4 قاڭتاردان باستاپ جامبىل وبلىسىنىڭ پوليتسيا قىزمەتكەرلەرى ءارتۇرلى كاليبرلى 18 بىرلىك قارۋ مەن 900-دەن استام وق-دارىلەردى تاركىلەدى. تاركىلەنگەن قارۋلاردىڭ اراسىندا اك-74 اۆتومات, اكس-74ۋ اۆتوماتى, Benelli Argo 30-06 مىلتىق, پم تاپانشاسى, Mossberg قارۋى, توز-16 قارۋى, يج 16 كاليبرلى قارۋى, Reg agent رەۆولۆەرى, بەكاس-2 ءبىر وقپاندى تەگىس ۇڭعىلى مىلتىق, گاز تاپانشاسى, بايكال تراۆماتيكالىق تاپانشا, مر-79-9تم گاز-تراۆماتيكالىق تاپانشا, ەكى تەگىس ۇڭعىلى اڭشىلىق مىلتىعى, جارىق-شۋلى گراناتاسى, تاپانشا وقجاتارلارى جانە ءارتۇرلى كاليبرلى 901 وق-ءدارى بار.
مىسالى, 10 قاڭتاردا پوليتسيا قىزمەتكەرلەرى قالانىڭ شاعىن اۋداندارىنىڭ ءبىرىنىڭ جانىنداعى بوس جەردە قاپشىقتان 7,62 مم كاليبرلى اك-74 اۆتومات, 9 مم كاليبرلى 6 وق-ءدارىسى بار پم تاپانشاسى جانە 12 كاليبرلى 6 وق-ءدارىسى بار بەكاس-2 ءبىر تەگىس ۇڭعىلى مىلتىق تاپتى.
سونىمەن قاتار 15 قاڭتار كۇنى ساعات 14.35 شاماسىندا شۋ اۋداندىق پوليتسيا قىزمەتكەرلەرى تولە بي اۋىلىنداعى قاراۋسىز قالعان عيماراتتىڭ بىرىنەن قارۋ-جاراق جاسىرىنعان ورىن انىقتالدى. وقيعا ورنىنان ءبىر Mossberg قارۋى, ەكى توز-16 كاليبرلى, ءبىر يج 16 كاليبرلى, ءبىر توز 16 كاليبرلى, ءبىر پب-4 1 مل كاليبرلى 18ح45, ءبىر رەۆولۆەر Reg agent كل-9مم اتىس قارۋى جانە ەكى جاساۋراتقىش دىبىستىق گراناتا, 308 دانا وق-ءدارى تابىلدى.
وعان قوسا وتكەن جىلعى قاڭتار وقيعاسى كەزىندە جامبىل وبلىسى پوليتسيا دەپارتامەنتىنەن ۇرلانعان 1 دانا 9مم پم تاپانشاسى الىندى. بۇدان باسقا جەدەل اقپاراتتى پىسىقتاۋ بارىسىندا شۋ قالاسىندا پوليتسيا قىزمەتكەرلەرى 21 جاستاعى جەرگىلىكتى تۇرعىندى ۇستادى. تەكسەرۋ كەزىندە ودان ءبىر وقجاتارى بار بايكال تىركەلمەگەن تراۆماتيكالىق تاپانشاسى تابىلىپ, تاركىلەندى. سونداي-اق «102» پۋلتىنە تارازدىڭ 41 جاستاعى تۇرعىنىنان ءۇي ماڭىنداعى ەلەكتر باعانىنىڭ جانىنان وق-دارىلەرى بار سومكە تاپقانى تۋرالى حابارلاما كەلىپ ءتۇستى. شاقىرۋعا كەلگەن پوليتسيا قىزمەتكەرلەرى اتالعان سومكەنىڭ ىشىنەن 7,62 مم كاليبرلى 509 وق-ءدارى تاپتى. بارلىق قارۋ-جاراق پەن وق-دارىلەر سوت-بالليستيكالىق ساراپتاماعا جىبەرىلدى.
