانىڭ رامىزىنە اينالسىن دەگەن تىلەكپەن تاپسىرعان كورىنەدى.
