قازاقتىڭ بەكزات ونەرى ءارى ۇلتتىق سپورتى قۇسبەگىلىك پەن ساياتشىلىقتى, سوعان قاتىستى ونەرپازدىقتى حالىق اراسىندا ناسيحاتتاۋ, وعان جاستار مەن وقۋشىلاردىڭ قىزىعۋشىلىعىن ارتتىرۋ ارقىلى اڭدى مىلتىقپەن ەمەس بۇركىتپەن, يتەلگىمەن نەمەسە تازىمەن اۋلاۋ الدەقايدا قىزىقتى ەكەنىن ناسيحاتتاۋ ماقساتىنداعى ءىس-شارا اۋقىمى جىلدان-جىلعا كەڭەيىپ كەلەدى. ۇيىمداستىرۋشىلاردىڭ نەگىزگى ماقساتىنىڭ ءبىرى – وتپانداعى سالبۋرىندى جالپى جۇرتشىلىق قاتىسا تويلايتىن حالىقتىق مەرەكەگە اينالدىرۋ.
«قاراشاڭىراق» جانىنداعى ۇلتتىق سپورت الاڭىندا وتكىزىلگەن شاراعا تۇششىبەك اۋىلى مەن وبلىستىڭ تۇكپىرىنەن كەلگەن قۇسبەگىلەر, قۇسبەگىلىك پەن ساياتشىلىققا قىزىعۋشىلار, بلوگەرلەر, وتپان تاۋ ماڭايىنداعى اۋىلداردىڭ تۇرعىندارى قاتىستى. ءىس-شارانى ۇيىمداستىرۋشى ج.ايداربەك سالبۋرىننىڭ تاريحى مەن ماقساتىنا توقتالدى. جينالعاندار قۇسبەگىلىك پەن سالبۋرىن تۋرالى اۋديولەكتسيا تىڭدادى. قۇسبەگىلەر ا.تايمانوۆ, ە.ەسجانوۆ, ءو.سوۆەتوۆ قىران قۇستاردىڭ تۇرلەرى, ولاردىڭ جاستارىنا قاراي اتاۋلارى, اسىراۋى, باپتاۋى تۋرالى جاس كورەرمەندەرگە تۇسىندىرسە, ولاردىڭ شاكىرتتەرى بۇركىت, يتەلگى مەن قارشىعا سىندى قىران قۇستاردى قولعا شاقىرىپ قوندىرۋ, شىرعاعا, قويان مەن كەپتەرگە ءتۇسۋ ماشىقتارىن كورسەتىپ, بابى مەن شەبەرلىكتەرىن بايقادى.
– قۇسبەگىلەر مەن وسى ونەرگە قىزىعۋشىلار قاتارى جىلدان-جىلعا ارتىپ كەلە جاتقانى قۋانتادى. مىسالى, سالبۋرىنعا بۇرىن جالعىز قاتىسقان بەينەۋلىك بۇركىتشى جاڭاباي كەمەلحانوۆ بيىلعى ءىس-شاراعا ءىنىسى مەن بالاسىن ەرتىپ كەلدى. بۇل امال مەرەكەسى سەكىلدى حالىقتىق دەڭگەيدە اتالىپ وتەتىن ءىس-شارا بولۋى كەرەك, – دەيدى ج.ايداربەك.
كەڭ دالا توسىندە ءان مەن جىرى توگىلىپ, قىرانى مەن تازىسى اتوي سالعان سالبۋرىن سوڭى ۇيىمداستىرۋشىلاردىڭ اق تىلەگى مەن قاتىسۋشىلارعا العىسحات تاپسىرۋىمەن اياقتالدى. بىرنەشە جىلدان بەرى تۇراقتى وتكىزىلىپ جۇرگەن وتپانداعى سالبۋرىنعا پاندەميادان بۇرىن كورشى وبلىستاردىڭ قۇسبەگىلەرى كەلىپ قاتىساتىن ەدى. بيىل دا قاتىسۋشىلار مەن قىزىعۋشىلار كوپ بولدى. بىراق قانشا جىل حالىق قىزىعۋشىلىعىمەن وتسە دە بيلىك تاراپىنان قولداۋ جوق. ۇيىمداستىرۋشىلار الداعى ۋاقىتتا سالبۋرىنعا بيلىك كوڭىل ءبولىپ, ۇلتتىق ءىس-شارانى لايىقتى وتكىزۋگە قولداۋ كورسەتىپ, اتسالىسسا دەيدى.
ماڭعىستاۋ وبلىسى
