«قالاداعى سۋ قۇبىرى جانە كارىز جەلىلەرىنىڭ توزۋى - 55-58 پايىز شاماسىندا. ەسكى اۋدانداردا جەلىلەردىڭ توزۋى الدەقايدا كوپ - شامامەن 80%, 1965 جىلدان 1985 جىلعا دەيىن سالىنعان ەسكى جەلىلەر بار. بىراق قازىر بىزدە اپات دەڭگەيى تومەن, جوندەۋگە ۋاقىت بار. بيىلعى جىلى «الماتى سۋدىڭ» ينۆەستيتسيالىق باعدارلاماسى وتكەن جىلعىمەن بىردەي - سۋمەن جابدىقتاۋ جەلىلەرىنە 2,6 ملرد تەڭگە جانە كارىز جەلىلەرىنە 1 ملرد تەڭگەگە جۋىق قاراجات قاراستىرىلعان», دەدى الماتى مەملەكەتتىك كاسىپورنىنىڭ باس ديرەكتورى ءىلياس قازيەۆ.
ول بيىل جوندەۋ جۇمىستارى نەگىزىنەن جەلىلەردىڭ توزىعى جەتكەن مەدەۋ, تۇركسىب, جەتىسۋ جانە المالى وڭىرلەرىندە جۇرگىزىلەتىنىن ايتتى.
بايانداماشى پروفيلاكتيكالىق جۇمىستاردى ەسكەرە وتىرىپ, ينجەنەرلىك جەلىلەردە كۇردەلى اپاتتار بولماۋى كەرەك دەپ جاۋاپ بەردى. ونىڭ ايتۋىنشا, قالاداعى بارلىق جەلىلەرگە قىزمەت كورسەتىلەدى.
«الماتى سۋ» مەكەمەسىنىڭ مالىمەتىنشە, قازىرگى تاڭدا قالاداعى سۋ قۇبىرى جەلىلەرىنىڭ توزۋى 54,2 پايىزدى قۇراپ وتىر, تيىسىنشە 1943 شاقىرىم سۋ قۇبىرى جەلىلەرى اۋىستىرۋدى قاجەت ەتەدى. بۇل رەتتە كاناليزاتسيانىڭ توزۋى 56,6% قۇرايدى, ياعني 1000 شاقىرىمنان استامى قايتا قۇرۋدى قاجەت ەتەدى.
«الماتى سۋ» مەملەكەتتىك كوممۋنالدىق كاسىپورنىنىڭ رەسمي وكىلى سەرىك شاعىروۆ جاڭا باس جوسپار جوباسىندا 2030 جىلعا دەيىن 900 شاقىرىم, 2040 جىلعا دەيىن 1500 شاقىرىم جەلىنى سالۋ جانە قايتا جاڭعىرتۋ كوزدەلگەنىن قوسىپ ايتتى.
«توزۋ قارقىنىن تومەندەتۋ ءۇشىن جىل سايىن كەمىندە 104 شاقىرىم سۋ قۇبىرى جەلىسىن جانە 73 شاقىرىم كارىز جەلىسىن قايتا جاڭعىرتۋ قاجەت. بىراق ءبىزدىڭ قولدانىستاعى ينۆەستيتسيالىق باعدارلامامىز جىلىنا نەبارى 20-25 شاقىرىم قۇبىردى قايتا جاڭعىرتۋعا مۇمكىندىك بەرەدى», دەدى ول.
