تەلەفون ارقىلى ساۋالنامانى ورتالىق سايلاۋ كوميسسياسىنىڭ رەسمي رۇقساتىمەن قوعامدىق پىكىردى زەرتتەۋ ينستيتۋتى جۇرگىزدى.
«كەزەكتەن تىس پارلامەنتتىك سايلاۋدا داۋىس بەرۋگە نيەت بىلدىرگەندەردىڭ 48,6 پايىزى «اماNات» پارتياسىنىڭ كانديداتتارىن قولداۋعا بەل بۋعان. ساۋالناما مالىمەتتەرىنە سايكەس, بۇگىندە «اۋىل» (6,2%) جانە «اقجول» (5,4%) پارتيالارى 5 پايىزدىق مەجەنى ەڭسەرىپ وتىر. باسقا پارتيالار ءالى ەلەكتوراتتىڭ قولداۋىن الا العان جوق: قۇپ (4,8%), رەسپۋبليكا (3,6%), OSDP (3,2%), بايتاق (2,8%). «بارلىعىنا قارسى» داۋىس بەرۋگە دايىن رەسپوندەنتتەردىڭ ۇلەسى 2,6%-دى قۇرادى. رەسپوندەنتتەردىڭ 1/5-تەن استامى (22,8%) پارتيالىق تاڭداۋىن ءالى شەشكەن جوق», دەلىنگەن عىلىمي-زەرتتەۋ ينستيتۋتىنىڭ حابارلاماسىندا.
ءبىر قىزىعى, سايلاۋشىلاردىڭ باسىم بولىگى ساياسي ءپليۋراليزمدى جاقتايدى, ياعني 27,8% تومەنگى پالاتادا بەس جانە ودان دا كوپ پارتيانى قولداسا, 6,6% ءتورت, 16,8% ءۇش, 12% ەكى پارتيانى جاقتايدى.
ەسكە سالايىق, سوتسيولوگيالىق زەرتتەۋ بيىلعى جىلدىڭ 25-28 قاڭتارى ارالىعىندا ينستيتۋتتىڭ جەكە قاراجاتى ەسەبىنەن جۇرگىزىلدى. ىرىكتەمەگە 17 وبلىس پەن رەسپۋبليكالىق ماڭىزى بار قالالاردان استانا, الماتى جانە شىمكەنت قالالارىنان 18 جاستان اسقان 1200 رەسپوندەنت قاتىستى.
