«ەل تاريحىندا قازاق حالقىنىڭ تاعدىرىنا قاۋىپ توندىرەتىن قيىنشىلىقتار مەن زۇلماتتار كوپ بولدى. قازاق حالقىن جويۋعا باعىتتالعان وسىنداي سۇمدىق ارەكەتتەردىڭ ءبىرى – كەڭەس وكىمەتى تۇسىندا ادەيى ۇيىمداستىرىلعان اشارشىلىق پەن قازاق قايراتكەرلەرىنىڭ جازىقسىز جەر اۋدارىلۋى. ءدال وسى سۇراپىل جىلداردى ەستە قالدىرۋ جانە ساباق الۋ ماقساتىندا 31 مامىر اشارشىلىق جانە ساياسي قۋعىن-سۇرگىن قۇرباندارىن ەسكە الۋ كۇنى بولىپ جاريالاندى», دەدى امانجول التاي ءماجىلىستىڭ جالپى وتىرىسىندا.
دەگەنمەن, دەپۋتات اتاپ وتكەندەي, قازاقستاندىقتاردىڭ قازىر «كورنەكتى قايراتكەرلەردىڭ ەسىمدەرىن ەسكە الىپ, ميلليونداعان ادامداردىڭ سۇمدىق تاعدىرىن وي ەلەگىنەن وتكىزىپ» لايىقتى قۇرمەت كورسەتۋگە مۇمكىندىگى جوق. دەپۋتات بۇل كۇنى ازاماتتار تاراپىنان قۋعىن-سۇرگىن قۇرباندارىنا تاعزىم ەتۋ ەسكەرتكىشتەر مەن مەموريالدارعا گۇل شوقتارىن قويۋدان ءارى كەتپەيتىنىن باسا ايتتى.
«2022 جىلدىڭ 12 تامىزىنداعى 363−بۇيرىعىنا سايكەس جالپى ءبىلىم بەرەتىن مەكتەپتەردە 36-شى وقۋ اپتاسى 31 مامىردا اياقتالادى. مەكتەپتەردەگى سوڭعى قوڭىراۋ كۇنىن 30 مامىرعا, ءتىپتى 1 ماۋسىمعا اۋىستىرۋ كەرەك. بۇل ەشقانداي تالقىلاۋعا شىدامايتىن ءادىل تالاپ», دەدى ءماجىلىس دەپۋتاتى.
ا. التايدىڭ پىكىرىنشە, مىنانداي شارالاردى قولدانۋ قاجەت:
- ءداستۇرلى تۇردە ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە ءبىر مينۋت ۇنسىزدىك جاريالاۋ;
- بۇل كۇنى تەلەارنالاردان سول كەزدەگى وقيعالار تۋرالى مازمۇندى باعدارلامالارمەن الماستىرىپ, ءازىل-ىسقاق شوۋ باعدارلامالار مەن ەسترادالىق كونتسەرتتەردى بەرمەۋ;
- باق بەتتەرىندە ايتۋلى داتانىڭ تاريحي سالماعىن, عيبراتتى ءمانىن جان-جاقتى جەتكىزەتىن ماقالالار جاريالاۋ;
- مەكتەپتەردەگى سوڭعى قوڭىراۋ كۇنىن 31 مامىرعا اۋىستىرۋ.
