ەكى ەلدىڭ سىرتقى ساياسي ۆەدومستۆولارىنىڭ باسشىلارى كەزدەسۋ بارىسىندا قازاقستان مەن پورتۋگاليا اراسىنداعى ساياسي, ساۋدا-ەكونوميكالىق جانە مادەني-گۋمانيتارلىق سالالارداعى ىنتىماقتاستىقتىڭ قازىرگى جاعدايى مەن دامۋ پەرسپەكتيۆالارىن تالقىلادى. حالىقارالىق كۇن تارتىبىندەگى بىرقاتار وزەكتى ماسەلە ءسوز بولدى. تاراپتار ينستيتۋتسيونالدىق تەتىكتەردى جەتىلدىرۋ, ءوزارا ساۋدانى ءارتاراپتاندىرۋ, ترانزيت-كولىكتىك باعىتتاردى دامىتۋ, سونداي-اق تسيفرلاندىرۋ, IT يندۋستريا, «جاسىل» ەنەرگەتيكا, تۋريزم, ءبىلىم بەرۋ سەكىلدى سالالاردا كووپەراتسيانى جانداندىرۋ قاجەتتىگىن اتاپ ءوتتى.
سونداي-اق شارت-قۇقىقتىق بازانى ودان ءارى كەڭەيتۋگە جانە ساياسي ديالوگتى دامىتۋعا ەرەكشە نازار اۋدارىلدى. ىنتىماقتاستىقتىڭ پەرسپەكتيۆالى سالالارىن جانداندىرۋ, مەملەكەتتىك جانە بيزنەس قۇرىلىمدار اراسىنداعى تىكەلەي بايلانىستاردى ىنتالاندىرۋ ءۇشىن ەكى ەلدىڭ ۇكىمەتارالىق كوميسسياسى مەن ىسكەرلىك كەڭەسىن تەزىرەك قۇرۋ قاجەت. كەزدەسۋ بارىسىندا بۇل ماسەلە دە اڭگىمەگە ارقاۋ بولدى. بۇدان بولەك, قازاقستان ازاماتتارىنا ۆيزالىق رەجىمدى جەڭىلدەتۋ ماسەلەسى جەكە تالقىلاندى.
مينيستر ج.كراۆينيۋ قازاقستان ءسىم باسشىسىنىڭ ليسسابونعا ساپارى ءوزارا ءىس-قيمىلدىڭ بارلىق سالاسى بويىنشا ىنتىماقتاستىقتى ودان ءارى ارتتىرۋعا قوسىمشا سەرپىن بەرەتىنىنە سەنىم ءبىلدىردى. «پورتۋگاليا قازاقستاندى ورتالىق ازيانىڭ ستراتەگيالىق پەرسپەكتيۆالى ايماعىنداعى ماڭىزدى جانە سەنىمدى سەرىكتەس رەتىندە قاراستىرادى. ءبىز كوپقىرلى ىنتىماقتاستىقتى نىعايتۋعا جانە ساۋدا-ەكونوميكالىق ءوزارا ءىس-قيمىلدى كەڭەيتۋگە قولعابىس كورسەتۋگە دايىنبىز», دەدى ج.كراۆينيۋ.
ءوز كەزەگىندە م.تىلەۋبەردى ارىپتەسىن قازاقستانعا شاقىردى. ج.كراۆينيۋ ۇسىنىستى قۋانا قابىلداپ, بيىل بيزنەس-دەلەگاتسيامەن بىرگە استاناعا كەلۋگە دايىن ەكەنىن حابارلادى.
قازاقستاندىق دەلەگاتسيانىڭ Taguspark عىلىمي-تەحنولوگيالىق پاركىنىڭ باسشىلىعىمەن كەزدەسۋى وتە جەمىستى ءوتتى. وندا 160-تان استام جەتەكشى ترانسۇلتتىق جانە ەۋروپالىق تەحنولوگيالىق كومپانيا جۇمىس ىستەيدى. Taguspark باسقارما توراعاسى ەدۋاردۋ باپتيشتا كوررەا جانە IT, باعدارلامالىق قامتاماسىز ەتۋ, بيزنەستى سەرتيفيكاتتاۋ جانە فارماتسەۆتيكا سالالارىندا قىزمەت اتقاراتىن Altice, ISQ, PHC Software, Jaba Recordati, TechnoEdif, Bandora جانە Shift Consulting سەكىلدى كومپانيالاردىڭ باسشىلارى قازاقستانداعى قارجى تەحنولوگيالارى ەكوجۇيەسىنىڭ سەرپىندى دامۋىنا شىنايى قىزىعۋشىلىق تانىتتى. Astana Hub جانە «استانا» حالىقارالىق قارجى ورتالىعىمەن ىنتىماقتاستىق ورناتۋ تۋرالى ۋاعدالاستىققا قول جەتكىزىلدى. وعان قوسا Taguspark-تەگى بىرقاتار كومپانيا ءوزارا ءتيىمدى جوبالاردى ىسكە اسىرۋ ماقساتىندا بايلانىس ورناتۋ جانە پەرسپەكتيۆالى ارىپتەستەر ىزدەۋ ءۇشىن قازاقستانعا كەلۋگە نيەت ءبىلدىردى.
