ەكى كۇنگە جالعاساتىن ساپار بارىسىندا دەپۋتاتتاردىڭ قازاق-قىرعىز زيالىلارىنىڭ VII فورۋمىنا قاتىسۋى جانە ەلدىڭ باسشىلىعىمەن بىرقاتار ەكىجاقتى كەزدەسۋ وتكىزۋى جوسپارلانعان.
ماۋلەن اشىمباەۆ پەن قىرعىزستان جوگوركۋ كەنەشىنىڭ توراعاسى نۇرلانبەك شاكيەۆتىڭ كەزدەسۋى كەزىندە تاراپتار پارلامەنتارالىق ىنتىماقتاستىقتى ودان ءارى نىعايتۋ پەرسپەكتيۆالارىنا كەڭىنەن توقتالدى.
«قازىرگى تاڭدا قازاق-قىرعىز قارىم-قاتىناسى بارلىق سالادا قارقىندى دامىپ كەلەدى. وعان ەڭ جوعارى دەڭگەيدەگى بەلسەندى ديالوگتىڭ ىقپالى زور ەكەنى ءسوزسىز. 2021 جىلى ناۋرىزدا قىرعىز رەسپۋبليكاسىنىڭ پرەزيدەنتى سادىر جاپاروۆ قازاقستاندا مەملەكەتتىك ساپارمەن بولدى. ال بىلتىر مامىر ايىندا قازاقستان پرەزيدەنتى قاسىم-جومارت توقاەۆ قىرعىزستانعا رەسمي ساپارمەن بارعان ەدى. سونىمەن قاتار قوس مەملەكەت باسشىلارى باسقا دا كوپجاقتى جانە ەكىجاقتى فورماتتاعى ءىس-شارالاردا كەزدەسىپ وتىرادى. سول كەزدەسۋلەردىڭ ناتيجەلەرى ەلدەرىمىزدىڭ بارلىق سالاداعى قارىم-قاتىناسىنا تىڭ سەرپىن بەردى», دەدى ماۋلەن اشىمباەۆ.
سونداي-اق ول قازاقستان پارلامەنتىنىڭ سەناتى - وڭىرلەردىڭ مۇددەسىن بىلدىرەتىن پالاتا ەكەنىنە جانە ەكى ەل اراسىندا وڭىرارالىق قارىم-قاتىناستى ارتتىرۋ ماسەلەلەرىنە نازار اۋداردى. ماۋلەن اشىمباەۆ بۇل باعىتتا ناقتى ىستەرگە باسىمدىق بەرۋدىڭ ماڭىزى زور ەكەنىن تىلگە تيەك ەتتى.
«جالپى, قازاقستان مەن قىرعىزستاننىڭ وڭىرارالىق ىنتىماقتاستىعىنىڭ الەۋەتى زور. سونى ءتيىمدى پايدالانعانىمىز ابزال. بۇل رەتتە ەكى ەلدىڭ شەكارالاس ايماقتارى اراسىنداعى بايلانىستى نىعايتۋ ماڭىزدى. ول ساۋدا-ەكونوميكالىق, مادەني-گۋمانيتارلىق قارىم-قاتىناستى دامىتۋعا ىقپال ەتەدى. سونداي-اق ترانسشەكارالىق ماسەلەلەردى شەشۋ ارقىلى شەكارالاس وڭىرلەردەگى تۇرعىنداردىڭ ءومىر ءسۇرۋ دەڭگەيىن دە جاقسارتۋعا مۇمكىندىك تۋادى. وڭىرلەردە ەكى ەل دەپۋتاتتارىنىڭ, ونىڭ ىشىندە جەرگىلىكتى وكىلدى ورگان دەپۋتاتتارىنىڭ كەزدەسۋلەرىن تۇراقتى تۇردە وتكىزۋدىڭ دە بەرەرى مول دەپ ەسەپتەيمىز», دەدى قازاقستانت پارلامەنتى سەناتىنىڭ سپيكەرى.
سونىمەن قاتار ماۋلەن اشىمباەۆ سەنات دەپۋتاتتارىنىڭ جۇمىسىندا وڭىرلەردەگى پروبلەمالاردى شەشۋگە باسا ءمان بەرىلەتىنىن, بۇل قازاقستان پرەزيدەنتى قاسىم-جومارت توقاەۆتىڭ باستاماسىمەن ىسكە اسىرىلعان كونستيتۋتسيالىق رەفورمانىڭ جالعاسى ەكەنىن ايتتى.
ءوز كەزەگىندە نۇرلانبەك شاكيەۆ قازاقستاندا جۇرگىزىلىپ جاتقان اۋقىمدى ساياسي جانە ەكونوميكالىق رەفورمالاردىڭ ءرولىن جوعارى باعالاپ, ەكى مەملەكەت اراسىنداعى قارىم-قاتىناستى دايەكتى تۇردە دامىتۋدىڭ ماڭىزدىلىعىن اتاپ ءوتتى. سونداي-اق ول پارلامەنتارالىق ىنتىماقتاستىقتى نىعايتۋ باعىتىنداعى بىرلەسكەن جۇمىس ءۇشىن ماۋلەن اشىمباەۆقا العىسىن ءبىلدىردى جانە ەكىجاقتى ديالوگتى جان-جاقتى كەڭەيتۋگە دايىن ەكەنىن جەتكىزدى.
ودان بولەك, سۇحباتتاسۋشىلار ساۋدا-ەكونوميكالىق, الەۋمەتتىك, مادەني-گۋمانيتارلىق جانە باسقا دا ماسەلەلەردى شەشۋگە ەكى ەل پارلامەنتاريىنىڭ تيگىزەر ىقپالىن تالقىلادى. ەكى مەملەكەت اراسىندا ءبىلىم جانە عىلىم سالاسىنداعى ءوزارا بايلانىس جۇيەلى تۇردە دامىپ كەلە جاتقانى دا ايرىقشا اتالدى. قازىرگى تاڭدا قازاقستانداعى جوعارى وقۋ ورىندارىندا وقۋ ءۇشىن قىرعىزستان ازاماتتارىنا بولىنەتىن كۆوتانىڭ كولەمى ۇلعايتىلدى. سونىمەن بىرگە تاياۋدا بىشكەكتە ءال-فارابي اتىنداعى قازاق ۇلتتىق ۋنيۆەرسيتەتىنىڭ فيليالى اشىلعانىن دا ايتا كەتكەن ءجون.
سونىمەن بىرگە ساپاردىڭ العاشقى كۇنىندە سەنات توراعاسى 1916 جىلعى قايعىلى وقيعا سالدارىنان قازا تاپقانداردى ەسكە الۋعا ارنالعان «اتا-بەيت» تاريحي مەموريالىنا گۇل شوعىن قويدى جانە ايگىلى جازۋشى شىڭعىس ايتماتوۆتىڭ رۋحىنا تاعزىم ەتتى. سونداي-اق ول قالامگەردىڭ مۋزەي-ۇيىنە دە باردى.
