ماڭعىستاۋ ءوڭىرىنىڭ دامۋ جوسپارى مەن سۇرانىسىنا ساي دايىندالعان ءبىلىم بەرۋ, كولىك-لوگيستيكا, تۋريزم, جاسىل سۋتەگى, ينجەنەرلىك سالالارداعى تىڭ باعىتتار بويىنشا وقىتۋ جوسپارىنا بريتان ۋنيۆەرسيتەتتەرىنىڭ باسشىلارى دا قىزىعۋشىلىق ءبىلدىردى.
Yessenov University جانە Canterbury Christ Church University اراسىندا ءوزارا ىنتىماقتاستىق تۋرالى مەموراندۋمعا قول قويىلدى. ەكى ۋنيۆەرسيتەتتىڭ ارىپتەستىگى نەگىزىندە ءبىلىم بەرۋ, بيزنەس جانە مەنەدجمەنت, تۋريزم جانە قوناقجايلىق سالاسىنداعى اكادەميالىق الماسۋ, ينجەنەريا, ەسەپتەۋ تەحنيكاسى باعىتتارىن زەرتتەۋ ارقىلى ستۋدەنتتەر مەن پروفەسسور-وقىتۋشىلار قۇرامىنىڭ الەۋەتىن ارتتىرۋ كوزدەلگەن.
سونداي-اق ىنتىماقتاستىق اياسىندا بىرلەسكەن ءبىلىم, قوس ديپلوم بەرۋ باعدارلامالارىن جاساقتاۋ جانە ىسكە اسىرۋ, ەكى ۋنيۆەرسيتەت اراسىندا جاڭا تەحنيكا مەن تەحنولوگيالاردى يگەرۋدى قامتاماسىز ەتەتىن عىلىمي ۇجىمداردى, زەرتحانالاردى قالىپتاستىرۋ كوزدەلىپ وتىر.
مەموراندۋمعا قول قويۋ جانە ۋنيۆەرسيتەتتەردىڭ ىنتىماقتاستىقتى ودان ءارى دامىتۋى جوعارى ءبىلىم مەن عىلىمنىڭ ساپالى ورتاسىن قالىپتاستىرۋعا, ۇلىبريتانيانىڭ وقىتۋداعى وزىق ادىستەرىن ەنگىزۋگە مۇمكىندىك بەرەدى.
ماڭعىستاۋ وبلىسى
