سالانىڭ رەسمي وكىلى ايبەك سمادياروۆتىڭ ايتۋىنشا, بيىلعى 12 قاڭتاردا پرەمەر-ءمينيستردىڭ ورىنباسارى – سىرتقى ىستەر ءمينيسترى مۇحتار تىلەۋبەردىنىڭ توراعالىعىمەن سىرتقى ىستەر مينيسترلىگى القاسىنىڭ وتىرىسى وتكەن. وندا سىرتقى ساياسات ۆەدومستۆونىڭ 2022 جىلعى قىزمەتىنىڭ قورىتىندىلارى شىعارىلىپ, اعىمداعى سىن-قاتەرلەر مەن الداعى كەزەڭگە ارنالعان جۇمىس باعىتى ايقىندالدى.
«2023 جىلعى 12-13 قاڭتاردا مەحيكو قالاسىندا مەكسيكانىڭ سىرتقى ىستەر ءمينيسترى مارسەلو ەبراردتىڭ سول ەلدە اككرەديتتەلگەن ديپلوماتيالىق كورپۋسپەن 34-ءشى جىل سايىنعى كەزدەسۋى ءوتتى. مينيستر مارسەلو ەبرارد ءوز سوزىندە بيىلعى ماقساتتار تۋرالى ايتىپ, 2023 جىلى مەكسيكا بەس جاڭا ەلشىلىك, ونىڭ ىشىندە قازاقستاندا دا ەلشىلىك اشاتىنىن رەسمي تۇردە جاريالادى. قازاقستان مەكسيكا ۇكىمەتىنىڭ شەشىمىن قۇپتايدى جانە مەكسيكانىڭ استانادا ەلشىلىگىن اشۋعا قاجەتتى كومەك كورسەتۋگە دايىن», دەدى ا.سمادياروۆ.
سونداي-اق سپيكەر 2023 جىلعى 16 قاڭتاردا شۆەيتساريانىڭ داۆوس قالاسىندا دۇنيەجۇزىلىك ەكونوميكالىق فورۋمنىڭ جىل سايىنعى وتىرىسى باستالعانىن حابارلادى. ايتا كەتەرلىگى, ءىس-شارا 2023 جىلعى 20 قاڭتارعا دەيىن جالعاسادى. فورۋمنىڭ تاقىرىبى – «بولىنگەن الەمدەگى ىنتىماقتاستىق». قازاقستان تاراپىنان وسى ءىس-شاراعا ستراتەگيالىق جوسپارلاۋ جانە رەفورمالار اگەنتتىگىنىڭ توراعاسى اسەت ەرعاليەۆ قاتىسادى.
«18-20 قاڭتار ارالىعىندا XV دۇنيەجۇزىلىك ازىق-ت ۇلىك جانە اۋىل شارۋاشىلىعى فورۋمى مەن «جاسىل اپتا-2023» حالىقارالىق كورمەسىنە قاتىسۋ ءۇشىن مينيستر ەربول قاراشوكەەۆ باستاعان اۋىل شارۋاشىلىعى مينيسترلىگى دەلەگاتسياسىنىڭ بەرلينگە ساپارى جوسپارلانعان. حالىقارالىق «جاسىل اپتا» – اۋىل شارۋاشىلىعى, ازىق-ت ۇلىك ءوندىرىسى جانە باۋ-باقشا سالاسىنداعى ەڭ ءىرى حالىقارالىق كورمە-جارمەڭكە. ول 1926 جىلدان بەرى بەرليندە جىل سايىن وتكىزىلىپ كەلەدى. ءىس-شارا اياسىندا قازاقستاندىق تاراپ حالىقارالىق ازىق-ت ۇلىك يندۋسترياسىنىڭ وزىق تەحنولوگيالىق ازىرلەمەلەرىمەن جانە ونىمدەرىمەن تانىسادى», دەدى ا.سمادياروۆ.
سونداي-اق بريفينگ بارىسىندا شەتەلدە قۇلدىققا تۇسكەن قازاقستاندىقتار ماسەلەسى دە ءسوز بولدى. كەيىنگى كەزدە «التىن ءۇشبۇرىش» دەپ اتالاتىن وڭتۇستىك-شىعىس ازيا اۋماعىندا (ميانما, لاوس جانە تايلاند) قازاقستاندىقتاردىڭ قۇلدىققا ءتۇسۋى تۋرالى اقپارات ءجيى تاراعان-دى.
«الدىن الا ءسوز بايلاسقان حالىقارالىق قىلمىستىق توپتار, كوبىنەسە ءۇشىنشى تاراپ – الەۋمەتتىك جەلىلەر ارقىلى قازاقستان ازاماتتارىن تايلاند اۋماعىندا ورنالاسقان كومپانيالارعا جۇمىسقا شاقىرادى. تايلاندقا كەلگەننەن سوڭ ءتۇرلى جەلەۋ ايتىلىپ, ازاماتتار الاياقتىق جولمەن ميانما اۋماعىنا جەتكىزىلەدى. ونى كەيىن تۇسىنگەن وتانداستارىمىز قايتا ەلگە ورالۋعا نيەت بىلدىرگەن جاعدايدا, كومپانيا ولاردان 5-10 مىڭ دوللار تولەۋدى تالاپ ەتەدى. وسىعان بايلانىستى, مۇنداي سومانىڭ بولماۋىنا وراي, قازاقستاندىقتار قىتايلىق كومپانيالاردا جۇمىس ىستەۋگە ءماجبۇر بولادى.
ءمالىم بولعانداي, جابىرلەنۋشىلەر ەۋروپا مەن امەريكا ازاماتتارىنان الاياقتىق جولىمەن اقشا شىعارۋعا ماشىقتانعان قىلمىستىق كومپانيالارعا كوبىنەسە اۋدارماشى بولۋعا نەمەسە كليەنتتەرمەن جۇمىس ىستەۋگە قابىلدانادى. جۇمىستان باس تارتقان جاعدايدا, ازاماتتاردى باسقا ۇقساس قىلمىستىق كومپانيالارعا 5-7 مىڭ دوللارعا ساتىپ جىبەرەدى. بۇعان قوسا, زورلىق-زومبىلىقپەن, پسيحيكالىق قىسىم, تاماق بەرمەۋ سەكىلدى ادىستەرمەن قورقىتادى», دەدى ا.سمادياروۆ.
وسى ورايدا, قازاقستاننىڭ تايلاند جانە ۆەتنامداعى ەلشىلىكتەرى وسى ماسەلەنى تولىق شەشۋ ماقساتىندا تايلاندتىڭ, لاوستىڭ جانە ميانمانىڭ قۇقىق قورعاۋ ورگاندارىمەن جانە سىرتقى ساياسات ۆەدومستۆولارىمەن تۇراقتى بايلانىستا ەكەنىن ايتا كەتكەن ءجون. سونداي-اق بۇل ۇدەرىسكە تايلاندتاعى حالىقارالىق ۇكىمەتتىك ەمەس ۇيىمدار دا جۇمىلدىرىلعان.
